揀書院，有咩得揀？

文：放長假

揀揀揀，升中時要煩讀咩中學，入到中學又要諗揀讀咩科，中七放完榜先揀完大學同major，入到中大，重要揀書院﹗﹖

其實中大所謂嘅書院制，好聽啲就係好似中大講到書院唔同文化匯聚埋一齊塑造中大面貌，但其實書院制幾廿年前俾中大收歸權力之後就已經名存實亡。依家嘅書院做到嘅就只有搞下學生活動，提供宿舍、運動等設施，仲有俾獎學金同交換生機會之外，就算書院有理想有傳統，書院方面都冇咩可所為。而新生揀選書院嘅方式，都不過好似找錯處，相同之中找不同，即係宿位、獎學金、書通工作量嘅分別。書院精神？who cares~

點都好，新生都要揀書院，就介紹下每間書院有咩分別。
崇基
崇基學院係中大規模最大嘅書院，最有錢亦佔地最多，夠近火車站出入方便。而且崇基學院派獎學金就派得最多，每年有幾百個唔同項目俾同學申請，所以唔少學生都會為左拎獎學金而入崇基。仲有崇基宿位多，更加會預唔少宿位俾新生，所以差唔多每個新生申請都會有宿住。但崇基宿舍分得散，部分會相對殘舊，而且唔同宿舍都有自己嘅文化習慣，揀宿舍嘅時候就要問清楚睇清楚喇。另外崇基學院有基督教背景，所以係設有教堂，咁當然唔係崇基學生專用啦，而且仲有間神學樓宿舍，有基督教信仰嘅同學都可以考慮下揀崇基甚至住神學樓，話晒都容易啲接觸同道人。

書通週會方面，崇基嘅書通要做專題研究報告﹙FYP﹚，好多人話好煩，但年年崇基學生都係咁做，都唔洗太驚嘅。而崇基嘅週會都係咁多間書院入面上得較密果個，雖然如此，其實崇基啲週會題目係幾有趣幾吸引，好似上年就有白先勇講文學，仲有請唔同講者講蝸居、城市人、公民社會等嘅題目，得閒當聽下talk學下野都幾爽皮。
新亞
新亞書院唔講錢，而係講理想。年中唔少同學都係因為錢穆唐君毅而揀入新亞書院，但當你入到去嘅時候就會覺得新亞除左多尊唐君毅像同有個錢穆圖書館之外，其實同其他書院冇咩大分別。當然新亞仍有一定嘅吸引力，好似話地方細細容易聚埋一齊，而且新亞喺正山頂睇景一流，得閒行過合一亭睇下風景，思考下天人合一嘅境界都係唔錯嘅享受。再講就係新亞每樣都不過不失，獎學金唔係少又唔易拎，週會有啲花款但又未係好吸引，書通唔叫新奇都唔係冇趣，總之唔會悶親又唔會開心喇。例如上年週會會有勞思光講歷史，又會有劉江華講民主。點都好，喺新亞無論去邊都幾方便，搭校巴實有位，行落本部又好快好方便，而且周圍都有靚景睇。

聯合
聯合書院就真係樣樣都有齊，如果同學冇咩特別心水，揀聯合書院就最穩陣喇。聯合書院地多環境好，有花又有草，宿舍新淨唔老套。聯合有大大個草地俾人睇書睇日落，又有大大個石地比人吹水放風箏訓覺，環境真係唔錯，而且聯合嘅宿舍普遍都俾其餘幾間舊書院新淨都靚，筆者唔係聯合學生有時都幾羨慕。仲有聯合書院提供嘅獎學金都幾多，而且唔同條件種類都有，例如話只要你係全家族第一個入讀中大聯合書院嘅都有獎學金俾你申請。另外就係要提UC LIB地下嘅天機電腦室，天機特別之處就係入面嘅電腦得聯合學生先用到，重有個MON大啲，除此之外就應該冇喇。

當然聯合都唔係話樣樣好，就好似聯合書院個CANTEEN都係出名難食，而且間公司啱啱先續左約，大家應該要再頂多幾年喇，一係就行過新亞或者本部食喇。雖則UC CAN難食，不過UC又會有個思源館俾人坐下飲酒吹水，但其實好多時十一點就收，如果同學係CANTEEN食唔飽咪去思源館飲下水囉。聯合嘅書通週會普遍黎講都幾悶同多野做，題目又唔有趣，呢點大家留意下喇，仲有聯合學生都係好似崇基咁要做FYP 。最後就係聯合個位雖然好，無論行去本部，新亞定逸夫都係最方便，之不過搭校巴落火車站就麻煩啲，因為成日都會遇到校巴逼滿上唔到嘅問題，有時就要走過新亞等車。

逸夫
逸夫書院係中大第四間書院，於1986年由邵爵爺捐錢成立，書院果邊除左冇圖書館之外，其他設施都冇少到，有齊自修室電腦室同GYM ROOM 等設施。逸夫果頭冇任何學系DEPARTMENT，書院宿生上堂就預左要走返出其他書院或者本部，但逸夫對比舊有三間書院係偏遠左小小，無論離CC，UC定本部都有段路程，所以宿生多數都要搭校巴喇。好彩逸夫係校巴頭站，唔會話冇位上車。而且因為有唔同校巴線經逸夫，所以要係中大四圍去都唔會太唔方便，但上落火車站嘅校巴就疏少少，如果SKIP左，唔想等就去本部轉車或者過UC搭喇。

而逸夫嘅獎學金真係少，而且申請條件都唔係咁易，所以都係唔洗諗喇。至於書院通識通同週會方面嘅題目就睇落幾新鮮幾多款，同學認真上下都無妨嘅。值得一提，逸夫有全中大唯一嘅BAND房同BAND SOC，當然唔係逸夫學生唔會話唔俾玩，但近水樓臺先得月嘛。

善衡
中大其中一間全宿共膳嘅新書院，即係話所有學生都會有宿舍住，而學生都需要每星期有兩三次聚埋一齊食飯，有時又要去high table dinner，話想要有家嘅感覺，但食飯要好似上堂咁，take attendance ~

善衡兩棟宿舍都已經起好，黎緊入學嘅善衡新生已經可以入宿喇，咁就唔洗擔心要去國際生宿舍住喇，而且宿舍係正大學路，夠近本部。至於書院飯堂都話會係今年完工，所以學生上堂做GYM定食飯都會幾方便。但因為新書院關係，書通都係唔多得揀，獎學金都唔係太多。不過諗返新書院學生又唔多，要爭獎學金都未必咁難。

晨興
晨興係中大另一間全宿共膳新書院，同善衡一樣今年有得入宿，又喺善衡附近，但規模比善衡細，每年只有三百個學生（善衡有六百個）。相對於善衡，晨興依家提供嘅書通同獎學金都係少得多，書通暫時都冇得揀，而且據書院稱佢地係間國際化書院，所以書通嘅授課語言會以英文為主，中文為輔。新生揀書院時就諗諗呢啲對於你重唔重要喇。

和聲
今年和聲書院第一年收生，預計會收二百五十人。今年入讀嘅學生都會先住喺國際生宿舍，事關書院宿舍未起好。和聲書院就坐落喺聯合隔離，都未係太山卡拉，重話將來門口會有個巴士總站落山（不過班次係點就唔知喇），就算係咁，其實走過去聯合食野搭車都唔係好遠啫。但有樣野要注意就係和聲書院唔係全宿共膳宿舍，亦都唔係強制住宿，將來有一半學生會係走讀生，如果想三年必宿嘅就唔好搞錯喇。

後記

除此之外，其實每間書院都會有大大少少唔同嘅活動，好似有水陸運會，逸夫有環SHAW行、新亞有happy run，唔同書院重不時會搞語文桌，院長盃等唔同嘅文化體育活動，不過只係得呢類活動，要搞書院理想？要講書院教育？問過中大未呀﹗