原創文章

放JUPAS結果當晚正在旺角，一打開報紙發覺派獲的Major代號的頭一個數字是4！唔係呀嘛！我想入港大呀！在預科時期，心中覺得香港只有港大和中大兩間大學，而其實心中又只得一間港大，因為近西環一帶舊區和有hall住。當然，後來明白這只是一些細佬仔奇奇怪怪的想像。

當初一心想入hku的archi，但會考成績唔夠好，即使寫信叩門都沒有機會參加aptitude test，之後就轉bu ctv，但我到現在都覺得在interview時答錯野，講左d怎樣透過電影去講一故事去做一d野，無講電影本身作為藝術之類……雖然我一心想入archi，但我當時都諗唔通咁多人無屋住，做乜仲要花咁多錢設計起埋d只有一小撮人住的屋呢……

最後入了中大，這三年遇到的人和事，真係「改變」了我，亦對我的成長非常重要。（雖然唔知係未真係有成長，哈）

蕉皮踩實屎：

1.BU：CTV（cinema and television）
2.HKU：Earth Science
3.HKU：Mechanic Engineering
4.UST：Industrial Engineering
5.CU：Physics

迎新營第一天，呀組爸叫我唔好俾人知我5th choice入來（？？？？），都有少少感覺到自己和其他人的唔同（自己想像的），因為2/3同學是一心入物理的，而自己就碌入來咁。入到O’Camp，都唔知d人做乜係度片人。大學生就係咁？開學之後，覺得要讀好d，之後（就）可以轉系，archi，jlm…

預科時期老師建議讀下《劍橋語絲》和《海德堡語絲》，令我對大學和大學生都隱隱有一些模糊的幻想，大學生應該做番d野咁，大O一晚吹水，我地討論做乜要唱院歌，因為冇乜歸屬感，又唔識唱，又代表唔到d乜……傾o左成晚，呀組媽就係咁話「你地要去學生會啦，xxxxxxx」云云。

當時都只係諗大學生應該做乜，學生會應該做乜的問題，學生會可能給我答案，之後就走左去學生會的傾莊坐下。無乜出路。之後識左一些學生會的人，當時正值公安法事件，聽多了很多平時自己無聽過無討論過的野，同埋一些思考問題的方法／方式。點思考？點諗野？點諗問題呢？

第一次去了遊行，重係無申請的，初時去到都驚驚地，諗住o係側邊行下，搵下個識得o既舊莊員，行行下，已去到政總門口，好覺得遊行都係行下姐，又唔係咁大件事，洗乜搞到咁誇張，又拉人，又要申請呀？

最後，學生會正式傾莊的時候，我諗過上莊還是讀好書轉系，到最後都係決定唔傾莊勒。我斷斷續續到學生會hair下，睇下有冇野幫下手，八下咁……反而上左系會，搞下活動，玩下……都好開心架，但好少有傾得埋的朋友，對於時事、理想、社會……

year 1 1st sem全是take PHY course，2nd sem報了一個新傳系（jlm）COM course ，諗住轉系時好睇一d，2nd sem期間，去了art centre讀一個有關film的短課程，睇下自己是否真的喜歡電影，因為都仲想轉去BU的CTV。

到了（01年）3月是物理節，文康活動衝了一大輪，2月又和沒見七年的小學同學出來玩了2次，之後讀書的心情沖淡了，頹了下來，都無乜上課，抄下功課咁啦。1st year兩個sem的GPA分別是2.8、2.4

放暑假前，看到學生報有個有關大磡村的專題，而我某個小學同學居住的地方又剛遇上政府要清拆。都引起我的注意和關心。我遇到中大報社的編輯，向佢拿一些資料，又到報社找了一些資料，又在這時看了一套有關大磡村清拆的紀錄片《大陷之路》。坐在觀眾席的我，見到片中房署拆屋、收地的做法，驚覺香港竟有這樣（我那時不懂形容）的事發生。記得映後分享時間，我第一個問題是「佢地房署真係咁做野架？……」難得工作人員抵死回答：「我諗錄影力量都冇咁多錢去拍出咁o既場面o既。」

之後問了好多關於大磡村的背景、清拆當時的情況，還留下了我的contact給那朋友，希望有甚麼發展就通知我。自己也去訪問了那小學同學和一些村民，寫了一份稿，有關清拆的影響（重點講社區網絡的破壞）。之後到JLM department辦轉系，有和系主任傾過下，佢都係話我成績唔夠好（係phy既成績喎）而拒絕了申請。之後份稿就投左去報社。

期間又參加了一個去廣東清遠的服務團，主要為幾間小學成立圖書館，給我們這班大哥哥大姐姐為三間小學當一天老師。一大堆「我們城市人到鄉村去會帶給那裡多大影響」的問題纏繞腦海，點解有同學會覺得自己好似好偉大咁「幫」緊他們？你「幫」佢定佢「幫」你呀？大學生覺得自己在暑期做番些有「意義」o既野，洗滌心靈，覺得自己好偉大，點解係你「幫」佢？……最後一日入村過夜就更複雜，人人係咁拿個相機影影影，當時諗，我們會否帶了一些「城市」d o野入來，帶來唔知會係點的impact給他們，佢地可能都未見過相機，點講呢……記得一位朋友在內地工作，協助農民建設水利，一位村民問她：「香港？好遠架喎，同埋好似好發達架喎，你屋企養o左幾多隻豬呀？」當時我覺得我可能做緊一些很錯的事，後來才發現之前已有香港學生來過，屋企睇廣州電視，有香港劇集，甚至聽緊謝霆鋒，都安樂d，就和村童上山，落河，落田，買冰條……

回來，因為大磡村的事而認識的朋友﹕報社的朋友、videopower（錄影力量）的朋友、學生會的朋友……在一個叫八樓的地方連繫晒這班人（事緣錄影力量的朋友話我知大磡村街坊會搞個大食會，我就去左大磡村，後來臨時改左另外一個地方，我就跟埋去，那裡就是八樓。）。

01年7月中，九龍城何家園面臨清拆。清拆最後限期前一日，我與八樓的朋友去到現場。當時，自己覺得以3rd person的位置、心態去睇下（參與）件事，作一些記錄。當晚四圍走去同居民傾偈。第二天，即清拆當天，我在現場，感受到居民的無助，房署的無理，警察的暴力的時候，心中很強烈的感覺要用錄像將它們拍下來，同時藉著拍攝不讓暴力發生，不讓警察房署亂黎。我已是站在居民的一邊，希望他們爭取合理的補償。（始終你拆了人地屋企呀……但其實居民沒有say去話拆唔拆這地方……）

之後參加了八樓的video工作坊，認識多一些八樓的朋友。「功課」係拍了四天的大O，訪問同學對O’Camp，大學生的想法等等。拍了七餅DV，已封塵……

就這樣過了暑假。呀，還有籌備Physics O’Ccamp，玩得好開心架！2nd year轉不了系，報CTV又過了期，也就索性希望碌碌下拿PHY degree。由始至終，我都喜歡physics，只是唔係咁讀囉，得閒睇下書就好，唔想係咁計計計。

02 7-8月期間也上了一個由之前art centre film course的導師為我們一班同學而搞的video production workshop，學攝影燈光製作上d o野，10-11月期間拍攝我們那30mins的故事，12-1月剪片……

而10月中又開始參予film course老師一齣關於老人家籌辦舞台劇的電影工作，每星期協助他拍下和長者綵排的情況，搜集資料……

當然還有系會的活動、學科（上課，功課）只是無乜心去上堂，take多了GEE（大學通識課），2nd year 1st sem有GEE的中哲主流思想＋GEE的GPA Media＋other PHY ，最後fail 1 phy course，GPA 1.47……12月尾至1月的時候正是拍攝時間，很多時間去了場地收拾打掃、協助拍攝，02年1月開始走了很多堂，也忙著剪自己的片……後來更除了experiment和一科Phy外，其餘的已走了很多堂，當然功課都沒做，也沒抄（過不了自己嘛）……

而期間接觸多了八樓，認識了一些可以傾到社會議題的朋友，諗法也多了，後來更做了八樓管委會的中大代表（八樓實為學聯社運資源中心），傾全年計劃、分工……year2 2nd sem全take phy gpa 0.18＝四科3 credit的phy fail，一個1 credit的phy有c+。03年3至8月忙八樓的「工作」，主要搞video workshop，還有參與多了一些社會行動的action，討論、實踐、嘗試很多o野。這裡有班人和你一起去諗去砌去度去實踐。

3rd year暑假，department 和中大輔導組都找了我傾計，問我有咩事，當時，我已決定唔會讀physics （唔take physics course）而去take 有興趣的科目，ANT（人類學）、SOC（社會學）、COM（新傳）、GPA（政政）、MLC（文化研究）、PHI（哲學），想法、社會……諗住讀完year 3再睇下有無機會轉系……同一時間也報了APA （即演藝，無收到我，可能又犯了CTV interview的錯誤）。

期間，忙八樓的工作，有關居留權、公共空間（西洋菜街街站）、我的家園計劃、workshop、talk、文化節、放映、報紙、展覽……

year3 1st sem ANT、SOC、COM，是比較專注讀書的時間，開始自己一個食飯，在校園找資料、睇文，得閒搵人傾下計、八下……本來是很不慣一個人的，慣左食飯有人一起食，當然，慢慢慣了，更唔想多人一起，食飯都係下午茶少人的時候去吃，到了 2nd sem，ANT、GPA、SOC、COM，most are theory courses。

慢慢，路開始出來。我如果仍轉系，最可行的是ANT或SOC，但其實最好都係似HKU ba faculty的制度，在Social Science Faculty裡任我take（有關social science course），夠分就可以grad.，但現時在中大唔可能。而轉系至少都要讀多兩年，同時因為之前有fail course，讀phy又要至少讀多兩年。讀了physics已兩年，都沒有為自己這三年作過甚麼安排和計劃……有同學6個sem take 爆 21 credits，double minor，全副精神讀書，而我是不可能的。當時我覺得很想做八樓o既o野，希望未來都能花時間在社會運動上，能夠做自己喜歡想做的是人人的希望。希望生活工作都是循咁樣方向去……

我想為自己創造一個形勢，一個situation。

我成日「形」住一個學位會令我安全、得到保障。

但而家我唔想自己咁安全，生活穩定、安飽，因而也就「舒服」，為了自己的「舒服」，我已用上很多時間。

而其實很可能我的「舒服」位就是「唔安全」的狀態，但這「唔安全」可能對於我來講可能就是一個「安全」的位置，去講o野、做o野、去砌o野。（社會運動）

我想脫離錢的系統，或者怎樣不被它牽扯我的生活，（還是我正正被它牽扯著？）但我又想自己盡量牽扯這社會（車！人身在這社會，無時無刻也是影響和被影響架啦——），其實諗唔通。

有朋友對我講她有個中大讀藝術朋友也是讀了兩年後quit U，而佢在quit out前已安排好生活、工作，怎樣和家人交待……

Oh，I just don’t wanna be safe, man!

我就係唔想過咁「安排」的生活……

家人呢？家人對子女大學畢業的期待呢，花了咁多錢，唔覺得o徙咩，你讀過d書，有些諗法，就就著自己意願去決定，點向父母交代？有冇關顧父母的感受期望？這是知識霸權！

這是我的死位，一方面了解父母的期望，一方面又有自己的想法，而且當時有一股勁連父母希望子女的未來要有「安穩」的生活的觀念都要拆埋，最後都係盡量說清楚想法，但其實真係很仆街！

書院都有問我點，有咩安排去向，我回應說我已有了打算，唔會讀了。
擔心讀書的錢、時間，或者我唔想成為一個大學生……
我心中可能對大學生有一定想像，而我是不符的，我也唔想有這個身分。
雖然這個身份其實係無乜野~
不想在一個安全的位，每刻有時面對自己的生活、人生、社會。（雖然這是人人面對，同係唔係大學生冇關係。或者我已拿到我想要的。講左咁多o野，諗諗埋埋，其實我都讀o左3年大學，過左三年時間。）

簡單來講，想做一份喜歡的工作，有時間搞SM。這身分我唔需要，很想證明無這身分也有一些作為。

八樓　文化　住屋文化　人事　金錢　共管

公共空間　壓迫　管理　家人　情人　音樂

自給自足　社會運動　消費　剝削　生活　緣色

共享　自主　電影　anarchy　浪費　環境　有機耕種　資源

zaptista　activist　民主　社會行動　社區　建制

攝影　Punk　簡樸　自由　性愛　錄像

現在我正在耕田，其他時間搞8樓o既o野，搞工作坊、8a報、放映、電影節、講座、演出、網頁、電台、百無聊賴……

這只是抵抗？是反抗？還是逃避？我不清楚——我為自己創造一個形勢，再走下一步。
28/8 3:11am

排版時再睇一次，發覺得自己講得幾清楚）（?）……唔……應該是冇乜講得錯……
最中的一句都係「為自己創造一個形勢，一個situation」我現正正處於這situation……　 5/2/04 2145 於面臨被學聯關閉的八樓