影評：鄭中基的繼續努力宣言——《心想事成》

影評

鄭中基的繼續努力宣言——《心想事成》

文：少爺仔

鄭中基既無賴同埋龍威形象大概已經深入民心，佢既突兀面部表情同埋古怪發音早已成為佢既標記。兩集《龍咁威》裏面佢賣既係三分鐘一小笑五分鐘一大笑，套戲講乜都唔太重要，大家買左飛入場或者買左碟睇既就最緊要笑字。我對朋友說我好鐘意睇《龍咁威》，就俾人笑足我一個星期話我冇學識話我冇文化話我低俗。邊個話一定要睇王家衛賈樟柯寇比力克先叫做有文化有內涵，呢篇文既目的就想故作高深咁講下《心想事成》。

電影裏面鄭中基係一個有法力既神仙。谷德昭係個人到中年一事無成既男人。老婆唔理佢。仔女唔理佢。佢當梁家輝係兄弟但人地當佢係契弟。事業無成。公司既下屬都當佢透明。係公司受完氣後番到屋企仲要強作開心。於是鄭中基就俾曬佢既法力谷德昭，效期係一個星期。於是谷德昭就要如常咁番工放工買食送煮飯，不過因為佢有左法力，於是就要乜有乜，心想事成，事事順景。不過，最後佢老婆都係想跟人走佬。大家覺唔覺呢個故事有少少似占基利既《衰鬼上帝》，占基利一樣係擁有要乜有乜既能力，分別係占基利用佢既神力去搞事同報復但谷德昭只係用黎幫人。《衰》片裏面講就算有神力都唔能夠自把自為，如果真係事事如占基利所願的發生 就會大檸樂就會世界大亂。而《好》片裏面，鄭中基雖為神仙，但仍然處處受到限制，例如佢其實有個老頂叫玉皇大帝，雖為神仙，做野仍要按規矩做事。兩套戲既主角去到最後都係唔用神力，而靠自己既方法去打動人。《心想事成》可謂跟《衰鬼上帝》一脈相承。兩套電影都在說，與其奢求外在力量去改變現狀，倒不如自己 加倍努力。

其實以上既都唔係咩高深既分析，問題係點解《衰鬼上帝》當年可以引起咁多既討論，但係主旨相近既《心想事成》就會俾人列為硬膠片？我承認鄭中基既電影功力還有待改進，但都無法解釋主流論述裏面對兩套戲上天下地既落差既評語。翻閱近來的報章評論，《心》片的影評幾乎缺席，跟《衰》片實無可比擬。而家既問題唔係佢既電影受太多批評，而係主流論述裏面佢連被評論既資格都未有，人們只一味斥說「硬膠戲」就把它打入冷宮。鄭中基以前人地叫佢做「太子基」，因為佢老豆係唱片公司高層，人脈廣博。當年佢入行都冇遇過幾大既困難，有後台之餘又有錢，所以佢既努力會冇乜人認同，同時佢既衰野就會俾人記住俾記者無限放大，就算佢成功人地都只會話佢全因老豆幫拖。放番入套戲裏面講，佢既神力放番出黎現實咪就係佢老豆既幫忙囉，佢既神力為佢帶黎左唔少方便，但係，到頭黎，佢都係想唔用神力而靠自己既實力去得到人地既認同人地既愛護。

電影裏面有一段，鄭中基問楊淇鍾意做咩，佢話鍾意跳舞，然後就跳俾鄭中基睇。楊淇跳得好樣衰，動作唔好睇之餘仲跟唔到拍子，問鄭中基有咩評語，佢指住地下話如果呢度係代表成功，楊淇而家既位置係響隔離街街口，鄭中基叫佢要繼續努力，楊淇就好感激佢既鼓勵。其實，呢一場係鄭中基做俾我地睇既，佢都知自己功力有限，距離成功仲好遠好遠既路，佢都係想大家支持佢叫佢繼續努力者。

我覺得鄭中基係想走周星馳條路，起初周星馳既無厘頭文化創左港產片既先河。初時大家都未必知佢做乜，或者都會覺得佢好無聊。但漸漸地，到今時今日，佢成為左國際知名導演，成為左研究香港文化既對象。一個人，做左一些大家唔會做既事，也許大家會覺得低俗，不如試下當佢特登做成咁，唔整古做怪，就開唔到條生路，觀眾就唔會留意到佢，講乜都冇用。標奇立異，先有機會發圍。不如，試下當佢係香港第二個周星馳，呢套戲，我覺得係佢既宣言，佢知道自己唔夠實力，但佢 希望大家可以俾個機會佢繼續努力，想大家比個機會佢，比條生路佢。