生活｜怎麼我竟然說，K歌之王是佢

文：徵明

「聽講Neway買左個盒喎……」
「買盒？咩盒呀？」
「綠盒子，Greenbox呀。」
「！@#$%^&*（?！?！」

（ 感謝讀者提供笑話，將聯絡送上你手中的「中大學生報」一本致謝，如你有笑話，歡迎電郵給我：ming.cusp@gmail.com ）

Er……笑唔出都好正常嘅，收購之後，全香港嘅卡啦OK市場九成以上都係畀Neway壟斷：炒人，預左架喇；以後捱貴K，又預咗架喇。仲要可能唱唔到自己啲飲歌，問你點笑得出？

Neway宣佈收購後無耐，荃灣、淘大GreenBox分店，以及大角嘴K歌站立即收皮；4名經理級管理層遭遣散同埋加州紅創辦人駱國安亦都離任。除此之外，仲有兩名加州紅營運總監被安排放大假，加州紅有啲部門例如酒吧部、音響部、廚房部等主管，都被投閒置散。仲話呀，受影響員工被要求簽紙調職往其他分店工作，唔接受調職者，炒。咁大家都估到啦，裁員精簡實係陸續有嚟。

拿拿拿，請記住，雖然明明係無晒選擇，但市場係唔會錯架！就好似英皇行政總裁吳雨話齋：「無乜壟唔壟斷，任何嘢係商業決定，乜都係雙方而唔會單方」，咁打份工果啲又係同老細雙方唔係單方，幫襯佢又係同間公司雙方唔係單方，加價又係雙方唔係單方，因此一切都好應該。我諗，假如第時Neway學習老麥，「切勿同顧客講加左價！」1，橫掂個新價你啱我又啱，都好應該嘅啫。

吳雨又話：「所以自己要爭氣，歌要做得好，歌做得唔好，十個八個channel都唔會要你，佢哋都要播歌架，做生意唔係鬥氣，都要用。」咁如果我單純只係一個消費者，咩都唔使理，淨係想唱到我要唱嘅歌啫，咁依家仲有爭氣嘅好歌唱，就梗係啱晒我心水啦。之但係，如果我中意唱懷舊啲冷門啲嘅歌，好似台灣呀日本呀歐美呀甚至中東、非洲果啲呢？無架？乜果個「好歌」嘅意思，唔通只係賣得咁解？咁就弊啦，好似小弟同班Friend係Greenbox拉尾果日去唱K，有人想唱下Westlife，點知得果一首喎。合併咗又無足夠競爭嘅話，可能唔使旨意再有齊啲嘅機會添喇。

咁英皇呢間係香港數一數二嘅唱片公司又點睇合併對佢哋嘅影響呢？「當然，得一個channel競爭一定少咗，唱片界事業會辛苦少少，（對你哋有冇影響？）我哋無乜影響，向來加州紅及 Neway兩邊都有播。」啱呀， K歌版稅果啲嘢畢嬲都好麻煩：好似華納唱片同Neway鬧侵權官司咁大鑊嘅話，咁薛凱琪同方大同嘅歌有可能因此無得唱添。唉，諗起無得同薛凱琪相見，心都酸埋。

當然，有人會反駁話，唱K唔係必需品，需求好彈性，貴咪唔唱囉，好似環球唱片高層黃劍濤咁話：「冇得講件事係好定唔好，消費者自己決定」，加價幅度邊會大丫。但係，加價幅度細，唔通就合理咩。好似百佳咁，有時加下有時扮減下，兼且藉住自己係大地主、大資本趕絕小商戶，壟斷市場，最多咪合咗大企業條理，但係都唔公平架－點解要贏者全贏、輸者全輸先？

我知，我明喎：「無乜壟唔壟斷，任何嘢係商業決定，乜都係雙方而唔會單方，所以自己要爭氣；超級市場呀，電費呀，巴士呀果啲都係咁架啦；大家俾得起服務又唔差咪算數啦，公平唔可以當飯食，諗下計搵多啲錢仲實際啦，反乜反物無厘建設……」

不過呢，大家有無諗過我哋嘅手提電話、上網等等通訊費用，係世界上出名平呢？原因就正正係政府提早購回專利權，開放電訊市場所致（某種意義下，呢啲都唔係必需品）。而且，連政府亦都打算要學外國訂立《公平競爭法》，宣稱自己無意干預市場（阻住人收購都唔係干預市場？干預市場又點喎），只係積極維護市場秩序和公平競爭。

就好似好多人都去過嘅台灣，果度嘅卡拉 OK集團錢櫃過去三度要求同另一間大集團好樂迪合併，「結果除首次好樂迪「縮沙」外，其餘兩次申請均被台灣公平交易委員會否決，原因是兩集團合併後佔全台灣卡拉 OK市場一半，並佔台北市場逾九成，形成壟斷局面並損害消費者利益。」可見，對於大企業而言，壟斷總係佢哋想要嘅。因此，《公平競爭法》之必要，就係因為政府只管某啲行業如銀行、電訊，而忽視咗整個市場都需要全面規管－假如市場係為人而非企業服務的話。

但係，條法由消委會係96年嗌到家陣，遲遲都未訂立，睇怕都係要視乎重視商家利益大過天嘅功能組別肯唔肯就範喇。睇下，再日常嘅生活如唱K，都畀佢哋控制住。咁你無理由唔潮撐五區公投，踢走班友掛?

註

1.有圖有真相： http://www.technow.com.hk/wp-content/uploads/2010/03/11.jpg

2.想認識一下公平競爭嘅內容又唔想好似好枯燥咁，可以去教育城同勞工局整嘅公平競爭小遊戲－《競爭先鋒》玩下　網址：http://cpolicy.hkedcity.net/

3.延伸閱讀：香港社會民主基金會《香港為何需要公平競爭法？》 http://www.sktsang.com/ArchiveII/CompetitionLaw.pdf