中國加油！——京奧真係好悶

{mosimage} 

文︰F.A

奧運開幕式中代唱與一早拍定的腳印一旦講完，就發現真係一切都是如此 forgettable。無疑運動員忘情的演出確實真金白銀，偶然的短兵相接又令人心跳加速——像異化工作一般輕鬆的八金菲比斯令人冷靜，巴西女足飲恨美國令人扼腕，馬琳在單打決賽終有所成令人激動，甚至回味他所有跟我們共同渡過的失敗、四年前他外祖父過身的悲情……但想到他們的努力不過是與國家機器互相支援的一部分，就馬上精神分裂，然後被種種有「中國特色」、北京獨具的奧運冷水一次潑醒。

電視主持變了文盲只認得共產黨的紅色，——高禮澤李靜俾南韓仔攻足五局飲恨鍾仔都仲話「好詫異」——，一切加油都要循規蹈距，旗幟要明確單元線性關事，你向西班牙柴台冇得渣住加泰隆尼亞標記。陳巧文被差佬肆無忌憚胸襲，雷玉蓮據稱俾人扯到 bra 都甩埋，北京示威區離場館二萬里仲要申請、駁回申請、軟禁或拘控申請者，劉翔傷出比七月飛霜還要難以置信，古巨基感同身受……真係唔該晒，仲話自己搞緊奧運——小學生田徑會有佢咁低能都冇佢咁賤格啦。如果我搞「監奧會」，一定第一時間吹雞，unsporting behavior（不君子行為），俾張紅牌北京，直接驅逐離場。

市面上靜靜的，有人時運高乜都見唔到，有人排隊買奧運紀念品，搶飛入場睇郭晶晶同容祖兒唱歌，有人高速避開電視節目，以免悶死當場。失語的預敘延綿七年，今天終於到達焦躁龜裂的反高潮。