回到現實

二十歲，
仲差一年就大學畢業，揹住廿萬grant loan債，人工得 9k ，仲要交半成人工供強積金，輪公屋要等十年，買私樓又買唔起。

三十歲，
人工升到 18k ，失去公屋申請資格，排到半路俾政府踢出條隊。強醫金立咗法，加埋強積金冇咗一成人工。
為結婚死死地氣買間五百呎新樓，交完首期已經乾塘，仲要月供一皮。
餐餐捱飯盒，唔敢生仔，惟有日日咒新移民拎綜援就生仔冇屎忽
——雖然你明知自己交嘅稅連還足自己大中小學教育高成本都未必夠，根本擠唔到錢俾綜援其他人。

四十歲，
你同你老公／老婆人工加埋 50k ，不過柴米油鹽同廿年前比貴咗成倍，午餐肉一罐廿蚊，買菜十蚊得半斤，因為大陸沿海搞商業，內陸搞工業，冇人搞農業。
樓未供完，生咗個仔，奶粉錢尿片錢學費樣樣要儲，老竇老母一個糖尿病一個高血壓，又要俾錢送佢地入安老院。

五十歲，
卒之供完層樓，諗住舒舒服服，點知公司嫌你老，裁員。
你搵唔返本行做，走去做看更，人工由 30k 跌到 6k 。
個仔小學未讀完，仲有排未出身，你就日捱夜捱，兼且去讀再培訓。

六十歲，
風濕骨痛，巡七十層樓巡到膝頭打鼓，你知自己做看更做唔到幾耐，但一唔做就要執紙皮兼拎綜援。
搏命捱多五年就可以拎強積金，不過搣唔到幾耐。
層樓舊咗，成日有發展商話要拆樓搞重建，政府十年前已經修例，樓齡卅年以上就可以強制收樓，冇得say no，到時你都唔知可以住邊樹。

你惟有寄望個仔。
這一年，佢二十歲……
********************************************************************************

放下手上的小書，你回到的就是這樣的現實。
八九六四，中國人民為他們身處的現實而站起、呼喚、反抗。
你有屬於你的現實，
你也有屬於你的站起、呼喚、
反抗。
或者，
也可以閉上眼睛等死，
也可以跟境遇相同的人爭吃有限
的幸福。
放下手上的小書，
你回到你不能迴避的選擇。
現實是不能迴避的。