上莊為左乜? 迎新特刊2011 文:李好 (摘自九七年迎新特刊《新鮮人》) 「喂!你上咗乜嘢莊呀!」遇上一齊升上大學嘅朋友都會互相問吓,好似個莊就係自己第二張大學身分証(第一張係學系)。喺自己向朋友介紹緊個莊時,正所謂「啞子吃黃蓮」,除咗個莊背後啲慘嘢會搞到自己百感交集,自己內心深處梗有個問題——上莊為咗乜? 有人會覺得上莊係一種時尚,有人會覺得上莊係一種「義務」。基本上,宜家啲大學生上莊係為咗七大目的,我諗唔到有第八種,亦都唔想諗,因為絕大部分人根本達唔到呢啲目的,費事大家睇到第八種會喊咗出嚟。等我慢慢數過你聽呢七宗罪,排名自己去分啦! 第一,服務他人。呢種力拔山河嘅精神係好,不過當遇到一大堆沉重莊務,你就會好懷疑自己喺傾莊時究竟係飲大咗定唔夠瞓,更懊悔自己嘅慷慨行為——上莊。喺大學差唔多個個莊都叫「服務他人」,例如系會、宿生會、興趣學會同學生會等,年中搞吓聚餐、聯誼、展覽、出版、講座、交流團,做到死就必然嘅,最慘就係無人賞識(無人得到「服務」),自己就剩低一堆落寞感覺。好多人就係抵受唔到現實社會中呢啲「默默耕耘」嘅工作操守,捱到喊,何苦呢? 第二,為學嘢。老實講,學唔學到嘢就睇人嘅,學到乜就睇個莊嘅。睇人除咗睇自己,更要睇一齊合作嘅人。自己懶唔使講一定學唔到嘢,自己努力其他人頹你就得個「做」字,學講是非就有份。睇個莊嘅,好多情況就係做決策、計劃同創作嘅「學嘢」工作,只佔莊務嘅一小PART,大部分時間都係做到嘔嘅,譬如整Banner、整鎖匙扣、派傳單、入信封……多到數唔晒嘅酷刑。最後大家都會變成一班抱住學嘢心態嘅受刑者。 第三,為咗識多啲人。無論係為對日後事業有幫助定係為友誼,上莊都可以幫你達到識人嘅目的。不過,你識到乜嘢人先至係最重要嘅問題。一大堆Hi-bye friend同你打招呼,多到連名都唔記得,咁只會令你覺得人同人之間更加假、更加疏離。另外,如果識到啲衰人(壞人就可以報警拉佢,衰人就要忍),做嘢卸膊,攞采攞威就走出嚟,咁識都無謂啦!好多人大學畢業時,都只得三兩知己,認真熟嘅朋友唔會多得去邊。假若上莊之後無晒時間同朋友傾心事,咁請小心嗰三兩知己都無埋。 第四,攞宿分。大學宿舍係好多走讀生夢寐以求嘅地方,上莊有宿分仲唔撲去做!但係,靠上莊砌夠分嘅人又有幾多有好收場呢?為咗完成沉重嘅莊務,又要捱通宵、周圍撲,好多嘢身不由己。搞議會例如代表會就最慘烈,少則坐四個鐘,多則無可估量。有啲人以為好醒,攞咗宿分可以唔做嘢,但言論開放嘅社會係好公平,啲咁嘅人將會受到無情嘅「是非釘」狂插,再慘烈啲就俾人寫大字報、刊物「唱衰」、聲討大會勁炳等。如果無所謂嘅可以試吓鋌而走險嘅。 第五,為名為利。上咗莊,係會多咗人識自己,但係大學裏面有幾多個人可以全校嘅人都識呢?瞓晒身都無人理又點樣「為名」呢?有人或者會著重畢業証書上嘅「名」,話可以幫到自己搵工喎。不過,諗真如果自己為咗日後搵工而上莊,攬到GPA跌咗,條搵工路數咪又係咁。為利嘅仲傻仔,係咪想虧空公款先?上得莊嘅,好多時要自己「科水」駛錢,為利嘅人不如撈多幾份兼職。雖然,上莊唔多唔少可以滿足到自己嘅虛榮心,覺得自己有個銜頭,但係無心機做嘅人好快會覺得被人「昆」咗,以之上一手嘅人「老點」自己上莊。到咗嗰陣時,就真係有排捱喇! 第六,為尋開心。呢樣嘢睇嚟好視乎個人係點。同人要合拍之餘,自己更要抵得辛苦。其實要開心,唔使揀上莊,要玩點解唔同啲朋友去遊山玩水,吃喝玩樂呢?搞莊好多時都要諗爆腦並且谷氣嬲餐飽,要得到「開心」唔係易事。搞學生會更厲害,樣樣都要傾,傾莊都要幾個月,有時又會遇到好多思想衝突,簡直就係人間煉獄。搞莊開心嘅人開心係幸運,痛苦係必然嘅。 第七,為拍拖。好多單身嘅同學上莊唔多唔少都寄望吓喺個莊度搵番個親密異性朋友,不過大部分都未能如願。除咗要睇吓緣份,仲要小心其他莊員俾自己壓力甚至競爭。唉,一旦搞掂咗仲慘,地下情就肯定辛苦死,堂堂正正又驚影響個莊嘅士氣。所以為拍拖而上莊都唔係幾化算。 噏咗咁耐,係咪以為我喺度呼籲大家唔好上莊呢?錯喇,其實我係想各位喺上莊前好好計劃定,唔好上咗先至後悔。宜家嘅大學生唔好睇上莊係一個包袱,實際上唔上莊絕對唔係「摺」,上咗莊先頹就唔好啦!有時見啲朋友攪莊搞到發脾氣、嗌晒救命,我會問佢哋,乜你無諗清楚先上莊嘅咩?大學生上莊無論為咗乜嘢目的,都應該以興趣同理由為先,好似揀學系咁,傾莊亦都要詳細啲。宜家好多莊傾兩次就搞掂,好容易做成一時衝動嘅慘案。想搞莊嘅同學唔好貪上得多莊,最好一個起兩個止,搞得好先至有人欣賞! 分享至: Leave a Reply Cancel ReplyYour email address will not be published.CommentName* Email* Website 在瀏覽器中儲存顯示名稱、電子郵件地址及個人網站網址,以供下次發佈留言時使用。 七 + 一 = Δ