校外交通手冊

文：檎檎青

第一次入中文大學，搭嘅係火車（而家叫港鐵）。由於住晌大型屋苑，有天橋同港鐵站接駁，變相比港鐵公司控制晒我出出入入的路線，甚至我見到咩鋪頭都係佢話事。住左入中大宿舍，冇屋企人催我訓覺，開始成日三兩知己外出夜遊，近近地去火炭禾輋食宵夜，遠嘅話就出去旺角銅鑼灣食飯，再去番尖東海旁吹水。晌火炭就話一齊搭的士，都係每人十蚊唔使。但一去遠少少，趕唔到尾班車初初都好傍徨。但諗真少少，番夜班嘅人、夜蒲嘅人都要搭車掛，冇理由全世界都係搭地鐵啫。

港鐵公司控制左嘅，唔單止係出入路線，甚至乎影響埋日常生活習慣，同對香港呢個城市嘅理解。想買衫行街，點解一定去又一城同新城市廣場？想買餸，點解一定係去商場入面嘅超級市場？銅鑼灣除左時代廣場同崇光之外，你仲諗起咩？冇港鐵接駁嘅地方，竟然會神不知鬼不覺從腦海中消失。

趕唔到火車尾班車，其實仲有好多交通工具可以搭。甚至係日頭有港鐵嘅時間，都可以離開港鐵，搭下小巴、巴士，甚至行下路，用眼睛同雙腳去認識番你居住嘅地方。除左超級市場，仲有街市同埋「墟」可以買餸同生活用品架。香港細，但絕對闊過港鐵路線圖。

雖然搭唔到尾班車仲有多多選擇，但可能你都仲會有少少徬徨——睇埋下面嘅貼士就實ok了。

如果我在尾班車之後的時間才回中大，那可以如何做？
文：Delifrance

校巴尾班車到火車站尾班車之間（11:25pm-12:40pm）：
這段時間可以有幾個不同的選擇，除了行上山外，十二點前還可以選擇在火車站坐的士上來，經科學園（東閘）入，大約三十元一定到中大任何一個地方，但十二點後就會變成五十元了，因為東閘close了，的士要行大埔公路入，所以學生會現在還爭取緊延長科學園入口開放時間到一點，配合火車時間表，當然亦有同學要求校巴的服務時間要配合火車站的服務時間，而學生會亦會在開學後舉行第二輪收集同學意見的行動，大家踴躍表達啦。

火車站尾班車之後（12:40pm後）：
這段時間沒有火車到中大，但還有兩部紅van到中大，它們分別是在旺角和銅鑼灣開出，都係在大埔公路中大正門（四條柱）落，千萬不要睡著，筆者便是有次同朋友在車上睡著了，去到大埔才下車，要坐番的士番中大，所以在上車時同司機講聲便可以避免這樣情況了。