rm我想跟你說……

編按：九月初，又是大家入宿的時候了。有人說過，一間大學沒有飯堂是不可接受的話，那麼性空間亦是如此。如果中大是我們生活的社區，宿舍便是發生無限生活可能的地方，包括性。今期性／別版收到兩封同學寫給未來室友的信。一攣一直，曾受的經歷不盡然相同：有人缺乏與異性獨處的空間，希望有宿舍與女伴維繫感情，卻不敢與室友溝通。亦有受制於主流性／別觀念的性小眾，在宿舍的深櫃當中掩藏自己。當中的壓迫，未知你我能否完全身同感受。

喂死仔：

估唔到今年可以同你住埋同一間房！同你識咗成年，仲要讀埋同一個major，真係好有緣！希望嚟緊有咩科一齊讀，可以part pro關照下小弟。今次寫呢封信，其實係想同你講我去年住宿的嘅經歷。同埋，大家識咗咁耐，我想同你講一個我自己嘅小秘密。不過無論如何，都請你唔好講出去。

唔知由year one ocamp識到而家，你有無發現，我同好多同系嘅男仔有啲唔同？嗯……或者咁講啦，上次落堂你哋成班人圍埋J嗰個IG女神嗰時，我好似冇乜興趣，哈哈。仲有，成班人一齊嗰時，你哋問我做咩成日掛住覆WhatsApp，係咪出咗pool，我都有啲支吾以對。不過最後，我都仍然鼓起勇氣寫呢封信畀你，係因為我記得sem 2個時，我哋reg埋同一科GE，個時你話自己唔介意有同志嘅朋友。又話自己中學個陣，好幾個死黨都係member嚟。我就諗，如果我同你come out，你係咪會接受到呢？

其實，我舊年已經住過宿。不過，我無喺宿舍come out，亦都唔敢。一來我唔知前室友會唔會接受到，廢事成年尷尷尬尬。二來，佢好似同宿生會啲莊員好熟，我擔心一傳十，十傳百，好快就會成層都知道。我試過有個師兄試過裝Grindr溝仔，點知隔離房故意用app搭佢訕，最後佢係gay呢件事搞到成層都知。後來，佢嘅同房會走去隔離房屈蛇避開佢。啲人係廁所見到佢，又會驚死比佢睇蝕咁。又會有人「擔心」我師兄「愛」上咗佢。最後，佢比人笑到quit埋宿……

經過上面嘅考慮，思前想後，我都係唔夠膽出櫃。但問題係，我都要地方拍拖架。可惜，平時我同男朋友都唔太敢喺大庭廣眾拖手，公開場合行埋啲都驚。有時想同佢搵個地方依偎親熱一吓，唔洗太理其他人目光，就唯有匿喺宿舍入面。

不過，前室友同我一樣，都好鍾意喺房到hea。有啲中大學生可以一個月唔離開校園都會生存到，而我同室友都係嗰一類學生。所以我想帶佢上嚟都好麻煩。最後，我只好試下旁敲側撃，令到前室友貼張timetable出嚟，照住前室友的上堂時間叫男朋友上嚟。不過，因為我太驚比人知道我係攣，我會問清楚前室友Tutorial、Test、上lab的時間，怕佢隨時返房。仲有仲有，我仲會問埋佢係咪堂堂都要上，驚佢professor原來請咗假，前室友會突然撞破我哋。所以，好多時候就算前室友唔喺房，我都唔夠膽約男朋友上嚟。有時就算夾到時間，我哋都會提心吊膽。

我諗，如果舊年我同前室友可以開心見誠咁傾一次，可能好好多。

終於講哂我想講嘅野。我一邊寫，一邊好緊張。唔知你睇到封信會點呢？我希望，我哋可以開心見誠討論呢樣野。就算你接受唔到都好，都請求你同我保守呢個秘密。

你細Omate

Calvin：

你好啊！好開心今年可以同你再夾宿，突然收到呢封信，你可能會覺得好唐突。可能會奇怪平時怕醜，又唔鍾意講野嘅我，點解會無啦寫封信比你。但呢封信其實係我一啲面對面難以啟齒嘅自白。希望你會耐心聽一聽。

其實，我一 直好想問：你會唔會……會唔會介意我帶人番房訓？

──我意思係我女朋友。

如果我話我帶佢上嚟訓，純粹係想同佢相處耐啲，你會唔會信？你可能會覺得平時仲相處唔夠咩？但係由於不同的原因，的確唔夠。譬如因為唔同系，我同佢喺平時上堂已經各有各痛苦，而我自己又係一啲chur系經常要上到6點幾。我同佢嘅家境都唔好，放學之後都要補習，星期六日又係補習，然後又要各自番屋企交人。平時好難先約到一餐飯，好多時只好喺10點幾嘅時候先喺中大見一見，傾下計，然後我就番宿佢番屋企。我真係好驚，好驚我地會就淡咗，想同佢有多啲獨處嘅時間。而且只有兩個人獨處同平時行街、睇戲真係好唔同，譬如可以有啲親暱啲嘅接觸、傾啲私密啲嘅計，所以我先想帶佢上宿，

其實，呢啲咁私密嘢唔係咁易開口。但係上年嘅經驗，令到我覺得如果再同你夾宿，一定要傾下。仲記得我第一次帶佢上嚟，係因為有一日補完習，佢陪我一齊由大圍搭車番中大。到咗大學站，佢話想陪多我一陣，於是我地慢慢行上知行樓。我突登放慢腳步，兜遠路。原本半個鐘的上山路，夾硬俾我行咗一個鐘。不過，路此終會行完。來到宿舍前，我地仍然唔想放手。諗咗一諗，因為未過探訪時間，我地就咁入咗去。入到房，你呆咗咁望住我地。當時我諗係咪應該介紹一下呢？好似要講啲嘢緩和下氣氛？但係我最後都冇做到，都唔知點開口先好。你又冇問啲咩，望咗一陣，就走咗出去，成晚都冇番黎。之後你話去咗夜讀室睇咗一晚書。我個心跌一跌：都我係唔好啦，好似阻住咗你訓覺。諗真，就算冇阻住你訓，有時佢沖完涼出嚟，成棟（應該）得佢一個女仔，大家都有啲尷尬。我仲要唔係帶一次半次，而你每次都好識做咁出咗去。搞到你，其實，真係好唔好意思。

我都知咁樣阻到你係我唔啱，我亦明白你有俾宿費，要你行開係好唔合理。都唔係冇諗過開房，但係一晚就已經分分鐘四五嚿水，真係唔係好俾得起。所以，我地真係好需要宿舍呢個空間。可惜嘅係，我地對呢件事，始終冇發生任何溝通。我成日都諗，如果我地可夾下時間，你唔番宿嗰陣，先帶女朋友上嚟。好過宜家，預先通知聲都冇，次次都搞到你突然要走開。你就唔方便，我就心入面唔係好舒服。

雖然明白呢啲事面對面講會好尷尬，亦都明白要有人踏出第一步。所以，我先會將自己嘅難處、尷尬和盤托出。希望你會體諒。

但係，點都好，我期待住我同你嘅宿舍生活。

KH

21-08-2016 0116

PS：你之前咪話想一齊煮蒜油意粉嘅，幾時得閒整啊？我就今個禮拜四、五都ok。

對於宿舍的性／別問題，兩封信都不約而同地指向私下的解決方法。但是，我們知道私下的溝通未必能夠解決所有的問題。例如，如果KH的室友難以接受與異性共處一室，這不是溝通便可解決。同志讀者便是面對更大的溝通障礙，因為出櫃使他們蒙受極大風險。所以我們想叩問的是，我們在溝通外，有沒有更好的方法，從制度上讓同學有一個更性／別友善的宿舍空間?