《全民開講》畏首畏尾講完又抽起

{mosimage}

文：奇翼鳥

八月三日晚，無線生活台《全民開講》搬左個場到旺角西洋菜街行人專用區，題目為「瘋狂搜身，全民點講？」。

不過唔係無線搞既。

點解《全民開講》個「台」會set嚮街頭而不在錄影廠？話說七月尾時，《全民開講》既負責人以「警察濫權」及剛修訂既「搜身指示」為題材，邀請左兩位於上年十月抗議市建局清拆利東街時被要求脫衣搜身既朋友，以及何國良、游清源與涂謹申作嘉賓，而香港警察公共關係科則沒有代表應邀出席。

本來節目應該嚮七月廿四日播出，但就唔知點解被抽起。當日有份出席既受害人事後詢問節目編導，編導解釋話因為「聲音錄得唔好」，所以無播出。由於希望事件被更多既香港市民關注，兩位被搜身的朋友均表示願意到錄影廠補拍，但編導卻說自己話唔到事，要等開會同監製和導演商量。點知幾日後，佢又話開會無討論過這事，補拍的事情就此作罷。

由於那位編導的解釋實在太過牽強（有資深收音師表示從未聽過事後才知道錄音失敗的例子），跟進方面又左閃右避，無法不令人懷疑影片被抽起係無線政治自我審查既結果。

《全民開講》除了sell所謂「熱門民生話題」，其最大賣點為懶開放、大膽，每集都會請唔同立場既嘉賓一齊討論，叫做有D相對進步既觀點出到黎，於無線製作黎講實算難得。今次講完又收起，可以話係自拆招牌，扮進步的姿態顯露無遺。

既然作為主流傳媒既無線無法負起其應有責任，「全民開講」又有名無實，一班關注警權濫用既市民就組成左「民權行動組」，邀請原來既主持邵家臻同嘉賓，嚮鬧市舉行一次真正既「全民開講」，與街上市民一齊討論警權，仲以「全民點講」黎諷刺無線既自我審查。

當日有不少市民駐足觀看整場論壇，同一向慣於獵奇式望兩望影張相就走既菜街行人顯著不同。另外，除左「台上」既講者，連「台下」既市民亦爭相發言，大講自己被警察恃權無理對待既經歷，可見警權問題與市民貼身，而且備受關注。

事件公開之後，引起左其他傳媒既注意，向無線施加壓力。無線應明報詢問時，係咁強調無線內部絕對無政治審查，亦從未受警方施壓，而《全》既節目監製亦立即轉?表示之後一定會俾果集出街——不過就唔知幾時喇。