文藝︳【影評】外人/《機動部隊-同袍》 文藝, 09年2月號 羅永昌:《機動部隊-同袍》主演:任達華 邵美琪 林雪90分鐘/粵語 文﹕黃衍仁 間唔中會去遊行示威嘅我,都算遇過唔少差人,經過無數次嘅爭執碰撞理論講數,甚至被鬆掙郁手拘捕小老母之後,我都嘗試同自已講,差人都係人,唔係個個都咁差嘅,不過佢地手執重權又有炮,比普通人多啲機會發癲啫,咁但係我又會諗,點解咁大壓力又有咁多人去當差呢?呀……可能佢地有好悲慘嘅身世呢,又欠缺自信又壓抑又剩咁呢,所以咪喺差館強姦人呀,俾啲示威者掂下就訓低入院呀咁囉。我講下架咋。其實我點會明丫。我都係得閒睇啲港產警匪片嚟緩衝下啲憤恨架咋。 銀河影像羅永昌拍嘅呢套機動部隊-同袍,雖則無講明係PTU嘅續集,但係扣連處處,好難令觀眾唔並置對讀,PTU係警隊各部門嘅暗夜潛規則較勁,同袍就簡單明確得多,兩隊鬥氣Team臨散前要合作辦單大案,日光日白上山捉賊,互相猜忌危機四伏皆自招,係人情世故多過真正嘅權力拉扯,唔知係唔係因為要拍嚟賣俾電視台,故仔要講得白啲,結果係忽然齊心立即事成,輕輕鬆鬆無事收工,羅永昌都係羅永昌,無番咁上下圓滑點能夠跟住杜sir(出名燥底)咁多年,就算商業電影點樣公式計算都好啦,乜野人都係會拍返乜野戲嘅。咁點解拍開城市小品嘅羅又會走去拍警匪片呢,其實嚴格嚟講PTU同呢部同袍都己經好難歸類為警匪片了,匪是大配角,大賊為錢打劫殺人一句講完,警察龍蛇混雜各懷鬼胎卻又着埋同一件制服,呢下先至出奇,就係呢種好奇令警察嘅故事可以長拍長有,個個導演都要試吓,而今時今日喺香港越來越誇張嘅警權問題,無形中已經將八九十年代港產片建構嘅警察英雄形像衝散,羅選擇拍警隊內部矛盾,你可以話係食住銀河影像PTU嘅品牌,亦可以話係一種回應社會氣氛嘅做法。 PTU入面警察狂打人,真實得太得人驚,同袍入面警察冇下下打人咁惡,但入面嘅警民關係都真係十分之有代表性,第一場兩隊鬥氣小隊一出場嘅第一單任務就將一位行緊街外貌普通毫不可疑嘅中國籍男子玩到tumtum轉,鬥氣Team A任達華小隊無所事事首先上前一,查完身份証覺無可疑,放走,點知街口殺出Team B邵美琪小隊見狀卻玩野一手截住該名男子再,無辜嘅市民被兩步一卻面目模糊,警察亦唔好意思都冇句,呢種狀態都一樣真實得太得人驚,同袍入面仲有一個幾有見地嘅橋段,就係班PTU係揾緊悍匪嘅期間發現左個疑似非法入境者嘅竇口,左抄右抄仲攞埋人地唯一值錢嘅銀包,個疑似非法入境者梗係死命要攞返啦,最後為左個銀包個警察亦差啲俾悍匪做低,呢個設計就說明到其實為求達成任務忽視「人」嘅警隊操作先係最大嘅危險。結局係急就章嘅士氣重整同互相釋疑,最後仲懶friend咁唱歌收工,好鬼老套,不過套戲唔覺意提醒左我地嘅係,警察之間可以為左個團隊為左個任務,意識到大家係自已人,而本來警隊嘅最終服務對象--市民就只能夠唔該借歪差人做野,樣衰少少嘅就係潛在罪犯計時炸彈。同袍嘅另一個意思係,我地,永遠都係外人。 分享至: Leave a Reply Cancel ReplyYour email address will not be published.CommentName* Email* Website 在瀏覽器中儲存顯示名稱、電子郵件地址及個人網站網址,以供下次發佈留言時使用。 7 + = 十一 Δ