中大捷徑辭典 2020年迎新特刊, 50屆「深瞳」（20-21）, 實用 原刊於中大學生報 2014 年《迎新特刊》文﹕上山落山上山落山的妹仔 中大咁大，由一個地方去另一個地方都有排行，一個唔覺意仲可能會盪失路。但其實有好多捷徑可以行，等妹仔介紹幾條路過你哋行啦！ 崇基／火車站去本部 路線一：喺 YIA 度搭電梯，一路搭搭搭到去崇基啲宿舍度 ( 文質堂對出嘅空地 )，之後行花圃路 ( 即善衡校巴站後面對下條路 ) 行去蒙民偉工程學大樓。入到去搭電梯㩒 9 樓，一出去行幾步就到本部啦。 路線二：由 YIA 行到何草再行去善衡書院，之後搭五旬節會樓低座部 Lift 去五旬節會樓高座，之後會見到一條梯，行上去就係本部。 本部去聯合 喺本部往圖書館方向行，行到盡頭會見到李兆基樓，搭 Lift 㩒 3 樓，行到去馬路邊之後轉右就會去到聯合校巴站。 本部去新亞 喺本部圖書館出嚟，往煲底方向行到督督，再穿過醫學大樓，就會見到棟蒙民偉大樓（MMW），入去搭 Lift 㩒 7 樓（佢有個標誌會叫你㩒 8 樓，千祈唔好信），行出去就係 NA。 聯合去和聲 行入聯合，右邊會有塊大草地，草地後面就係湯若望宿舍，呢間宿舍左邊隔離有條小路，行過去就係陳震夏宿舍啦。然後喺宿舍入面搭 Lift 搭到最低層，一出去就係和聲宿舍啦。 其實中大嘅捷徑真係數之不盡，尚待你哋去探索。嚟緊喺中大，初頭或者會盪失路，唔知邊度打邊度，甚至想去本部但去咗 39 區，但慢慢行行下就識路㗎啦。（利申：路痴） 分享至:
