學生報⋯食得㗎？

訪、文：TF

無錯，係食得嘅，無論係物理上（其實咪又係紙，多咗啲墨咁啫╮ ( ╯ _ ╰ ) ╭，（細聲）唔好真係食）定精神上（係好好嘅精神食糧嚟 d(`･ ∀ ･)b）。學生報定期出版刊物，寫出不同文章，帶領讀者思考不同問題，透過討論將問題再一一分析。但實際上學生報是如何出版？每一本刊物背後又有甚麼工作？我們嘗試去解答對於報社不同的問題。

學生報係個點嘅地方？

T：學生報係一個可以學到好多嘢嘅地方，呢啲嘢唔會好死板，好似寫係書上面嘅嘢咁。喺成個出版過程中一直學緊新嘅知識，與唔同人討論，引起各種思考。

由傾莊到落莊，無時無刻都對唔同嘅事去討論、爭辯：傾政綱嘅時候會「拗」係咪應該喺呢個時勢講性／別議題呢啲「輕鬆」嘅議題；寫四月號〈寵物的道德〉嗰陣 會「拗」養寵物到底係咪一個道德行為；六四嘅意義對於我哋呢一代究竟係乜，點解係出《八九民運特刊》而唔係《雨傘／反修例／抗爭特刊》，甚至對於呢一篇嘅回答係點。其實每一次都係會「拗」到大家可以有個大致共識先可以繼續做到嘢，少則幾個鐘，多則⋯⋯唔好提啦（編輯 G：好似冇試過幾個鐘拗得掂囉。編輯 D：次次都拗到迷失自我、精神崩潰咁喎，一次攪唔掂下次仲要繼續。）。從實際「拗」到根本；從根本「拗」到原則；再由原則「拗」返去實際。始終每一個人都會有唔同睇法同立場，但「拗」嘅過程往往都會令到每個編輯睇到、諗到嘅嘢多咗好多，令到自己嘅思想更加完整，亦都係一個檢視自己嘅過程。同時，報社亦都會令人成長，因為佢會畀咗一份責任自己。定咗個出版計劃、出版進度，要好實際咁跟往做，先可以做到政綱上承諾咗要做到嘅野；而喺出版上，寫文嘅時候都要對得住自己，對得住受訪者，咁先可以畀到讀者睇到我哋想帶出嘅信息，所以呢份責任感係令自己成長好重要嘅野。

報社嘅工作係點？

T：報社以出版刊物為主，每次出版流程約一至兩個月。由稿題會（交流唔同編輯嘅諗法）、傾文章大綱、落筆去寫、過文（檢視每篇文章論點、結構、句式，一般會有三次過文，但唔好彩嘅話會有四五六七⋯⋯過），再到排版、校對（檢查排版上有冇出現問題，亦有「三印九校」之稱）、送印、發行，每一個工作都需要一定時間，而每次都會有一個出版時間表（然而 Schedule 就係用嚟拖同埋挑戰統籌嘅底線 XD），限制每一個步驟要用嘅時間，避免趕唔上出版日期。學生報大約每兩個月出版一次常刊，當中範疇由社會、校園、國際到文藝、性／別都會觸及，另外亦有一如以往喺 6 月 4 日出版嘅《八九民運特刊》，以及出版《迎新特刊》向新生介紹中大的不同資訊，亦可能會有不同號外和其他特刊。另外，除咗出版，我哋都會喺社交平台上發佈即時新聞，包括社會事件以及校園事件。

點解仲要做即時？

T：的確，學生報只係專注喺出版刊物就得，但作為媒體，我哋希望去報導唔同嘅事。而作為一個校園媒體，喺一個冇資金考量、編採相對自由嘅情況下，我哋可以去報導一啲所謂「新聞價值比較『低』」嘅新聞，例如係 CIC 絕食行動、校園外判清潔工等等，我哋會更加希望向同學，甚至社會上報導，究竟依家發生緊啲乜嘢事。所以作為媒體，我哋有呢個能力去監察，亦都有呢個必要去監察，就好似喺啲衝突場面採訪咁，無論係幾辛苦，或者已經有幾多人做緊，我哋都會繼續做，繼續做作為監察者嘅角色。

點解要寫學生報？寫嚟又係畀邊個睇？

T：學生報主要為中大同學而出版，因為始終學生報嘅資源係來自同學所交嘅學生會會費，所以主要對象一定係中大同學。但同時，中大入面嘅職員、其他院校嘅學生，甚至係社會人士都會係我哋嘅對象，就好似你睇緊呢本入面「血汗」，同埋《八九民運特刊》入面嘅〈訪朱耀明牧師〉。刊物入面嘅文章唔單只係編輯想寫所以去寫，係希望透過呢啲文章，去批判、去令讀者思考，去反思喺社會甚至喺校園發生嘅事，令讀者都敢於發表自己嘅觀點，並帶起討論。就好似四月號入面有一篇寫港人遊港，呢個議題係當時睇落睇完全可以唔提及，但編輯會認為，喺嗰時提起港人遊港，可以加深「香港人」呢種身份，同時可以避免到香港再出現 2003 年沙士之後嘅糖衣毒藥。

學生報同電台其實有咩分別？

T：其實學生報同電台係兩樣嘢。雖然大家都係校媒，但係做嘅嘢其實好唔同：學生報以出版實體刊物為主；而電台會係以社交平台發佈。內容上，學生報嘅文章範圍比較廣，而內容上亦會較為批判性，嘗試帶出唔同議題中較為深入嘅論述，而電台則較為資訊性。大家會覺得我哋好似，可能只係因為上年嘅社會事件，兩邊都有出去做即時。甚至到依家嘅即時新聞上面，學生報同電台都採取緊唔同嘅方針，所以兩者根本上好唔同，一開始就唔需要去比較，而兩者其實各有優處，大家不妨可以關注哂。

對於客觀、中立有咩睇法？

T：一般都會認為中立即係唔偏幫任何一方，客觀即係基於事實而唔係主觀情感。而客觀中立會係作為媒體嘅操守，唔應該加入任何個人判斷，將所擁有的資訊呈現畀讀者，等讀者自行判斷，但我哋呢一屆學生報唔係完全同意。我哋認為客觀中立嘅標準唔一定會帶嚟最公正持平嘅報道。社會仍然存在權力不均嘅問題，忽略權貴可以掌握住改變社會問題嘅權力同資源。喺編採上，報導邊啲新聞，剪裁採訪啲咩部分，已經無意涉及一啲價值判斷，所以我哋認為媒體唔可能完全中立，我哋亦無意喺文字上掩飾編輯的立場取向。

國安法嘅影響係乜？

T：老實講，影響就一定會有，但幾多就真係唔知。常刊入面恆常版面有社會版，當中不時有文章會批評政府，甚至希望帶出一啲獨特觀點，好似四月號有關於財政預算同埋港人遊港嘅文章，同時亦有每一年都會喺六四當日發行嘅《八九民運特刊》。但呢啲刊物或者文章，只要一日未有問題嘅情況下，之後嘅刊物都會繼續有呢類型嘅文章。雖然係會怕，因為到底條紅線到邊，甚至可唔可以學術地討論香港民族都會成疑，但唯一肯定嘅，就係會繼續盡力做、盡力寫，喺呢個可能係僅存可以用文字發聲嘅地方，繼續發聲落去。

學生報同讀者嘅關係點樣？

T：我哋認為學生報同讀者應該係一個雙向嘅關係，除咗學生報寫文畀讀者睇之外，我哋亦希望可以同讀者有更多交流嘅機會，讀者可以畀到唔同嘅建議我哋，甚至如果對我哋嘅文章有啲意見，亦都非常樂意讀者可以透過 Facebook、Instagram 甚或 Email 同我哋交流、討論下。我哋每一期都會有投稿，希望同學可以寫出佢哋想寫嘅文章，以文會友。同時我哋《迎新特刊》亦有出版英文版本，希望可以同非本地生接觸，等佢哋都可以對中大有更多的認識。不過因應社會事件及疫情關係，比較難喺校園同大家見面，所以依家我哋同讀者嘅關係的確比較疏遠，但我哋亦都會期望未來可以同讀者有更多交流嘅機會。

有咩想同 Freshman 講？

T：大學可能係玩得最開心嘅四年；可能係最辛苦嘅四年；甚至可能係最無助，最唔知自己做緊啲咩嘅四年，其實都冇所謂，因為 100 個人讀大學有 100 種理由，有 100 種體驗。但請好好記往喺呢度嘅每一個時光，因為你唔會經歷第二次，所以如果想可以豐富下你嘅體驗，不妨嚟到范記 307，相信會令你畢生難忘。