摺讀生生存指南

文：無心生

過三？唔過二？爆四？無論你開 SEM 利是收到（或者派咗）幾多錢都好，作為一個正式錄取嘅中大學生，總會有 Mid-term、Final 迫使大家放下屠刀，專心摺讀。所謂「天時地利人和」，如果你正惆悵緊揾唔到適合自己嘅地方摺讀，不妨參考吓以下地點~

圖書館

大學圖書館 #ulib

 @百萬大道

• 位於大學本部，附近有大量巴士站比各位穿梭到各個班房、Lecture Hall 上堂

• 座位多，亦有唔同種類任君選擇（四人位、單人位、面壁位…）
• 作為最多位嘅圖書館，考試季都係難免坐滿哂人…
• 兩個人以上嘅話可以 book 房，係入面可以傾（吹）Group（水）Proj
• 疫情期間有啲 area 好似無開冷氣，偏焗，但恢復面授之後應該會冷氣全開

崇基學院牟思路怡圖書館 #cclib

 @龐萬倫學生中心附近

• 毗鄰黨鐡站同埋崇基門呢兩大出入口，所以入座率長期偏高

• 有極搶手嘅卡位，仲要係梳化凳，舒服到令人想訓教（喂
• 同樣都係有房可以 book，但唔算多（唔知點解圖書館入面有鋼琴房）
• 由於四人位居多，所以假使單人去摺嘅話，又適逢入座高峰期，大機會要搭枱
• 某啲位係四面被書櫃圍住，可能會摺到有啲抑鬱

新亞書院錢穆圖書館 #nalib

@人文館（新傳嗰到）旁

• 眾圖書館之中算係最唔方便去嘅一個（新亞有宿同學同埋係嗰頭上堂嘅同學除外）
• 座位量適中，但一人二人同四人位都係有的
• 中間嗰層無乜窗，摺起上嚟可能會感到少抑鬱 X(
• 有房可以 book，但只有 3 間
• 頂樓好似無咩人識，但其實有 8 個窗邊位可以坐擁吐露港海景！

聯合書院胡忠圖書館 #uclib

@聯合書院個瀑布對面

• 地理位置算高，可達性見仁見智（廢）
• 座位量適中，同樣有齊一、二、四人座位，自摺又得，一齊摺又得，得咗！
• 總共有四層，摺每層嘅感受都幾唔同，一、二樓頗抑鬱，LG 頗 chill
• 有房可以 book，5 間
• 真係太普通，無乜嘢好 comment（嗚）

建築學圖書館 #archilib

@康本國際學術園對面

• 一出黨鐵站就會見到，無論去 1 號定 3、4號巴士站都非常方便
• 座位偏少，但入座率同樣唔高。可能因為佢叫 Archi Lib、亦都可能佢喺錯綜複雜嘅 Archi Building 3 樓你揾佢唔到
• 座位附近一定有一扇大窗，所以天然採光非常優秀（果然 Archi
• 石灰色嘅外牆、木製嘅檯凳書櫃、附上座位旁邊一盞檯燈，工業風之餘不失文青（應該），摺起嚟非常愜意（果然 Archi
• 有一間房可以 book 哦，風景好正~

利國偉法律圖書館 #lawlib

@與大學圖書館相連

• 同大學圖書館基本上係存在喺同一棟建築，但係名義上係兩個唔同設施（亂
• 畫風同隔離嘅大學圖書館都有啲分別，感覺無咁透光
• 座位數量……，如果當係獨立嘅圖書館算偏少，當係大學圖書館嘅延伸嘅話嗰棟嘢係非常多位
• 有房可以 book 的
• 風景就無乜，不過可以當喺四周 chur 讀嘅人係風景嘅 🙂 耳濡目染嘛

李炳醫學圖書館 #mediclib

@威爾斯親王醫院內

• 唔喺中大範圍，所以唔作討論~

非圖書館類摺讀空間

然而，摺圖書館往往有佢唔方便嘅地方：例如要溫 Exam 嘅季節，大家第一時間諗到去嘅地方係圖書館；係圖書館同 friend 講嘢亦會招人白眼。呢個時候，如果你唔需要要齊圖書館嘅設施，只想普通咁摺讀嘅話，或者以下嘅 Common Area 會係一個好選擇！

進學園 #進宿

@大學圖書館 LG1

• 位於大學圖書館底層，未有疫情嘅時候係 24 小時開放
• 有「泉下有知」、「進宿」之美名，為學生讀書寶地，仲可以講嘢（唔好太大聲 lol）
• 設施完備——打印機、電腦、conference room、零食機、嘢飲機、咖啡機等，應有盡有，適合無宿又想係 CU 過夜嘅你（誤
• 座位雖然算多，但入座率同樣好高
• 非常光猛，仲要周圍都係白色系，唔易眼訓

伍何曼原樓 6 樓 #WMY

@CC何草附近

• 大量課室（必修、社科、教育、工程、商科）都喺附近，所以地理位置方便
• 位置算多，尤其係單頭位；亦都有多人位比人傾 project（可以講嘢的）
• 有房可以 book，而且疫情過咗的話應該係 24 小時開放
• 裝修算係開揚，感覺唔會太抑鬱，窗邊位有吐露港睇
• 設施齊全，除咗無書之外圖書館有嘅設備呢度都揾得到

利黃瑤璧樓 2 樓 #ELB

@地鐵站同崇基入口之間

• 位置非常接近大學站同埋崇基書院出入口，而且唔洗拍卡進入，所以有一定數量嘅街外人
• 座位數量適中，勝在有多張 8 人檯，可以多人同時傾 group proj 甚至莊務
• 入座率整體而言唔及其他 learning common 高，可能少人知
• 大部分嘅插頭其實係壞咗，叉唔到電架！
• 摺到攰可以去隔離天台透下氣，景都唔錯~
• 昆蟲出沒注意，尤其夏天嘅夜晚會有極多飛蛾…畫面容易引起不安…

蒙民偉樓 7 樓

@NA Can （已執）後面

• 地理位置算係方便（？）因為都稱得上係本部範圍
• 座位量以公共空間嚟講算適中，類型嚟講只有 4 人同 8 人檯兩個選擇
• 可以講嘢的，所以傾 group proj 或者莊務都可以
• 插頭數量有限，只有貼牆位有；但 lift 口有水機
• 窗口位有海景

龐萬倫學生中心 地下

@CC lib 同 CC Can 之間

• 附近有 cc can 有龐 can，算係地理位置幾好
• 總共有 3 間房，無須預約，拍卡就入得，換言之係先到先得
• 如果你湊夠人霸一間房嘅話，呢度係 legit 可以大大聲傾計都得
• 雖然望落簡陋，但都有白板、插頭、同埋冷氣嘅
• 由於有落地玻璃而且喺地下，所以望出窗外可能會發現啲路人望緊入嚟，少尷

另類摺讀空間

如果咁不幸你喺需要摺讀嘅時候發現上述地點都 full 哂，都唔緊要，因為只要有心發掘，其實邊度都可以摺讀！以下只係一部分嘅例子，中大咁大，更多不為人知嘅摺讀好去處，留返俾各位自行探索啦 🙂

龐萬倫學生中心 1 樓

@龐 can 樓下

• 幾 set 四人檯凳

康本國際學術院（YIA）

@3、4號巴士站後面

• 非營業時間嘅 cafe 330
• 2 樓嘅一排座位
• 3 樓 I-Lounge 出面

李兆基樓

@大學圖書館後面

• 2 樓電梯大堂外嘅座位