文:董二

今年七月，政府公佈高鐵香港段嘅討論文件，亦都開始咗宣傳工作。可能大家都有睇過政府嘅宣傳廣告， 由香港搭高鐵去到廣州只需要 48 分鐘，方便快捷。但另一邊廂，好多團體、政黨群起反對高鐵採用「一 地兩檢」呢個安排，更加組成咗「一地兩檢關注組」。到底高鐵前景係點，一地兩檢有咩咁大不了，反 對者又係咪「為反而反」呢?等我哋由頭講起。

要興建高鐵香港段嘅講法其實早喺十七年前，董建華政府公佈嘅「鐵路策略 2000」已經出現。直至 2009 年立法會通過高鐵規劃，一年之後就開始動工，預計下年就會開通。廣深港高速鐵路連接廣州南(中 國)同西九龍(香港)，途經深圳，同時有停站同埋唔停站嘅列車。

但由於香港同中國有各自邊界，乘搭高鐵香港段嘅旅客係需要通過兩個出入境程序。政府喺討論文件入 面表示，高鐵開通之後會採用「一地兩檢」形式，將出入境程序放晒喺西九龍站。換言之，無論你係由 中國抑或香港出發來往兩地，都只需要喺西九龍站辦理晒所有通關程序。

實際安排上，西九龍站四層當中有三層嘅指定範圍會租借咗畀中國，成為內地口岸區，並且會喺嗰個區 域全面實施中國法律，即係就算你身處可以話係香港中心地帶嘅西九龍，但如果你進入咗高鐵站內嘅內 地口岸區，你已經受中國法律管轄。


搭高鐵好方便?
搭高鐵去廣州好快好方便?廣深港高鐵嘅總站係廣州南站，而唔係廣州市中心。好似你嚟香港旅行、公 幹，都會想喺尖沙咀呢啲市中心落車，而唔係元朗八鄉。而如果由廣州南站落車再去返市中心，淨係搭 車都要半個鐘。所以，政府宣傳廣告話搭高鐵可以 48 分鐘就到廣州，又唔講清楚廣州南嘅位置，似乎 過唔到《商品說明條例》喇。
去得高鐵站都預會返大陸,行中國法律有咩問題?
出入境程序唔單止係檢測你係咪有證件、有冇攜帶危險物品，「一地兩檢資訊頻道」亦提出咗防疫方面嘅問題。 防疫工作係邊檢好重要嘅一環，所以我哋喺上機前後可能需要量體溫，如果身體不適會被禁止上機。但係如果係 嚟到香港先做出境程序，即使帶有傳染病嘅人都可以隨意上車嚟到香港。抵達香港後，雖然未過關佢都重算身處 「內地口岸區」，話就話未入到香港境內。但到埗後如果發現佢身染疫症，即使佢未過關，係咪真係會將一個疫 症病人再透過高鐵運返去內地城市?討論文件提出之後，政府完全冇提到點樣處理呢種情況。

而一地兩檢一旦成功實行，「租地」嘅講法就有咗正當性，香港政府就有呢個先例可循。繼而，地可以租更多， 自治程度亦可以低更多。唔難想像，假如呢次一地兩檢方案成功落實，噉喺香港任何一處地方行中國法律就唔再 係妙想天開。並唔係誇張，政府只要參照西九龍例子，「租地」就得。
好多國家都實行一地兩檢?
提及其他國家一地兩檢嘅例子，大家聽得最多應該係橫跨歐洲幾個主 權國家嘅列車──歐洲之星。雖然英、法兩個國家有協議去做並列管制，但重要嘅係，英、法兩邊關口 都有齊兩個國家邊檢人員，旅客只 會喺離境國進行通關程序。即係如 果我離開英國去法國，就會喺英國 嗰邊做晒出入境程序，唔會去到法 國先做邊境檢查。用返呢一個做法，旅客就可以方便噉喺一個地方 做晒出入境程序，但又唔需要擔心上面所講嘅疫症問題。

至於美國同加拿大就有預先清關安排嘅協議，即係美國會安排邊檢人員喺加拿大機場做邊檢工作，噉旅客抵達美國之後就唔使再過關。美國同樣都係唔會畀旅客喺冇做過任何安檢之下就入自己境內。

用返呢啲做法，無論係美國、加拿 大、英國、法國定係德國呢啲大家話係做緊一地兩檢嘅國家，都冇需要將自己嘅國境租借又或者劃畀其他國家。


其他方案真係冇可能？
其實參考英法嘅並列管制，只需要中港兩方喺福田站設 出入境邊檢櫃位就可以，但有人話，「冇可能㗎，要做 兩地兩檢就要深圳嗰邊個站拆咗再起過㗎啦!」事實係 咪真係噉?

其實高鐵工程未喺立法會通過嘅時候，一地兩檢係十劃 都未有一撇嘅，前運輸及房屋局局長鄭汝樺喺立法會度 話，用唔用一地兩檢係一個好複雜嘅問題，要再研究下。 所以呢，內地高鐵站都會有口岸嘅，唔一定係一地兩檢 嘅。值得注意嘅係，佢講呢番說話嘅時候，福田高鐵站 已經動工。

2014 年，國家口岸辦視察「福田車站海關設置」，亦即係當時福田口岸重設有海關嘅。

2015 年 3 月，中國報章《深圳特區報》講:「好消息 广深港高铁福田站年底将通车! (⋯⋯)而福田站也预 留了相关场地，以做口岸。」

但到 2015 年 6 月，福田口岸突然被重新規劃。《有線 新聞》近日發現，口岸現時變為好少人使用嘅候車區。

福田站口岸由動工去到 2015 年都存在，短時間內就可 以變成候車區。到底「全亞洲最大嘅車站」──福田車 站係咪真係冇可能去重新規劃一個出入境海關呢?係咪 一旦唔係嚟香港做邊檢，高鐵就要報銷呢?

政府計劃以「三步走」落實一地兩檢，第一步: 由內地與香港特區落實《合作安排》。第二步: 全國人大常務委員會批准同埋確認《合作安排》。第三步:兩地各自進行相關程序，以實 施安排;喺香港方面會涉及本地立法工作。一 地兩檢會唔會實施，最後把關工作喺立法會身上。按照「三步走」，政府會提交法案 畀立法會，如法案獲出席會議嘅過半數議員支持就會通過。但係睇返而家立法會入面建制派(40 席)同非 建制派議員(24 席)嘅比例，立法會內其實都冇可能阻止到方案。喺呢個情況下，我哋重有冇可能阻止方案通過?

分享至:

Leave a Reply

Your email address will not be published.