情色｜Stephy信箱

Stephy<3

Stephy:

我以前係鐘意男仔ga，後來遇到P之後就發現原來我更喜歡同女孩一齊的感覺，我同佢拍左四年，佢係我屋企都住左兩年，媽咪一路以為我地只係好姐妹。

點知前一排，我同佢係房度做緊既時候，我細佬突然開門，見到我地兩個冇著衫。第二晚媽咪就扮飲醉酒當住P講，我以後要嫁俾男人，結婚生仔，話如果俾親戚知道我同女人一齊會好冇面咁樣，總之佢講左好多呢類既說話，好似要話俾我知我唔可以再同P一齊咁。

呢兩日我地都唔敢一齊訓，P話想搬走，我唔想佢走又唔想搞到屋企人唔開心，點算呀？

阿兒

阿兒

有一點覺得奇怪既係，點解你屋企人可以俾人o係你屋企住兩年？係咪因為佢地其實都幾開明？同埋你地o係屋企兩年，先俾你細佬發現你地既關係？好想知你地點掩飾到呢段關係？抑或係你屋企人……

anyway，睇番你阿媽借醉講真話，都幾得意喎，識得用呢招。哈哈。其實成日都係有呢d問題架啦，乜野阿爸阿媽唔俾你同第二個呀，唔係嫌佢窮、就係嫌佢嫁過、嫌佢坐過監之類之類，都唔單止話係同唔同性先有既問題。如果要答既，最「行」既方法，都係果d啦，乜野同阿媽講清楚自己既諗法，溝通多d，等阿媽明白、接納，如果唔接納，遲早都會接納咁……

萬一你阿媽真係堅持要你嫁男仔，結婚生個仔，覺得咁既婚姻先係正常，咁都無咩好怪既，好多人都係咁諗架啦，以為一直以來都係咁做，大多數人都係咁做，就覺得咁先正常，咁先o岩。有時無論你點講，道理有幾大條都好，諸如真愛先係最緊要，唔理對方係男係女，對我好就得，呢個o係呢一刻已經係我既終身幸福，點解一定要結婚，要生仔？又或者男女結婚都未必生仔啦，甚至第時嫁個老公會打我添呀……佢唔受就係唔受，正如佢點同你講，女仔梗係要嫁個男仔架啦，搵番個好人家照顧你，生番堆（親生）仔女，唔傳宗接代，俾阿媽有個孫抱下都好等等，你都唔會聽啦。

咁點去說服佢？咪下次灌醉佢，等佢迷迷糊糊，唔理真醉定假醉又好，應承你地係埋一齊咪ok囉。灌醉佢既意思，唔係話真係灌醉佢，而係話，應該搵個下台楷俾你阿媽呢。反正最難過既果關，係你阿媽自己點去放開傳統既一d諗法，接納你地果段關係。知道你地都係一段好普通、好自然既戀情，都肯去承擔果段關係，同一般異性戀咁，無分別，咁點解唔可以o係一齊？對於拍拖係男+女，拍拖要結婚，結婚要生仔女，呢D傳統既想像，係可以/應該去改變，而唔係要成為保守、封建既禮教規條。

stephy