文藝│不如一齊去睇囡囡？

文：林檎

由細到大，有好多野我地係唔可以講架。呀，唔係，係唔可以光明正大咁講，就算講，都只可以跟住某種方法講。如果我約你一齊睇囡囡，你想唔想去？唔同膚色、唔同性格、唔同衣著、唔同體形囡囡，任你睇，合心水就可以企定定慢慢睇。

只要講到畫女人嘅藝術作品，好多時都即刻諗起藝術館入面嗰啲油畫，唔知點解個個俾人畫嘅女人都有黃金比例架喎。明明我地身邊有各式各樣，唔同味道唔同體態嘅女人，但最後響藝術館出現嘅都係差唔多樣同身材嘅女人。拿，我就覺得唔同人都有自己對女性身體嘅諗法，我鍾意你又未必鍾意。點解我地唔可以講我地鍾意咩類型嘅女人先？

估唔到真係有人坐言起行，插畫家Telephone Fung就晌網上搞左個《無名囡囡救地球》網頁同Facebook Group，比唔同人晌網上面發表自己畫嘅囡囡，當中嘅常客就有十幾歲就做全職漫畫家嘅門小雷同高潮樂隊嘅林祥焜，間唔中就上載自己嘅畫上去，又可以分享又可以交流，個個都睇得、參與到。而且佢地嘅作品非常之豐富，唔單止有學生囡囡、SM囡囡，連以《宮心計》角色做藍本嘅囡囡都有！

最近，Telephone Fung同佢十個畫畫朋友一行十一人就決定將囡囡帶去中環！皆因佢地將會晌中環一間藝廊搞畫展，各自畫啲新囡囡放出黎展覽，要公諸同好咁話喎！

雖然將會展出嘅畫都係未曾曝光嘅作品，不過上facebook同網頁睇下，都可以睇到，一直嘅囡囡作品真係好多變化，當中又有好多好值得期待，希望會晌展覽見到！好似有啲囡囡冇豐滿嘅身材，甚至係一個小朋友嘅身體配合一個成熟女人嘅頭，有啲仲係一個女仔頭配一個健美先生身，顛覆晒傳統對於女人身體嘅睇法。雖然一眼睇落去好似好怪，但諗真啲，現實中好多人身材都冇周秀娜咁好架喎，平時都有見過肌肉發達嘅女人架。只不過係我地比人灌輸左一種所謂嘅「正確」女性身體，所以先覺得怪，實際上女性身體有好多種架嘛！如果到時展覽都可以多啲呢類作品，打破下固有嘅諗法，重新建立番我地對囡囡嘅睇法都幾好。

呢類展覽晌香港真係唔多見，所以有時間真係要去中環參觀下，又或者上網睇下其他人畫嘅囡囡，話唔定會好似筆者咁，發現自己過去對於囡囡嘅睇法太少太窄喇！

《囡囡展 以色情電影及囡囡為主題的畫展Girl-jpg Exhibition》

Artists List::
Childe Abaddon、Elphonso Lam（林祥焜）、Faminik、Katol （@ start from zero ）、Little Thunder（門小雷 ）、Michael Wong、Tak（楊學德）、Telephone_fung、Tore Cheung、TVO (盲公夫人 )、Rex Koo

展覽日期:　5 /3/2010 – 31 /3/2010
開放時間：12pm-11pm
地址：Gallery de Vie
香港中環歌賦街45號地下

《無名囡囡救地球網頁》: http://girl-jpg.blogspot.com/
《無名囡囡FacebookGroup》: http://www.facebook.com/group.php?gid=167515999148