善衡書通新形式！

文：Stanley H

基本上個個同學都要上書通，坐晌lecture hall度聽下書院精神，等教授教下我地點樣做大學生，甚至乎係點樣讀大學。老實講，有時真係好悶，好易瞓著。善衡書院就嘗試搞搞新意思，書通減少Lecture嘅比重，變成其他活動，例如行山、露營、拍片等等，令一啲本來唔鍾意齋聽人教書嘅同學都可以投入書通。唔使出去活動嘅時候，都會玩一啲競技遊戲。每一個同學又會有本journal，用嚟紀錄番上書通，又或者平日生活嘅得著。

善衡嘅同學有啲啱啱就去左城門水塘行山，有啲就去東龍島露營，仲係同番自己大O的細組一齊去添！有同學都話呢種書通除左冇咁悶，仲令佢同大O mate，熟左，唔會玩完大O就失去聯絡，甚至係同書院的professor、tutor都熟絡左！除左戶外活動，佢地遲啲仲有個Locus Production，就係每一組將大O至今，一啲想分享嘅想法同心聲，用任何形式、手法表達出黎。

雖然書通上堂形式多左變化，但始終係第一年搞，安排上都有啲問題。有同學就表示，有時安排左嘅活動需時比原定長，但為左完成晒佢地，就被迫overrun。其實時間安排可以做返好少少，例如減少返每次活動的數目。另外，有啲同學可能都係比較鍾意聽lecture嘅書通形式，又或者係根本唔鍾意運動嘅，就可能覺得唔變好過變喇！