PK梯之回歸

文：林啟舜

相信各位舊生都會知道PK梯幾個月之前突然間畀人掘起咗，而新生亦會發現行政樓隔離有一個疑似係樓梯嘅地盤，亦會發現由百萬大道（尤其是近圖書館果邊）去Franklin迫校巴要兜好多路。果度就係傳說中PK梯嘅所在位置喇，雖然校方似乎唔知，不過PK梯素來因為梯級窄而使行人好容易PK，因而得名。

近來聽講PK梯工程（同埋烽火台附近嘅工程）即將完工，所以筆者就撥咗個輪去問問校園發展處（Campus Development Office）。

PK梯之所以會掘爛，跟據CDO所言係屬於大學圖書館擴建工程嘅一部份，用嚟處理地底部份嘅去水。為咗令畢業禮睇落好睇啲，所以PK梯工程同烽火台工程似乎都會趕喺十月底之前完工，即係話各位睇到呢本野之時應該已經整好。

由於PK梯有名你叫，經常令人PK嘅關係，所以筆者亦問及工程同時會唔會改造PK梯令佢無咁PK，不過似乎因為太斜，所以工程上唔會改好多，希望各位同學遲吓喺新嘅PK梯行果時小心啲喇。