OSA培訓失敗，領袖育成計劃成效成疑？

文：有待改進

學生事務處除左幫大家批下奬學金、借下物資借下場、搞下intern之外，近年亦搞埋「領袖培訓計劃」，教下大家點樣組莊。據OSA嘅講法，呢個活動旨在「藉著唔同嘅講座、工作坊等等，幫助新莊領袖掌握管理團體的新技巧，擴闊視野，令學生團體可以茁壯成長，達致薪火相傳嘅效果。

唔知啲參加者去完兩節活動過後有冇覺得自己升左呢呢？小記搵左幾位不同系屬會嘅參加者，分享下佢地係當中的一啲感受。

研究生會 Poppy
「對研究生來讀簡單了一點，但是玩呼拉圈那一部份給了我少少靈感，就是在思考團體進步這個問題上，了解到內部的團體氣氛對於進步有很大的影響。不過講者的理論終歸理論，只給了concept，但是體驗較少，例子也較少，如果有時間的話，希望有進一步的案例提供。第二次的活動所講的歸檔等等滿有用，但是太停留於表層，說有什麼（發）票可以用，什麼票不可以用，整個內容有點散亂。ICAC那段片子，跟學生團體的活動是有差距的，不太合用。」

系會財政　Jason
「本身想知多啲關於領導同埋溝通嘅野，好想知多啲點樣可以有效溝通同埋講下平時溝通會常犯咩錯誤等等，同埋想知多少少關於領導嘅技巧，但係第一日嘅活動遊戲太多，都唔多related佢地所講有關leadership嘅野嘅。第二日嘅活動危機處理講得太多，點樣管盤數啊、有無方法易啲管理盤數啊呢啲都無講，有啲失望。」

書院Toast Master Euo
「第一日嘅活動還不錯，果個遊戲令我學習到，大家係點樣去思考。第二日嘅活動就比較實際。講座本身講左啲財務處理、貪污嘅資訊，學到財務處理嘅一啲知識，以前有一啲唔太在意嘅地方宜家會多加留意。」

書院走讀生舍堂 Vania
「我支莊得我一個人參加，本身想學多啲野，例如點樣宣傳啊，點樣搞活動等等。覺得第一日都幾好玩，本身諗住係去果度識下人。整日活動都ok嘅。但係希望可以講少啲講talk，每一part都叫多少少人share，因為我覺得聽人地sharing本身有好多得著呢！」

魔術學會 Daren
「點解參加？因為之前上莊話OSA啲活動參加下，同啲職員打好關係，咁第日搞活動啊借野等等都方便啲嘛。同埋佢張證書都幾吸引我地參加嫁！張證書有咩用？唔知嫁，放落CV好睇啲掛。不過呢，第一日嘅活動都只係大家一齊玩下遊戲，學到嘅野都唔多。個嘉賓Present啲野又唔知佢個重點係邊，開頭話係leadership workshop，以為有實務分享，但係又唔係喎。Powerpoint又唔知重點係邊，theory好似係佢自己作出黎咁，啲point重重覆覆，成日嘅活動同leadership都無咩關係。第二日講嘅野好多財務上嘅野都識，但係唔去聽又唔俾拎資助喎。好多野都係照讀powerpoint，而會室管理等一向自己有做開，都唔太使佢講。」

大家聽完唔知有無對呢個活動多左理解呢？呢個培訓計劃第一個活動係「領袖技巧及溝通技巧工作坊」，請幾個中大校友返黎講下啲溝通技巧咁，一開始果陣同大家跳下舞熱身，幫大家form組之後俾時間你諗組名同「形氣」（即係我地家陣成日講嘅beat，呢個係90年代嘅用語），然後同大家玩下呼拉圈，玩下數字遊戲計下分咁就去左半日啦。當然中間講少少理論——「開心的六個層面」——講者話「上莊最緊要開心，唔係上莊黎做咩呢？」，所以佢就教左呢個「開心理論」俾大家啦。

第二個活動係「團體實務理財、私隱條例及防止貪污資訊座」，小記係呢個講座上同身邊唔同嘅學生團體搭下訕先知，原來唔黎係無得拎OSA俾學生團體嘅資助嫁！咁咪即係迫人捧場？不過如果個講座嘅資訊係實用嘅話咁又無妨嘅，不過小記同咁多被訪者諗法一樣——都真係過分淺易，大家坐左係度兩個半鐘，聽埋啲中學生都應該學過嘅「五常法」、「開會的方法」、「如果寫會議記錄」等等，都咪話唔悶、悶、悶！

OSA本身搞呢壇野出黎原意係好嘅，等未上過莊嘅莘莘學子多個渠道知道下上莊「秘訣」，不過似乎無咩武林秘笈俾大家學到用黎打大佬（應付莊務），頂多只係少少養生之道（起碼唔犯法）而已。黎緊呢個計劃仲有5個活動未舉行，希望佢地可以盡快改善，滿足同學「迫切嘅需要」啦！