體育：好悶@西甲：la liga de espanola

好悶@西甲：la liga de espanola

文︰謙

冬眠期過去，西甲已有大轉變，覆雨翻雲。

頭馬西維爾本身係威係勢，可惜法比安奴無情情傻傻下走去打人，停五場。呢五場正是關鍵時候。法比安奴 + 簡奴迪屬一剛一柔之絕配，法比安奴一友打單箭頭都仲ok，簡奴迪在冇人幫佢「牙下牙下」左掩右閃，就形同虛設，睇左西維爾輸畀唔識入波既馬略卡同埋打和頹爆黃潛艇維拉利爾，就知道西維爾「大黑將至」，連教練望見好努力做替身但毫無建樹得個跑字既捷雲頓，都只有不禁搖晒頭。無左法比安奴呢D衝刺型又不乏技術的癲佬，442，451都即時行不通。唉，沙維奧拿，你話你係咪傻豬呢，返巴菜做後備，仲要一出就傷。

華倫
都係平平穩穩，冇乜「皇帝相」，祖阿昆唔fit，維辛迪傷，睇過佢贏利雲特果場，贏就係贏波，但不是有甚麼突出之處。大衛偉拿的位置始終比較曖昧，摩連迪斯高峰期真的過去了。安古路證明了自己踢右路永遠只能是客串。傷兵多，只能先好好地陪跑一陣。

巴菜
列卡特連fit番既沙維奧拿都唔重用，傻架。細哨冇貨賣，又傳賣沙維畀車仔，似乎在蘊釀換血。無疑巴菜仍是今屆西甲五強中比較上最穩陣的球隊。可是，距離上屆的夢幻巴菜仍相距甚遠，不停下滑中。依杜奧好番可能會有曙光。多D畀美斯細哨做後備可能是更好的選擇。

皇馬
咪傻啦，賽季去到一半都仲未定到自己的打法與first 11人，仲要掛住搞碧咸，卡斯辛奴同肥哨D蘇州屎，但又咁都畀佢企到個第三，有暗湧都唔奇。當雲佬不停浪費機會，老矣傷埋，沙治奧拉莫斯又好似愈打愈勇，就不如湧埋上去打後上前鋒啦。

馬睇
唉，雖然說是我的最愛，可惜，真係冇眼睇。攻力疲弱，所謂的「王子」廢柴度托里斯冇貨就大家都預左，米斯達都唔係一個撞得下既前鋒，仲要成日後備，加列迪根本就只係一隻雞翼，阿古路做keyman我諗要等多四五年，麥斯同馬田柏杜夫收啦，要不是靠球證亂畀十二碼先識入波（廢柴度呢排仲要十二碼都射到出晒界，歸西吧！），就唔會咁好彩成日贏一球。不如借番基士文番黎啦，唉。頭五畢業都算你好彩喇，馬體。

總結：
上半季西甲真係得一個「悶」字可以形容哂。粒粒大明星唔係頹就傷，才重新發現如果球賽冇左巨星的魔術腳神來之筆，平平淡淡幾廿個人圍著個波踢來踢去，隊隊都冇晒隊型和特色時，原來，足球可以變得如此沒趣，如此乏味。當國際焦點，特別是好奇的西班牙人失去了英國人碧咸這個「奇觀」，不知道還可以有甚麼話題呢。再轉台看意大利足球聯賽，眼見那空空如也的看台，保守乏善足陳的踢法，心裡一酸，想起西甲，除了地緣政治和種族歧視，還有甚麼是值得一談呢？