社會｜強烈要求放過張宇人！

文：章魚人

張宇人究竟有無話過佢支持將最低工資訂係廿蚊，已經「八萬五」喇－橫掂佢都昭告天下，認晒低威，「廿蚊論」已經唔存在喇。正所謂「認的錯不了，錯的認不了」，依據公關化妝術，呢個關頭最緊要係擺出一副認錯死狗相，咁樣即使你其實仍然死撐，又邊個會咁harsh，同你計較？

Say句sor，就得囉？

唔知係唔係張宇人嘅「樣貌問題」、「高度問題」，佢道歉之後，facebook嘅「強烈要求張宇人用時薪20元生活比我地睇」群組成員數目仍舊颷升至家陣大概4萬4千人，公關化妝術真係失敗。我諗，張宇人面對嘅問題，正就係溫總所言嘅「深層次矛盾」喇：佢本身係生意人，呢次開價廿蚊試水溫，以為自己係度同人傾生意，雙方可以你來我往，享受競價嘅樂趣？梗唔係啦！最低工資一係唔立，一立梗係睇下邊個價先夠基層人民有尊嚴地生活；緩和社會矛盾，你估做生意講價？結果，張宇人咪瀨晒嘢囉。

笑什麼，自由黨，你也是張宇人！

得返嗰幾丁友嘅自由黨於是急住出嚟，撇清呆壞帳，話：「我哋其實早就話出廿四蚊！廿四蚊！」張宇人都即刻統一口徑，唔再亂講嘢。之但係，不如我哋一齊計條小學數：

小明每月工作廿六天，每日工作八小時，時薪廿四元，問小明每月可得薪金多少？

答：26×8×24＝＄4992！！！

多謝晒！五千蚊唔到，小明可以喺香港快快樂樂地生活下去咩？唔好唔記得，冇最高工時保障，最低工資只係有消極作用：餓你唔死咁囉。你想有美滿家庭生活？想同學校合作教好啲仔女？想參與政治，行使公民權利？你鐵打呀？有時間唔好去瞓覺？咁你同我講廿四蚊，真係磁能線……都買唔到一條！

不自由的自由黨

老老實實，自由黨完全唔應該支持最低工資。因為佢地擺明係信仰市場萬能、信仰憑一己之力向上爬的獅子山精神，但係家陣最低工資明明係「民粹」政策，明明係好心做壞事，自由黨唔應該盲從大多數而作出傷害「香港整體利益」（雖然最大份嘅利益喺最少嘅人手上）嘅事，先至啱架！但係，點解佢哋仲要支持最低工資呢？好簡單，因為自由黨仲想選直選，想擴大民意基礎，唔想單靠功能組別贏－當然，功能組別出身嘅張宇人未必係咁諗，但係直選的確係可以起到牽制嘅作用。

如果你依然感到憤怒的話……

據明報3月27日報導，自由黨經過「廿蚊事件」後，有人醞釀退出，轉投更保守同淨係會以功能組別奪取議席嘅「經濟動力」。呢股取代自由黨，透個特權去畀商家自由嘅新勢力，相信比起張宇人嚟講，係「沒有最無恥，只有更無恥」。成件事又證明咗，冇民主，就冇民生：一日有特權階級，一日都唔使旨意講咩向上爬、講咩一分耕耘一分收穫。張宇人呢啲小角色大可放過，但係我哋要做嘅，係喺五月十六日嘅五區公投果日，向中央表態，踢走不公之源－最最不該嘅特權階級、不該嘅功．能．組．別！！