莊的二三四五六七事

文：Jaco

莊【zong1】校內的組織、學會等內閣。

上莊

擔任學生組織幹事。亦可指上一屆的學生組織幹事。

莊員

學生組織內共事的幹事。

莊務

學生組織的事務。

傾莊

有興趣做下一屆幹事的同學，聚首商討學會的未來目標方向的活動。

頹莊

莊務很少、不用花很多心血即可勝任的學生組織。

Chur莊

與頹莊相反，需多很多時間心機精力去完全莊務的學生組織。

坎莊

同時有兩個或以上的內閣競選的場面。

孖莊

個人同時擔任兩個學生組織的幹事。

……

＊＊＊

講起大學.文化，又點可以唔提莊嘅文化呢？大學五件事都有教，無上過莊唔叫讀過大學，一齊共事過嘅莊員先至係大學三/四年出生入死.老友，所以大把freshmen一入到嚟就通街搵自己想上嘅莊，好似怕蝕底咁。但係，係現時.大學入面讀三／四年，又係唔係一定要搵一兩年出嚟上下莊Chur下自己呢？一切都要由「如何組成一支莊」這問題說起。

係中大入面，通常上一支莊的過程都係傾莊、成莊、宣傳、諮詢、選舉，選舉中過半數.就會開始佢嘅莊期，通常都能成功當選。到左9月，又開始幫下莊搞傾莊，跟住就係不斷咁loop落去，成件事根本就好機械化。咁或者你又會問，點解會咁多人走去上莊呀？無可厚非，大學嘅生活相對地比較自由，而好多人係中學時期都未搞過啲咩大茶飯，咁啱大學又有個機會，咪膽粗粗上莊玩下囉。同埋我入到大學，又唔會見嚟見去都係果班人，又想係大學生涯中搵返啲寄託，咪上莊識下朋友囉。仲有喎，人人都上莊，你唔係唔上呀嘛？當然，小弟係呢度唔係叫大家係咪都狗衝去上莊，只不過係想道出而家大學生上莊嘅通病姐。

通病1：不合理地頹

每一個學生組織嘅成立以及營運至今，都有佢嘅宗旨同埋目的。就算係頹到極點嘅莊，都有一定嘅野做。好多人上莊就係為左呃宿分、結識異性、砌靚自己份CV，無諗過真正為呢支莊而付出。可能你會話，上莊負到佢最基本的責任咪得囉，駛咩咁Chur自己呀！但係你要記住，你上得呢支莊，唔單單要為左自己而負責，仲要為所有會員而負責。

無錯，你只要滿足一支莊嘅最低要求，無人可以話你唔負責任，但係咁樣俾一支莊處於低度運作嘅狀態，過多幾年，頹風不斷，只會令到果支莊一直咁頹落去，萬劫不復。咁你又會問，頹又有咩唔好呢？如果一支莊係頹到一個地步，已經好多年都只係保持最低度的運作，咁即使有個好想搞返起呢支莊嘅人加入都好，都會因為頹嘅風氣而搞唔起佢，完全發揮唔到果支莊本身嘅功能。

另外，一支莊係一個內閣，係一個整體，作為果支莊嘅一份子，亦都好應該對其他莊員負起一定嘅責任。係上莊嘅時候，莊員同莊員之間應該互相傾清楚每個人所負擔嘅工作量，如果你.莊員肯幫你分擔多啲工作量，頹都係無問題嘅。都係果句啦，唔好俾支莊嘅士氣同理念沉沒。

通病2：盲目跟隨

其實即使係同一支莊，每年搞嘅活動都可以好唔同。我都唔係好明點解大把莊年年搞嚟搞去都係果三四樣活動，仲要內容同rundown除左日期同負責人之外幾乎同上莊一樣，諮詢.時候俾人問起點解咁plan份yearplan，只會話：我地都係參考上莊果份……

我唔係話上莊份year plan唔好，亦都唔係話唔可以跟前人嘅政策去做，而係想講清楚，你一定要有一個能夠獨立分析事情好壞嘅心。如果上莊啲政策係好嘅，今年再搞多次絕對唔係問題；但係如果係無理.，你就無理由照跟啦。舉個例，大部分嘅莊會搞三次傾莊，只需要出席其中嘅兩次（當中必需包括最後一次），咁就可以好神奇咁上左莊。咁傾莊會做啲乜呢？破冰遊戲、莊員自我介紹、簡介下有咩活動要搞……佢地頹搞傾莊，內容又唔討論理念，咁點樣叫人地抱住團火上莊喎。聰明嘅你，都應該知道搞傾莊要搞得深入啲，傾多啲支莊嘅理念，等你嘅下莊清楚明白到佢地嘅目標。

通病3：老鬼／上莊嘅影響

上莊前有一個必經.階段：諮詢。通常夜晚7點開始，歷時6至10個鍾不等，有.仲會諮詢到第二朝，堪稱上莊最辛苦的環節。期間好多老鬼都會返左嚟問你問題，上至天文，下至地理，乜都問一餐，而問題主要分兩類。第一類係理念類，顧名思義，老鬼們會針對你嘅上莊理念、莊名、活動的詳情去問一啲以「點解」開頭.問題。其實此類問題嘅本質唔差，只不過老鬼有時會好hard sell佢自己果套思想，而果種思想又未必係咭啱囉。第二類係雞蛋裡挑骨頭類，問題千奇百怪，會問你記唔記得其他莊員嘅電話同生日呀，知唔知中大邊度有廁所呀，校巴時間表呀，捉你錯字呀，根本就係無野搞搵野嚟搞，嘥你時間，無聊至極。係身心都極疲累嘅狀況下，你嘅意志就會好動搖，咁你判斷力又再低一兩成，好容易順應左老鬼的意志。

基本上嚟講，我都唔明點解一支莊諮詢嘅時候會俾咁多野束縳住。諮詢嘅原意就係俾會員一個機會，向莊員詢問來年有關year plan或其他範疇上.問題，而莊員向會員解答。所以你只要本著一套你深思熟慮過後，認為啱既價值觀，以及搞呢啲活動嘅宗旨，基本上無問題會難到你。至於老鬼／上莊對你嘅「干涉」，如果你係有能力去獨立思考同埋判斷的話，呢個對你嚟講絕對唔係一個問題。

一字記之曰：心

講到底，一支莊搞得好唔好，唔係睇頹唔頹、Chur唔Chur，而係睇班莊員有無心。有心就自然會有目標，而目標背後亦會有相關.理念，再加埋班莊員嘅互相信任同照顧，諗多D唔同嘅可能，一支好嘅莊就可以樣形成啦！