【校園】中大校巴司機工作實況—「慳」響唔應該慳嘅地方

文：Jeanne

講起喺中大搭校巴，腦海好自然就浮現兩個畫面：每次趕上堂而逼校巴、並且目送幾架校巴之後，睇住裏面嘅人仲係死都唔肯行入啲，逼哂響門口位；又或者好唔情願，龜速咁要慢慢嚟，好似得我一個趕時間咁。仲有炎炎夏日，一大班身水身汗嘅乘客迫巴士，焗到透唔到氣……

搭校巴嗰個滿腹牢騷，咁揸校巴嗰個又點？「無聽人提過喎」，朋友甲如是說。

直到某周日搭校巴落火車站，聽到校巴司機同另一個學校職員講「真係頂唔順喇，宜家都唔係好舒服」、「無時間休息、方樹泉又無開，連廁所都無得去」……突然意識到佢揸住架巨型嘅車輛喺山路兜兜轉轉，一個人負起哂成車人嘅生命安危已經好大壓力，原來仲要同時面對其他問題。「唔講都唔知校巴司機咁辛苦」。

於是之後每次搭巴士都會留意校巴司機，主動問下佢哋嘅工作情況，發現校巴司機嘅工作環境惡劣。

司機工作環境惡劣
1.休息時間不足
自從7月換咗校巴行車路線之後，所有路線都改為循環線，換句話講，校巴嘅起點同終點站都喺同一個地方（即係火車站）。司機以往可以喺新亞或者逸夫稍作休息，宜家要落返火車站先可以休息。

暑假猶自可，到得開學嘅日子，校巴乘客愈多，佢哋行入車廂較後部分既時間就要愈耐，校巴一定比預期遲咗開出，並且行車時間亦較長，呢段延遲咗嘅時間只能夠喺司機僅有嘅休息時間彌補，確保下一班準時開出。

2.洗手間難尋
新路線都改哂以火車站為總站，司機仲要面對另一個問題：佢哋只有時間去最近校巴站嘅洗手間，無奈最近嘅方樹泉樓星期六日係唔開門，同埋平日下晝五點幾就關門呢段時間司機要行到去較遠嘅美心借洗手間，「更慘係有時撞啱『清潔中』，仲要急急腳趕下一班車。」

計過時，發現人少嘅時候司機揸一轉N車要廿四分鐘，開學時間其他巴士線一程更要超過半個鐘。又趕、地方又遠，咁不如唔好去：「洗手間嘅問題真係好急需解決，點解唔喺火車站附近擺兩個流動型廁所呢？其實唔只我哋，嗰度仲有好多人唔係教員同學生，佢哋需要嘅時候都唔知點算，好唔方便……」

3.水機欠奉
洗手間係一個問題，仲有飲水機缺乏嘅問題。喺本部四條柱旁邊有一個「司機休息室」，入面有飲水機。理論上司機可以去本部斟水；但上面已提及，司機忙到去唔到洗手間，莫講話專登揸架校巴去休息室（校巴唔停嗰個位），即係司機都係無水飲。「提議過喺火車站附近加水機」，但校方仍無動於衷。

4.車廂高溫難耐
校巴無冷氣，我哋坐一陣車嘅都覺得難受，對本身休息已經唔夠、精神差嘅司機簡直係雪上加霜。
唔少校巴駕駛位都放咗溫度計，司機發現呢個事實：校巴車廂溫度經常高達40度。有說25.5度係舒適溫度，喺40度高熱嘅惡劣環境下揸車更加影響駕駛者嘅身體同精神狀況。
校方話校巴唔加冷氣係為咗環保，但「中大其他所有車都有冷氣，睇下保安組啲車，有好多架，成日周圍行，都有冷氣喇」，點解校巴就遲遲唔裝冷氣？

小結
休息唔夠、無得去洗手間、無得飲水，尤其因為休息時間嚴重不足，竟然出現司機「驚去廁所連水都唔敢飲」嘅情況，校巴司機身體同精神狀況愈嚟愈差。但駕駛者正正最需要充分休息，先能夠準確判斷到路面情況，尤其佢哋本身已經承擔車上咁多條人命嘅壓力，又加上山上嘅路面轉彎多，車路一向狹窄，壓力就更大，導致惡性循環。

司機發現：行車路面設計不安全
司機亦發現校園部分路面設計影響行車安全，尤其喺火車站同研究生宿舍之間嗰條迴旋處，整嚟整去（我地都睇到條路整咗好耐喇），由之前原本已經加闊左，到最近無啦啦又喺迴旋處嘅入口，加咗條向車路凸出嘅梯形紅磚路連欄杆，又修窄咗條路；有時校巴轉彎唔可以一次過Uturn，或者要停一停，並且有剷上行人路危險，校方無考慮過咁嘅設計嚴重影響路面安全，司機亦好擔心會隨時發生意外……

「投訴無用，我哋係合約制嘅，一遇到呢啲問題，校方就會請過第二班人（即係炒佢哋）。我哋之前同校方反映過，佢哋話係搵班則師做嘅所以無問題」但明明揸車嗰個係校巴司機喎……佢哋先係道路使用者、最清楚路面情況嘅人，校方唔能夠無視呢個事實，忽視司機嘅專業判斷。

我睇住佢過迴旋處，亦真係有佢講嘅問題，好危險（有眼睇架喎），加上前段提及司機精神差，喺繁忙時間又有咁多車出入，發生意外嘅機會好大……「最近學校好多大泥頭車出入，咁啱有人企喺（凸出嘅）欄杆隔離，好容易會俾架車拖走」，加出嘅紅磚路對行人難見好處之餘，更增加發生意外嘅風險，加重埋校巴司機嘅負擔。

司機工作環境惡劣的原由──校方「節流」實行僱員合約制
校巴司機嘅基本待遇差，面對「投訴無用」、專業判斷被漠視，主要因為校方企圖喺營運校巴度慳錢。為咗慳錢，校巴司機人手不足，導致司機休息時間嚴重不足；又無添
置需要嘅設備，甚至宣稱係「環保考慮」。以冷氣為例，有司機指如果要喺校巴加裝冷氣，就要加多個油缸，每個月額外開支大概一千蚊；但正如以上所講，學校其他車一
早裝哂冷氣，又有唔少地方廿四小時開住冷氣，唔見得佢哋嘅環境比校巴更「惡劣」，亦唔見環保呢個「理由」喺其他設施被一致採用。飲水機、洗手間不足都慳錢嘅表現。又為咗慳錢，校方採取僱員合約制。合約制員工比長工福利少，校方基本上亦可以隨意炒人，甚至唔需要理由（長工就好難被無理解雇）。因為咁校方同司機嘅權位差距愈大，校巴司機無同校方交涉嘅能力，人微言輕，專業意見都被漠視。

校方喺處理僱員問題上無疑有遺大學精神，無考慮到司機嘅工作需要；喺現實考慮上亦明顯見疏忽，因為司機嘅工作待遇、專業意見同學校行車安全有好大關係。繼續漠視
上述問題，交通意外嘅風險不減，乘客以至行人嘅安全仍然備受威脅。就算俾校方炒咗呢班司機再請過一班，都無減少到種種造成意外嘅條件：駕駛者仍然喺惡劣環境下工
作、仍然要負起成車乘客生命嘅責任、身體同精神狀況依然欠佳。

就此，校方最先要解決嘅係司機休息時間不足嘅問題。最恰當嘅解決辦法係增聘人手，而唔係縮短現職司機嘅休息時間、增加司機嘅工作量。

註:去年許敬文副校長曾承諾，凡工作滿六年的員工皆便自動轉為長工，但此承諾至今仍未兌現，有校巴司機已工作滿六年，仍未能轉為長工。

交通組對校巴司機工作情況的答覆