懶JJ地產－－A BRAVE NEW WORLD：We Create New Living Experience

樓盤推介：貨櫃屋苑

文：揮衣袖的懶ＪＪ

後生仔，我就好老實既，呢度係就係偏僻啲，但係150呎豪裝，月租咁平，上層四千，下層三千五，出面好難搵架喇。貨櫃屋呢家野，夏天熱、冬天寒就冇得走架喇，打風時驚危險，咪返屋企住兩日，將就下啦。你計下條數喇，想平過貨櫃屋──得劏房你揀，冇窗、爛鎖已經係等閒事，間屋霉到生菇都有呀。同呢度咁上下大既套房，市區起碼租四千五，返工就腳既港島區仲要畀多一千，你岩岩出黎做嘢，搵得個雞碎咁少，租屋去左五千蚊，仲要出街食飯，到時係咪唔畀家用咁衰仔先？

阿叔知你地啲後生諗乜，租不如買吖嘛！講就好聽，私樓你邊度買得起吖！宜家啲私樓細極都三百萬一層，你一個月搵個萬零蚊，幾時得儲夠首期？宜家啲後生，買到樓既多數都係老竇老母畀首期，兩公婆夾份死供爛供，負擔好大架。

我知，政府話會出招吖嘛。唉，指意佢喎，尋日財政預算講左唔會出租金管制喇，根本就冇心幫忙。拿，家下樓價咁既勢頭，租市區樓分分鐘兩年加你一個DUP，租我貨櫃屋就唔同，冇咁渴市，就算加租都冇咁乸利。

其實阿叔都戥你班後生慘，以前仲話有公屋呢條路，家下連拎最低工資既，都未必有得申請，唯有未做嘢前申請定先，但一個單身寡佬仲要等廿幾年先上到樓。後生仔，你宜家租住我呢度先，一路住一路輪，仲可以儲下錢，住返十年咁上下，好彩既娶埋老婆，就上到樓架喇。

參考資料：

《蘋果日報》：貨櫃層層疊變「屋苑」　150呎單位月租$3,500　業主懶理違法：咪釘契囉

http://hk.apple.nextmedia.com/news/art/20140216/18627262