校園︳校園散打

【無雷聲、無雨點的醫融論壇】

文：SC

十月十三日，一個個天灰到落極都落唔出雨的下晝，文化廣場上舉行了一場醫療融資論壇。環顧席上三位講者，基層發展中心的李翠琼女士坦言貧苦長者在現今醫療體制的慘況，可惜乏人注視；社區組織協會兼中大社工系的馮可立教授直斥市場原教旨主義殘害公共醫療服務，對醫療改革的出路卻不多具體展望；醫學界新紮議員梁家騮跟隨政府主旋律唱和，將窮人扣上「中產」帽子名正言順趕他們出公立醫院，令人想起選舉之際指他為「建制派扮獨立」的流言。明明彼此談不攏，席上言論竟火花欠奉，與天氣一樣的落極落唔出雨。

台下反應如何？Coffee-corner的工友嬸嬸到場細聽固然甚好，但舉座同學不足十個，終究難掩疏落。大學生，未出來工作自然不用擔心要交強醫金，病了又有中大保健處包底，覺得醫療融資不干己事亦屬平常。然則只要周一嶽在明年年初的諮詢後落實強醫金，你我畢業後不但人工縮水，連強醫金戶口也隨時凍過水。兩房一倒，我的強積金積蓄已蒸發掉一成，現在金融海嘯，這一季丟了多少錢實在不敢想像。有了強積金的前車之鑑，政府仲要巧立名目逼我地磅水俾基金佬倒錢落海？索性整埋「強教金」、「強住金」、「強死金」丫笨。

未雨稠繆，咪話唔關你事呀巴打。

XXX

【中大換防毒，高危十一月】

文: 3.11

中大用Trendmicro既防毒軟件已經有好幾年，唔單止全校既電腦都可以用佢既單機或者伺服器版本防毒，就連教職員同學生都可以免費(當然其實只係中大俾錢)係自己既電腦裝一份防毒軟件，確保唔會令電腦病毒係中大校園裡面傳播。

直到十月初，ITSC忽然間宣佈今年會轉用Kaspersky，而Trendmicro既軟件註冊，就將會係10月底過期。根據不少軟件評測報告， Kaspersky近幾年係防毒軟件既排名都係數一數二，相信ITSC都冇乜點揀錯。只不過，去到成十月初先向全校公佈要轉軟件，就似乎有d太危險喇。

據小記訪察所得，大學各部門既IT技術人員只係同同學一樣，收到一個ITSC Digest，ITSC完全冇特別通知，亦都冇例如設定指南等既支援－－有d部門去到十月廿幾號都仲未轉到防毒軟件。學生就更加有好多甚至完全唔知要轉防毒軟件添！而更奇怪既係，明明中大買既Kaspersky可以升級到最新既2009版本，ITSC網頁竟然只係提供舊兩版既6.0俾人下載，防毒功能雖然未至於差天共地，但係能功上都有唔少更動，同學更新既時候，記住去Kaspersky官方網址下載最新版本喇：http://www.kaspersky.com/kav_latest_versions/

如果因為ITSC宣傳同支援不足，而令到校內十一月有大量電腦中毒，就真係好心做壞事喇。