實習的一天

文：一個法律系學生

點解law student要貼錢爭住做咁多intern？係虛榮？係上進心？其實我都唔知。

中環金鐘lunch time好多人好迫，啲嘢食都好貴。諗起啲車費同膳食都要自己貼錢，我靜靜咁去Starbucks買咗個四廿幾蚊嘅包，就返咗上去。

其實legal intern多數無錢收都唔係無原因。試吓幻想，你要比個小學生日日跟住你，你又要被迫比野佢做，又要對佢nice ，但係佢又乜都唔識，嗰種無奈其實我都明。而law students去firm / chambers 做intern就正正係咁，好容易就察覺到其實自己係一個負累。佢又唔好意思俾啲文書影印派信嗰啲工作俾你，但係你書又未讀晒，法律嘅嘢又好複雜而且clients 嘅案件牽涉嘅事情好多都好重要，隨時牽涉大量嘅金錢甚至clients以後嘅人生自由，佢唔可以亂咁交俾你做。於是佢就俾啲翻譯或者research嘅工作俾你，同埋叫你跟出跟入。但係你做完之後，佢又要搵人同你再核對；你唔識，佢又要教你。所以有時佢哋發脾氣鬧你，我都明。

可笑嘅係，返到大學，唔知點解law students就係有一種奇怪嘅優越感。我哋讀嘅嘢好似好難，好重要，好利害咁。我有好多朋友，一知道咗我讀law之後，就即刻報以佩服嘅眼神，問我係咪好辛苦，叫我加油。我笑而不語。其實，讀得大學，大家都一定辛苦，我哋並冇啲咩特別。唯一可能比較特別嘅係，我哋有唔少人會不自覺咁鍾意維持呢個優越嘅假象。如果你仲係咁諗，相信你翻一翻intern，就會明白呢個諗法係幾咁可笑。