校園︳【校園散打】由李達三的真面目到烽火台

文：奇

李達三樓推倒重來重建工程於零六年開始，到上月終於拆掉棚架，露出其真貌。

當年校方為左重建，唔聲唔聲將景禧園拆掉，砍掉旁邊小斜坡上的一大排杜鵑，已引起師生校友的極大不滿。點知到今日，校方仲越戰越勇，為擴建圖書館，連中大的精神象徵烽火台都敢郁，無咨詢過同學意見就話趕唔切無得傾，點都要拆，一副唯恐天下不亂的咀臉。

零六年先入中大的我無見過景禧園，聽聞景禧園本來是個綠油油的小花園，加上旁邊會響春天盛開的杜鵑，係中大最美麗既景致之一。家下乜都無晒，得番一塊唔知用黎做乜的空地，好似係李達三停車場的入口，核核突突咁。

新李達三除左話俾你聽邊個係話事人之外，佢個衰樣仲暴露埋校方出爾反爾的狡猾相。我地依家見到既李達三同原圖則有很大分別，例如明明係整棟樓都以落地玻璃作外牆，家下就完全唔係果回事。點解會咁？原來係起起下發覺唔夠錢，惟有左改右改，改到數為止。起到半路先知唔夠錢喎，你話荒唔荒謬？明明白紙黑字寫好畫好的計劃都會有變數，我地點知你拆左烽火台之後會唔會唔夠錢放番入去？d工程咁以錢為中心，到時就算放到入去，一個唔覺意有錢剩，屎忽痕響烽火台四周圍擺d樹呀，裝飾呀咁，個空間完全唔同晒，咁點算？到時米已成炊，真係怨都無用呢。