香港甲組足球聯賽
大埔 0
南華1（87'麥士維）
 
文︰F.A
 
寶鄉街尾的華立茶餐廳，通宵營業，歲月如梭，粥粉麵飯，照亮整個大埔。店內只有一個電視直播頻道，播了車仔便冇得睇曼聯；因此食客算旺，也沒有幾個球迷。不過麵部前面貼了一張破殘的彩色海報︰大埔足球會上半季的主場賽程。最底一行，精兵簡政，壓軸一戰，十二月廿七日，大埔對南華。
 
香港足球以沒有主場見稱，看似和氣生財，實則見風轉舵。大埔由地區起步，儉樸經營。零六年秋初登甲組，向康文署力爭主場，與街坊同樂。三個外援，一個國援，俱是實而不華之輩。李氏兄弟，雙翼齊飛。這種故事，每次比賽途中我也可向新加入的朋友胡扯上百次，而且津津樂道。
 
但今次不同了。地獄球場還是地獄，噓聲震天，文彼得冇啖好食。但太多球迷太少座位了︰我們一行七人，都被逼坐在遠端。外援出了幾多個，葉佳有沒有正選，李氏兄弟搞甚麼，蘇來強的金毛有冇染番黑，其實我並不知道。不過無論睇得幾唔清楚都好，總之一定要夠嘈，把零星南華球迷淹沒。臨近完場，南華幸運入球了。大埔末段盡地一煲，卻無功而回。一比零。
 
比賽的氣氛太好。二千五百人，竟已人山人海。但輸左波，食龍肉都冇味。都未搞清楚咩事，就輸了。坐在近端的人們則不捨得離場，不絕給大埔球員掌聲，像迂腐的蟲子嗡著腦海——我們都無法驅走輸波的惡臭。回家看youtube，南華左路斬中，陳肇麒頭槌攻門，李灝翰飛撲，麥士維後上補中。其實全場大埔攻勢較多，但南華體能略勝；比賽去到後段，客軍漸見優勢。
 
寶鄉街行到最篤篤，過了獅子會青年空間，柳暗花明，還可拐左，然後穿過一條只有數米的隧道，便到泮涌，見到泮通公立學校。藍球場還是石屎地，清脆高亮。我在大埔足球會的辦公室買好七張門票，端詳冇得賣的黑色球衣。離去時天清氣爽，也就不甘心做輸波的心理準備了。

分享至:

Leave a Reply

Your email address will not be published.