山城住民：This is my home

▋ P 教授與家人同住中大宿舍。他指教職員一般都整家人住，有五個明顯需要：配偶要上班，仔女要上學，老人家要見醫生，工人要買餸，教員自己則要開車。「我頭一二日揸車揸到冇油，加油站起二橋出面，出唔到去入油。有啲住戶有第六個問題，就係屋企用晒 Gas（煤氣）。」問及當時如何處理難題，他說：「冇得解決，只能夠走。雖然好多物資送入中大，但唔係畀住戶，亦都唔係我哋需要嘅。」然而，住戶當時要撤離，就是一個真問題——交通情況不利駕車，但不少住民年紀較大，無法徒步離開中大。他一家人最終找了兩名校友幫忙撤退，「一個校友就用電單車車我哋去大埔道，之後有另一架私家車接我哋走。當時仲要搬行李。」

住民離開中大後，還是得處理居住問題，而校方並沒有為教職員提供任何協助。P 教授坦言：「我們住戶感到中大高層棄城一樣，無安排住戶如何離開、何日再歸……」書院則在後來退回他兩星期的租金。離開中大後，不少人到了親戚和朋友家寄居，很多人則選擇住酒店。P教授一家三口分散住，分別居於親戚、朋友家和酒店，在五星期後才搬回中大。不過，也有教職員在外僅住了兩天便回校，決定完全視乎各教員對安全的考量。

▋ 粉仔（化名）是一名新亞宿生，11 月 15 日被要求撤離時在場，「當時覺得都幾誇張，舍監真係逐層逐層 Check，叫人一定要走。」而書院也表示會退回學期餘下的宿費。學生宿舍要新學期才重開，是粉仔所料未及的，「之前仲估係（關閉）短時間。」作為前線抗爭者，粉仔以往一星期有四、五晚會在宿舍睡，其中包括大多週末，「由九月開始，星期六、日都會出去，啲嘢（Gear）都擺哂起宿。」自從宿舍關閉後，他便回家住。他始終沒讓家人知道他在運動的崗位，「佢哋唔會阻止我。不過佢哋唔知我企幾前。」因此，現時他每次外出抗爭後，為免家人擔心，往往要換衣服、整理一番才敢進家門。他說，失去了宿舍，是「失去咗一個休息嘅地方」。

他不解院方為何不盡早重開學生宿舍，「識人同屋企鬧翻，冇宿舍之後要同朋友出去夾租。」他知道校方沒有為教職員宿舍設限，也認為早前的環境檢測顯示校內環境大致安全，因此對院方做法很失望：「如果真係有安全問題，咁連員工、Tutor 都唔應該返。」

▋ A同學（化名）憶述自己在15號撤離中大。由於家庭問題，他需要長期住宿。中大二橋一役，令他失去中大的家。

兩日後，他收到堂主的Whatsapp，「佢話星期一（18號）三點可以返宿攞嘢喎。」但由於溝通誤會，A同學無法取回個人物品。在20號，他收到書院電郵指宿舍在22及25號短暫開放，他兩天都有回去，「我知自己一定會執漏嘢……」另外，他聯絡書院職員後，很快獲安排於11月27號至12月11日入住烏溪沙青年新村，每晚需付50元，其餘由書院補貼，連按金需付1000元。在等待入宿的數天，書院安排他暫住神學樓，「書院話有Friend就屈蛇，冇就訓Lobby，咁我寧願訓Soc房算。」不過，住了幾天本部的會室已令他出現敏感徵狀，「本部都有事，咁崇基都唔好得去邊。」訪問當日，A同學已延長烏溪沙的住宿至2020年1月2日，並會在宿舍開放那天搬回中大。

問到是否滿意書院安排，A同學表示：「我覺得收拾個人物品同埋神學樓嘅安排唔太好。」兩日根本不夠讓他在宿舍關閉前帶走所有物品，「加上嗰兩日執咗好多嘢，如果冇Soc房都唔知擺邊……」不過，他明白書院已盡力，「Email覆得幾快，幾日就安排咗烏溪沙畀我，仲有廚房添！」在申請延長烏溪沙住宿時，由於營地度假屋全被預訂，書院院長親自為宿生爭取開放一間後備度假屋，「第二期換咗房，大咗，但就冇廚房。」