你問我答——中大學生會

你哋點解想上莊？

咁多位 Freshmen 大家好啊！我哋係第四十九屆香港中文大學學生會幹事會——晨煦。Dem beat、踢拖周圍去、好似哈利波特咁嘅書院制⋯⋯好多人都以呢啲文化代表我哋嘅中大生活。中大就好似一條淳樸嘅村莊，呢個地方有自己獨特嘅文化，每個角落都充滿人情味，仲要有自己一套交通系統、數不盡嘅 Canteen，有人話我地自給自足添。喺呢種環境同埋文化之中生活嘅中大人，同其他大學唔同嘅地方係我哋嘅人文精神。對社會嘅關懷，對人文價值嘅追求、思考，中大人就係有呢種人文精神。唔少中大校友都走在社運前端，佢哋亦曾經係中大學生會服務過，對中大同埋呢個社會嘅付出啟發咗好多人參與社運。我哋，亦都係被啟發嘅一群。我哋一班上學生會莊嘅同學仔，係因為好鍾意中大，好鍾意香港，所以先會上呢支全校數一數二 Chur 嘅莊。我地見到中大以至香港都出現咗好多令我哋覺得不公義甚至痛心嘅問題，而我哋想透過幹事會嘅角色去參與校園事務同埋社會運動。上幹事會帶來嘅改變或者真係好微小，眼見有好多即使只係校內嘅政策或者福利，都要透過之前幾屆嘅幹事會努力爭取先見到成果，更何況係社會嘅改變呢。但我哋好想為呢個地方努力，今日嘅灌溉施肥終會有應得嘅莊稼，只係收割嘅未必會係我哋。

你哋嚟緊會關注咩校園議題？呢啲議題與同學有咩關係？如何關注？

選舉嘅時候我哋成日自稱「馬料水區議員」，做幹事會就好似做社區工作咁，校園有咩問題，我哋就有責任去反映同埋落力改善。就如過往幾屆嘅幹事會，我哋會繼續關注膳食、宿位、校園設施等議題，而今屆我哋亦有留意到一啲以往未有深入探討嘅校園議題，希望能夠同校方反映，同時身體力行去改善問題。

1) 中大人優先：不論係校巴、canteen抑或係其他校園空間，都經常發現有遊客佔用校內資源嘅情況，有唔少校園標誌淪為旅遊景點，甚至會見到旅行團拉大隊出現，嚴重影響同學仔嘅校園生活。我哋向校方反映過，正商討大型旅遊巴申請制度嘅可能性；同時鼓勵校巴司機遵從守則，拒絕俾明顯唔係同學仔或者教職員嘅人上車。宜家好多校巴問題有顯著改善，校內唔少餐廳都掛有「只供中大師生使用」嘅提示牌，希望可以減少對同學嘅影響。

2) 情緒支援：要兼顧上莊、讀書、社交等等嘅事情，加上社會嘅局勢，總會為我地帶來唔少壓力。然而學校所提供嘅情緒支援服務例如「中大有晴」成效成疑，其他嘅活動宣傳不足，難免浪費資源。我哋除咗會繼續爭取改善「中大有晴」嘅服務同埋增加駐校情緒輔導員嘅數量之餘，亦會親自舉辦流動學生會，去到校園唔同角落派糖水、busking，發放正能量，亦會舉行枕頭大戰俾同學舒壓。

3) 學生自治：大學係一個講求員生共治嘅環境，學生代表既有權參與管理層嘅決策部分，亦有部分嘅校園由學生管理。比如每間書院同埋faculty都有同學仔係教務會委員、學校大部分嘅校務委員會都有學生代表、民主牆同埋文化廣場都係由中大學生會管理等等，而我哋作為幹事會喺唔同嘅場合入面都有唔同嘅身位去為同學發聲。同時，前幾年校方因文化廣場嘅橫額或者民主牆上面嘅字眼，而屢次向學生會施壓，我哋會繼續捍衛同學嘅言論自由同埋學術自由，以及屬於我地嘅校園。

除左以上嘅校園議題，我哋亦關注到學生福利，好似本土書店優惠、福利品部貨品提供、行事曆等等，會繼續為同學爭取更多。

平衡外務同內務嘅時候有咩困難？如何解決？

外務同內務之間嘅平衡係一個好大嘅課題。莊員人數有限，特別係當反送中運動一開始，不論你係負責內務定係外務嘅莊員，全莊都要落水去參與呢場運動，有時甚至唔夠人要托書院學生會去幫我哋手，而我哋內務嘅工作係幾乎完全停濟。每個星期六日都要出去遊行示威，然而有啲常務無可能唔處理，例如藝墟、notebook ownership programme、同學book場等等，呢段時間唯有靠一兩位莊員頂住呢啲莊務。試過有一兩次喺出面嘅示威完咗返到中大已經兩點幾，幾個莊員即刻開哂啲電腦睇唔同媒體嘅live，一兩個莊員搞法援，一兩個莊員搞notebook programme⋯⋯結果又係到五六點先有得休息。當然好多內務都係延遲左處理，但當同學仔inbox查詢嘅時候都會表示諒解我哋忙緊反送中嘅事，仲會同我哋講加油添，真係好慶幸中大同學同埋書院學生會都好體諒我哋。

學生會在社運嘅角色係咩？有咩限制？

喺呢個無大台嘅時代，學生會亦要繼續好好摸索喺社運嘅角色，進退有據。宜家同學嘅行動理念不盡相同，學生會要同時照顧和理非同學以及勇武派同學嘅需要，一方面繼續積極參與和理非嘅行動，另一方面喺升級行動提供各類支援，例如法律、物資等嘅支援。而學生會聯同大專學界正正係透過呢啲支援，彌補公民社會中各大政黨、關注組嘅不足。喺未來，相信爭取香港民主自由嘅運動唔再局限喺香港本土，更要同國際社會接軌。而學界喺呢方面應該能夠比社會其他界別做到更多。

中大有全港獨特嘅書院制，亦令中大學生會喺社運上嘅處理方式與其他院校有所分別，例如資源上、人手上有唔同書院學生會支持，會比其他院校做到更多，但係同時亦由於書院聯邦制令中大嘅架構繁複，組織能力較為薄弱。

如何回應對社運有熱誠的新生？

標準答案就梗係做我哋下莊，加入權鬥，實踐抱負啦（笑，選學生會尤其係撼莊嘅話好辛苦㗎留意返）。就算唔上莊，我哋都會全力支援所有中大學生！就好似喺今年六月，中大代表會就設立咗 103 萬蚊嘅反送中基金，支援所有參與反送中運動嘅同學。又或者，你可以參與由唔同同學設立嘅組織，甚至由自己發起一個，「中大反送中關注組」就係其中一個例子啦！

無論點都好，我哋都希望大家嘅熱誠可以繼續堅持下去，守住我哋嘅家！至於晨煦都會抱住最初嘅熱誠，繼續為中大同學服務！