傳說中的 Ocamp（中）——營主／籌委對 Freshmen 嘅話 2020年迎新特刊, 50屆「深瞳」（20-21）, 生活 文 : 林灝汶 今年大家經歷過咁多風風雨雨，疫情一波未平一波又起。雖然大 O 唔知最後發展成點，甚至可能冇機會同大家講以下嘅說話，但係營主都好想講俾 Freshmen 聽佢哋準備咗半年嘅點滴，構思方向，同埋希望藉呢個機會勉勵一下各位 Freshmen。 新亞書院新生輔導營籌備委員會主席 葉子萱 今年 Ocamp 嘅主題：尋找 我們以「浮生茫茫，塵世覓芳華」作主題句希望帶出尋找的心只要不滅就可以一直抱有希望，可藉此勸勉新生在陌生的環境、紛亂的社會下繼續努力向前邁進。尋找的範圍很廣泛，可以是理想、朋友，又可以是自身的目標，寓意著我們在繁花似錦的大學生涯中應當追尋不同而又珍貴的價值及方向。 有咩想同 Freshmen 講？ 新亞嘅人好好嘅，對 Freshmen 係好似對仔女咁，我哋唔係淨係齋玩嘅，我哋想 Freshmen 玩得開心；但係都想你地知道自己係新亞人，我係好想你哋玩完 Ocamp 之後同人講我係一個新亞人。 善衡書院新生輔導營籌備委員會主席 張浩翔 今年 Ocamp 嘅主題：驀然 突然發現的時候已經太遲，一切已無法改變／挽救，任何時候都應該珍惜。 有咩想同 Freshmen 講？ 我都明白呢一年嘅 Freshmen 係最慘嘅一屆，因為各種原因冇咗佢哋嘅中學生活，咁希望佢哋呢一種失望會成為佢哋嘅推動力，令自己有一個更豐富嘅大學生活同埋喺大學裏面搵到自己嘅目標，唔好迷失自己；如果冇目標就盡量試多啲唔同嘅嘢同埋要了解多啲時事。 如果鍾意必宿嘅話就最好揀善衡啦，可能外面啲人覺得善衡好高冷，但其實完全唔係嘅，啲人好 Warm，好 Friend 嘅；同埋你入到嚟會識到好多勁人，潛移默化都會影響到自己。 崇基學院新生輔導營籌備委員會主席 李梓鈴 今年 Ocamp 嘅主題：無懼 今年 Ocamp 嘅主題係無懼，四個大組分別以赤傲暮曦作為大組字，赤傲暮曦代表嘅係四個季節，而每一個季節有自己嘅特色之餘，亦會帶嚟唔同嘅挑戰，主題節目部都係圍繞返夢呢樣嘢。我哋會想將無懼作為大 O 嘅主題，首先第一部份就係延續返上年初心呢個主題，如果係初心代表一個旅程嘅方向，咁我哋會想問吓旅程所需嘅燃料係乜嘢？我哋想問會唔會係無懼呢？其實今年呢個學年其實係一個消失咗嘅一年，我哋都想藉住無懼呢個主題去鼓勵、激勵返所有嘅同學仔，幫佢哋重振旗鼓、鼓舞士氣，希望每一位同學仔身懷勇氣面對難關。 有咩想同 Freshmen 講？ 對於 Freshmen 來講，無懼係需要嘅一個心態，始終大學係呢個新嘅階段嘅開端，新生活佢哋要面對好多新環境、交友圈會好自然咁樣遇到好多唔自然、唔了解、唔習慣嘅嘢，咁樣係好多新活動外在環境嘅因素帶嚟嘅挑戰底下，Freshmen 好多時候都要作出一個選擇，我哋都希望 Freshmen 面對難關嘅時候唔好放棄初心同埋記住每一個選擇都係自己㗎，唔好俾恐懼去搶奪咗一個人做選擇嘅自由同埋記住面對恐懼同埋挑戰先會有機會戰勝恐懼，着自己嘅鞋走自己嘅路，我地崇基無畏無懼咁樣止於至善。 伍宜孫書院新生輔導營籌備委員會主席 Marco 今年 Ocamp 嘅主題：涅磐 今年 Ocamp 嘅主題係涅磐，有鳳凰再起嘅感覺，有兩個含意嘅，一個係書院從來得兩個大組，今年有三個大組，就好似有一種重新再起嘅感覺，二來就係有一個自己嘅諗法喺度，我哋呢個國家依家遭遇到咁大嘅危難，喺重光嘅時候，希望大家思考下嚟緊我哋應該要點樣做。 有咩想同 Freshmen 講？ 我哋嘅 Ocamp 係一個畀你哋探索自己，認識中大周邊嘅事，係書院生活方面會方便啲，識多啲朋友係件好事嚟嘅，一齊去參與再去呢個再起嘅過程，希望各位 Freshmen 可以通過呢個 Camp 喺大學搵到佢哋自己嘅道路、或者世界嘅道路、國家嘅道路。 聯合書院新生輔導營籌備委員會主席 徐柏森 今年 Ocamp 嘅主題：「聯聚眾生，合映星辰」 聯聚眾生係講聯合返成班聯合嘅人，大家可以喺呢個 Ocamp 重新聚集過一齊，合映星辰聽落好中二病，其實希望重拾往日聯合嘅光輝咁樣。 有咩想同 Freshmen 講？我諗 Freshmen 對於玩 Ocamp 都有佢嘅憧憬喺度嘅，Freshmen 嘅心態對於 Ocamp 其實都會好期待，因為係第一次接觸書院同埋學校嘅人。我哋都希望 Freshmen 可以喺呢個 Ocamp 裏面玩得開心，但係同時間 Freshmen 都要留意番自己嘅情況，如果自己有不適嘅話都唔好話夾硬要來，關於疫情今日都有好多唔穩定嘅情況。我覺得今年除咗幫 Freshmen 同埋輔員 Build up 返歸屬感之外都要好注意安全同埋衛生，我哋籌委多會盡力搞埋個 Camp 佢。「嗰四個大組長好靚仔，呢啲人好玩得㗎」我哋今年嗰啲節目都豐富嘅，濃縮到三日都好好玩，唔好去咗一日就唔去第二日咁樣，我哋每日都有唔同嘅活動。咁至於我哋書員有咩特色，我哋有好多唔同嘅活動，我哋有本身固有六個舍堂文化，同埋唔同嘅短莊，詳情等你地入到嚟先講你畀哋聽。 逸夫書院新生輔導營籌備委員會主席 梁馨駿 今年 Ocamp 嘅主題 ：「青春躍動，編織回憶仲夏夢」 主要都係想吸引返 Freshmen 嚟玩啦，因為我哋都唔想好刻板咁樣，大家都明白學生有一啲社會責任去融合返政治元素喺入邊或者書院裏面本身有啲嘢傳達比佢哋，不過對於新生嚟講最緊要係吸引佢哋嚟，我哋想將個主題 Set 到比較大家都玩得開心大家，可以喺 Ocamp 裡面得到唔同嘅回憶，仲夏夢呢個字都相對比較夢幻、比較靚，希望佢哋可以多啲對於書院有比較好嘅幻想從而去參加呢個迎新營。 有咩想同 Freshmen 講？ 我認為玩 Ocamp 對大家都係一個認識新朋友嘅環節，建立大學嘅圈子，尤其是對於新生嚟講。無論大學同社會都有好多輿論話係咁嘅時勢都仲玩 Ocamp。雖然上年都俾人鬧到依家㗎啦，上年係社會責任、今年係肺炎；但係始終都係入大學第一步，其實你都要明白，冇咗呢一個機會同大家交流，嚟緊之後喺書院入面就冇呢個機會再識大家，呢個就好似中學老師焗你五年，我哋就焗你四日咁樣。希望大家都有一個機會玩一次迎新營，當然希望大家身體健康，逸夫書院迎新營會係九院裡面最好玩嘅迎新營。 晨興書院新生輔導營籌備委員會主席 李宗諺 今年 Ocamp 嘅主題：環球 我哋書院 Student body 嘅比例有不同種族，有香港人、內地生、外地人，我係希望唔同國籍嘅同學都可以展示下佢哋嘅文化，所以我哋決定咗用環球做主題，譬如畀佢哋講吓自己國家嘅節日可以做啲乜嘢，令到佢哋覺得好似有一種環遊世界嘅感覺，尤其是係呢個疫情底下困喺自己國家都好耐，可以有種攤唞下嘅感覺。 有咩想同 Freshmen 講？ 我首先會簡單啲講句加油啦，我哋依家係一個十分困難嘅境況入面，我哋遭受到政治嘅迫害又有疫情嘅夾擊。我覺得做大學生做 Freshmen 第一年就要應付咁多嘢，我相信係一個好艱難嘅時期；我係身同感受嘅，因為我哋上年 11 月嗰陣校園俾人入侵，我好痛心，見到個校園着晒火咁樣，滿目瘡痍，我覺得係好心痛嘅一件事；咁後來就遇到二月嗰陣嘅武漢肺炎令到我哋停課，又冇得見到呢個校園都覺得呢一年係好難捱。我相信未來都唔係一段比較容易行嘅路，我就希望 Freshmen 可以喺呢個咁辛苦嘅境況入面互相扶持，盡你嘅所能去識多啲人、做多啲你自己想做嘅嘢、利用呢四年去發掘自己嘅潛能。 和聲輔導營節目部部主 Edward 今年 Ocamp 嘅主題：初心 有咩想同 Freshmen 講？ 今年嘅主題想做返初心呢樣嘢，點解揀初心呢？唔好講話社會點樣先，講返大學；好多籌委都係升 Year 3，我哋所讀嘅書、所識嘅朋友真係同我哋入大學嗰個理想係好唔同，雖然都係自己揀嘅選擇，但有時候會覺得好迷失，點解我要去做呢啲咁嘅嘢？點解要我讀呢一科？但大學實在太多嘢，讀書、上莊呢啲嘢你仲記唔記得你當初想要點樣嘅大學生活；我哋唔單止要提 Freshmen 一定要保持記得返你當初想入大學讀過嘅每一科嘅初心或者提返爸媽籌委點解要去揀做爸媽籌委呢樣嘢？ 如果係講返社會由上年 6 月去到而家嗰個輿論同埋方向好多嘢都變咗。理想都已經唔同咗，好多人話我當初要留低抗爭；而家就話點樣移民最好、我好驚喎。想講返真係同初心都幾違背，真係會忘記，忘記咗就咩都冇啦，我想提返佢哋唔好唔記得咗當初做每件事嘅原因。 分享至:
