代表・會 2020年迎新特刊, 50屆「深瞳」(20-21), 組織 訪、文:TF 代表會,中央組織裡面立法嘅角色。唔少同學對佢都唔熟悉,甚至完全沒聽說過,但其實代表會所做的事,都與同學息息相關,甚至對同學影響很多,去多加了解未嘗是一件壞事。筆者邀請到第 50 屆中大學生會代表會主席葉子萱進行訪問,去讓同學更認識代表會。 代表會其實係乜野嘢嚟? 葉:中大學生會呢個架構其實就好似一個模擬政府,有所謂三權,行政:學生會幹事會;司法:司法委員會;立法:代表會。代表會喺行政角色上,主要係審議一啲條例草案、批款等等。同時亦有監察作用,好似立法會監察政府一樣監察中央三莊,即係幹事會同校媒(學生報、電台)。加上部份會務亦會同代表會有關,例如屬會[1],有中大學生會轄下好多嘅屬會,例如麻 Soc、或者唔同系會、院會等等,而代表會轄下嘅屬委會都會幫佢哋註冊[2],同埋監察佢地嘅運作。呢啲就係代表會嘅功能。 代表會嚟緊想做咩? 葉:今年主要想做到提升議會透明度。因為見到往屆會議入面即使有好多幫到同學嘅嘢,例如唔同基金、會章改革、完整議事規則等等,但係同學其實唔知道,因為代表會透明度唔高,同學唔會覺得代表會嘅影響係啲乜,從而會影響到代表會喺同學心中嘅位置,做成一個好似 Cosplay 緊嘅機構。其實我哋好想擺脫呢樣嘢,畀同學知道我哋做緊啲真係幫緊同學嘅野,所以第一樣就係想提升透明度。大家亦可以見到,我哋今年會多咗好多會務嘅報導,例如 Facebook 會更新 多咗,亦會公開會議文件,會議記錄都想執返緊,因為往年冇嚴謹嘅會議記錄,呢個係初步做緊嘅。另外有好多修章嘅事情想做,我哋見到好多章則上其實仲有爭議嘅空間,例如上一屆代表會會期中,出現選章[3] 與會章[4] 有少少出入,變相取消學生會幹事會參選資格,而取消資格亦唔係第一年發生,之前亦都發生過好幾次。好多時因為對會章詮釋、理解有唔同,今年我哋想有多少少修章嘅部分,希望將一啲唔清晰嘅部分變返清晰。 代表會與同學關係? 葉:的確,代表會同同學之間仲係有距離,因為中大同其他學校嘅評議會或者代表會唔同,有書院聯邦制。佢哋一個評議會或者代表會比較多權;但中大代表會唔同,會尊重書院聯邦制,當中好多實權都係歸返書院學生會,或書院評議會,所以我哋同同學之間嘅距離的確比較難打破。所以我哋希望透過提高代表會透明度,令距離可以近返少少。我哋嘅設、更新社交平台嘅頻密程度,都希望畀同學知道呢個議會發生緊乜嘢事。另外章則好難理解,其實都明白,但我哋嘅任期啱啱開始咗兩個月,我哋之後會嘗試去向同學解釋,某啲章則點解會咁寫,點解會議要跟從呢啲章則。 今屆已經召開五次會議,但有兩次流會,可以點樣改善? 葉:今年嘅情況比較特別,有啲書院因為疫情嘅關係搞唔到選舉,例如 UC 同敬文。當代表少咗,有想積極參加代表會嘅人未必有資格,或者冇方法入嚟,令熱心參與嘅人少咗。過往幾屆流會嘅比率都非常高,好似第 48 屆召開 40 幾次會,有十幾次流會[5];第 49 屆因為社會事件、疫情,開會次數少好多,只係得九次[6],我覺得流會好講嗰陣時嘅形勢。如果睇返之前嘅話,第 47 屆全年召開廿幾次會,只係流左九次會都幾理想嘅[7]。流會係每屆都必然要面對嘅問題,如果要改善呢個狀況,我覺得要令代表知道自己嘅責任係乜,同埋令成個議會有返議政氣氛,比佢哋知道自己嘅工作係咩。不過因為依家唔同書院都有當然代表,佢哋係書院入面已經好多工作,本身已經係書院學生會、代表會、評議會,根本係分身不暇。呢啲情況係根本性嘅問題,因為中大入面冇普選代表,再望返中代結構,書院民選嘅代表唔多,所以其實要代表全心全意去處理代表會嘅事務,係有困難。 對於被批評權鬥/Cosplay,有咩睇法? 葉:如果話 Cosplay 嘅話,定義上你有好多外在嘅野例如形式、對白你要跟足,而內在好多係冇可能似,冇可能跟足,即係日本動漫你唔會真係嗰個角色咁。但係我會回應嘅係,的確我哋有三讀、議事規則,好多都跟立法會,但其實我哋做緊嘅野真係幫緊同學,例如屬委,係畀緊一啲位份、監察屬會;又例如同學向我哋投訴一啲組織,我哋要成立委員會跟進,又或者係錢、撥款嗰啲,唔係話得個吉,入面真係運作緊。所以如果你話我哋 Cosplay,如果嗰屆有佢哋做得唔好、不足嘅地方,話我哋 Cosplay 嘅話我會接受呢個批評,但我想講代表會嘅本質唔係一個 Cosplayer 。 另外就係權鬥,其實我都唔知講緊鬥乜嘢,代表佢哋有權係因為民意授權,民選或間選,例如書院學生會或者評議會嘅主席,佢哋做到嗰個位所以入到代表會,的確係有權。代表同代表之間所謂爭鬥其實又唔見得多,如果一個議案大家唔同取態視為爭鬥、權鬥,未免過度理解,大家只係互相討論下,當中有啲唔同意見。至於代表同中央三莊嘅關係,往屆可能都成日聽到唔少聲音,往屆我就唔評論,剩係講今屆。唔同代表有自己嘅睇法,好多代表覺得三莊做得好嘅,就即刻過,或者褒獎;有啲位做得不足,或者對比往屆差咗少少嘅,咪畀返意見,我覺得好多代表都係抱持呢個想法。有唔少位會章係寫咗嘅,咁代表要做嘅就係跟返會章去做。會章有空間嘅地方咪討論;冇空間咪跟住做,除非修章。所以點解一直以嚟都提倡修章,就係因為遇到好多爭拗,或者見到好多討論,我覺得有啲位係要去改,而我哋今屆會盡力去做。 有咩想同 Freshman 講? 葉:大學要嘗試嘅嘢好多,有好多係你哋唔會理解嘅野。用我做例子,我 Year 1 做電台,被取消資格,嗰時會覺得代表會係一樣好無聊,理解唔到代表會有乜嘢權去取消資格。我會發現,大學呢個中央架構,其實就係模擬緊一個真實嘅社會,有行政、司法、立法,而事實係當讀完大學踏入社會。我覺得呢一個係一個過渡。Freshman 唔適應好正常,但我哋要嘗試去理解,或者嘗試去認識呢個制度。 [1]:屬會,同屬下團體,見學生會架構。[2]:屬委會,屬下團體委員會,代表會轄下常設委員會,負責責監管及登記屬下團體。[3]:選章:選舉章則,用於中大學生會週年大選及補選。[4]:會章:香港中文大學學生會會章,為學生會最高法則。[5]:根據代表會會議記錄,第 48 屆召開 42 次會議,27 次成功召開,15 次流會。[6]:根據代表會會議記錄,第 49 屆召開 13 次會議,9 次成功召開,4 次流會。[7]:根據代表會會議記錄,第 47 屆召開 26 次會議,21 次成功召開,5 次流會。 分享至: