理想與麵包怎麼揀 ——三位前路茫茫的中大生

文、訪： 交叉嘴

學生，將來要面對更嚴峻的新聞自由情況；被譽為「讀神科」的法律系學生，在法治與法律制度的倒退下無所適從；被不少人當成「鐵飯碗」的教師一職，也可能隨時因為說錯話而丟失飯碗。不久將來，甚至可能只有成為大公文匯的「記者」、國安法「法官」、培養學生愛國情懷的「教師」之流，才能在行業內保住飯碗。面對這茫茫前景，一眾學生仍堅持想要冒險踏入這些相對敏感的行業嗎？他們要如何面對理想與現實的差距？這次的訪問，筆者請來了三名中大學生談談自己的想法，他們就讀的科目受政治環境改變而影響深遠，對於「理想與麵包怎麼揀」各有一番體會。

曉澄，中文教育系學生，希望畢業後成為中學老師，與學生建立亦師亦友的關係。他形容老師的就業前景不太理想：現時學生人數不足，常有縮班殺校的情況，加上業界換血速度緩慢，令學校對畢業生需求下降。同時，老師很難適應學科改革，也要面對不同審查或打壓，不能暢所欲言，無論是準備教材，還是在課堂上與學生活動，現在都要加倍小心。

K（化名），法律系學生，未確定未來想從事的行業。一般人會覺得讀法律系「好勁」、「神科」，將來一定做大律師、賺大錢，K 卻不以為然。讀完四年法律學位後，眾畢業生還要面對各種「爭崩頭」的環節：包括爭奪由三間香港的大學所開辦的法學專業證書課程（PCLL）、找律師行僱用自己等。在近年的政治風氣下，打壓更為嚴重，許多律師想幫助被官司纏身的示威者，卻因此面臨種種後果，最後不但無法幫助他人，也無法自保。在種種現實考慮下，K 並不傾向加入法律界。

Hermes，新聞及傳播系學生，理想是成為本地的新聞記者，但也深明理想與現實差距太大。新聞自由急劇倒退，大家有目共睹，新聞機構內更是紅線處處，就算是軟新聞也未必有容納的空間。因此 Hermes 認為，自己想做的，是在現實中做不到的記者。

當初點解揀呢科？

Hermes：「我個人係啲有嗰句講嗰句嘅人——當我對身邊嘅人都係咁嘅時候，我覺得呢個社會都應該要係咁。（笑）你要記得，我哋當時揀呢科，個時空冇咁壞！」

曉澄：「我覺得要改變人嘅諗法，甚至導人向善嘅話，老師做到嘅比較多。要影響一個人嘅想法或者佢成世人嘅路，應該係要從小培養起。除咗屋企人以外，細路最常接觸到嘅就係老師。所以，如果想改變未來一啲大眾嘅諗法，老師係比較有機會做到（呢件事）嘅。而我都鍾意將自己嘅知識傳授俾人，當中嘅成功感係大嘅。做老師唔係淨係教書——當然有教畜會淨係教教學大綱嘅嘢，完！四點半收工走人，但我唔希望做呢類老師，而係希望做到亦師亦友。學生對你嘅信任越大，你嘅說話權就越大，對佢嘅影響亦越深。」

K：「我係喺 19 年 6 至 7 月嗰陣揀科嘅，嗰陣 6 月有逃犯條例修訂，見到好多人反對，又會轉發懶人包，整合所有嘢，俾我一種『餵埋嚟就食』嘅感覺。我唔係直接否定佢哋，但我會諗，有冇方法可以俾自己睇到成個情況呢？想讀法律唔係因為將來想做大法官或者點，而係想認清香港嘅法律制度係點嘅一回事、知道少少中國係點，因為要知道最根基嘅嘢，先可以作評論。人哋話逃犯條例唔好，我就出嚟遊行示威，係冇意思嘅，好似成班愚民咁。」

大學本科課程的期望與落差

筆者：「呢個課程畀到你嘅嘢，同你嘅期望一樣嗎？」

K：「所有嘢變得太快，蒙面法、國安法、反制裁法，太多無中生有嘅條例，我會希望呢四年嘅法律訓練，至少係種思維訓練，訓練我全面啲諗嘢，但咁樣其實都好理想化，因為課堂同現實好脫軌，教嘅知識好硬邦邦。我哋上堂同埋應付功課考試就係自己睇案例、睇 reading，但案例根本冇可能睇得曬，考完試又會乜都唔記得曬，好似乜都冇讀過咁。比較貼近社會嘅可能係讀憲法，講行政、司法覆核，但都係睇案例，而案例就係基於網上出嗰份判詞，成件事好死板。例如，佢唔會討論啲人攞法援有幾難，唔會有前文後理說明案例。

而啲教授有一部分係啲『老欸欸』嘅外國人，我哋彼此都唔知道對方嘅政治取態，你有你讀，佢有佢教，有一段距離感。例如，教授會同我哋講，『如果你嘅當事人被警察拉咗，佢又唔俾你見律師，咁你就唯有等啦，記低啦，問吓佢可唔可以否俾你見你當事人啦！』聽完會覺得，你係咪玩 X 我？」

Hermes：「我會希望學到啲實用技巧，剪片、拍片、採訪、寫文，點樣引起迴響，點樣觸動人心。我覺得最貼地嘅係學到要做好人，呢個好大程度係受同學同老師影響，新傳系入面啲人係好多交流，呢個可能同其他科唔同。我哋成日要同人做專題、一齊夾嘢，同老師都好親近，我甚至試過喺 Eva（系內一個教中文新聞嘅老師）間房喊，因為我覺得呢個世界已經冇空間俾我做一份好嘅新聞。當我身邊最親嘅人都同我講，呢個世界冇救㗎啦，我喺新傳不斷接受緊嘅教育，就係要我做最真嘅自己，所以我學到嘅係保持自己初心。」

曉澄：「我會係想學啲實用嘅、直接影響我教書嘅嘢，例如落到課室點樣管住一班學生、點樣喺培養學生對呢科嘅興趣同時，確保佢哋 DSE 考得順順利利，但讀呢科唔算學到呢啲。我哋學嘅，有一部分係 EDUC course，會教兒童心理學、學校結構等，唔直接關課堂上點樣教書事，但都算有用嘅嘢。另一部分係中文系嘅嘢，唔係教將來嘅教書內容（如卷一二三四），而係中文本科知識，例如讀甲骨文、讀古文、讀點樣評論作品。新傳會寫新聞，法律會直接讀刑事罪行嗰啲，但中文教育係好似報緊唔同興趣班咁，例如呢個 course 教古文，我就學識咗點樣將古文翻譯做白話文，但呢啲嘢對將來工作都係冇用嘅。雖然我哋有中文教育及教學法，但成個課程都係得兩個 course。

再者，老師係講求經驗嘅工作，但我哋喺四年級同五年級先有實習，我哋要自己搵大型補習社，先接觸到教大班嘅經驗。雖然大學都有提供機會，例如做書通助教，但都唔係本科提供嘅資源，我哋想儘早攞經驗要自己搵、自己爭取。」

工作熱誠與現實環境

Hermes：「我覺得你啱啱講咗樣嘢好令我深刻嘅係，呢個唔關我哋讀咩科事，而係讀得啱唔啱科，好似你咁，相比中文更鍾意教育，教育咪啱你，而我好彩搵到科自己鍾意嘅，又開心嘅，咁咪好囉。新傳系今年喺中大嘅收分應該都算低，但仲有一班人話要入嚟做新生，又有一班人話要轉入嚟，你會知道，讀大學係為咩呢？開心囉、鍾意囉，唔係個個都鍾意讀書，但如果讀呢科係為咗開心嘅，咁咪好囉。」

曉澄：「不過我一開始讀呢科唔係為咗自己開心，當然興趣係一個根基，但我諗更多嘅係，將來有冇飯食。但入嚟後，我發現如果真係可以揀到自己讀得開心嘅科（Hermes：咁就冇飯食㗎啦！）可能就冇飯食，但至少出到嚟都係做緊自己熱愛嘅嘢，可以保持到一份對工作嘅熱誠，係一件好好彩嘅事。希望我將來都會保持到份教學熱誠，因為頭先聽 Hermes 講，你嗰科讀得開心，可以保持住份熱誠。」

Hermes：「其實都好視乎遇到啲咩人，如果我唔係喺中大讀呢科嘅話，我諗我好難會繼續有呢個初心。」

曉澄：「但可能我哋（曉澄與 K）遇到嘅教授，就係純粹講書，幫你勉強應付到個考試、交曬啲功課，就完啦，變咗冇咩人情味，好似唔知自己做緊啲乜咁。當然會有教授令我覺得中大都仲有有心人，不過出到嚟社會就係另一回事啦。」

K：「我哋呢行（法律界）本身好『blue blood』，講求關係得嚟又好『圍威喂』。我家人本身冇人喺法律界工作，而學院冇提供實習俾我哋，我哋要自己去乞求律師行收自己，或者朋友搭朋友咁搵機會。而啲法律界老屎忽，好似喺另一個世界生存咁，啲教授又好冇人情味，呢個都引申到點解我唔想做律師。我知自己冇勇氣做人權律師，衝鋒陷陣、日日守差館，亦都做唔到平庸嘅律師，因為將來畢業後環境會改變，到時我可能要變成自己依家好鄙視嘅國安法法官，咁樣好核突、好噁心。既然我知道將來自己有機會會屈服，成為依家新聞見到嗰啲法官，點解仲要向嗰個方向行呢？相反，見到依家喺電視台做緊港聞個班記者，真係好有心，好有衝勁。就算係做環境保育呢啲軟新聞嘅記者，都好有心，做得記者至少有一半都係好有熱誠、願意發聲嘅。而做律師嘅，好多人都係為錢，因為佢起薪點都高。（編按：都有一部分係做大公文匯嘅，但冇人為錢做記者係真。）」

曉澄：「通常有人情味嘅係細型啲嘅律師行，大家好有熱誠，係一個律師應有嘅樣貌，有熱情、真心想幫個客，而唔係好似大型律師行咁，啲人淨係為賺錢、打份工。喺細型律師行工作會更加容易保持份熱誠、更開心，不過呢啲機會未來會越嚟越少。大律師公會對律師行嘅打壓會更加嚴重，佢好容易可以捉到痛腳，鏟起成間律師行。好多新一批嘅律師想幫手足，但佢哋自己都好難搵錢維持生活。我阿爸本身做開律師呢行，都唔想我讀法律，因為知道未來條路會好難行。身為最直接受政治、法律影響嘅人，究竟你係會本住初心， 即使冇飯食都要繼續做，定係因為現實打壓，最終迫於無奈跪地呢？」

神科與乞食科的將來

K：「香港人覺得做律師、讀專科一定搵到錢，覺得做記者、讀社科就係乞食，但真係咁咩？我阿媽啲朋友做大律師，都覺得自己唔使十年內都會失業。依家國安法嘅案件，可以冇陪審團，兩三年後，可以連律師代表都唔需要了，當事人自己答辯。咁不入再過五年，連個庭都可以執埋，警察拉完後直接坐監，一條龍咁。」

Hermes：「我哋新傳被譽為乞食科，但其實喺呢個局勢，任何科都可以變成乞食科。我頭先講讀大學係為開心，似乎有啲太理想。我本身家底唔係好有錢，父母由細到大灌輸俾我嘅諗法係，開心最緊要，所以我好少會諗將來有冇飯食。我覺得只要我夠叻，去到邊度都叻。無論讀咩科，只要做緊啲自己叻、自己開心嘅嘢，就點都會有啲路行嘅。我雖然好天真好理想，但唔係完全冇諗過現實。讀咩科都好，都要出去試其他嘢，我自己都會搵其他出路，例如拍嘢、做電視台。就算喺大學入面，搞 Ocamp、上莊都可以學到好多嘢，除咗有理想都要做吓實際嘢，世界唔轉，咪你轉，有啲技能或者知識，就算世界倒塌、香港變到唔再係香港咁，都可以用到嘅。」

K：「我覺得如果放得低『讀完呢科要做呢行』嘅包袱，會開心很多。雖然呢個包袱係好大，但我自己都放棄咗一半。我覺得唔好做死一樣嘢，讀呢科都唔一定做呢行。因為我本身對呢科、呢行都冇太大憧憬，都接受咗現實。身邊啲朋友成日同我講：『得㗎啦，你做執業大律師，真係去執樹葉嗰種執業！』不過，我覺得就算自己最終做唔到律師，或者選擇唔做，都唔會覺得後悔或者可惜。呢四年大學生活，喺學業方面並唔係完全空白一片嘅，中大仲有大通、書通、free electives、上堂同人相處，東拼西湊，都有嘢袋落袋嘅。讀法律亦唔係完全冇用嘅，日浸夜浸真係可以刺激思考，睇世界會唔同啲，無論係令我睇到好定壞嘅一面，佢都開闊咗我嘅眼界。」

曉澄：「我嘅取態係見步行步，未來嘅嘢唔係我可以控制嘅，我唯一可以控制嘅係我把口、我個腦。我明白將來做老師未必可以講到好多敏感嘅話題，但都唔可以對住學生講違背自己良心嘅說話。我喺網上見到有啲細路歌頌主席、叫人做『暴徒』，都會覺得好心悒，咁細個已經咁，大個點算？所以，我希望透過微小嘅力量，喺自己嘅能力範圍內作出改變。」

K：「如果將來自己嗰行真係完全咩都做唔到嘅話，咁每個人都可以有自己嗰行以外嘅崗位，退去另一個位置，都可以幫到人，只要保持住呢個心，做正確嘅事，對得住自己良心就好足夠了。」

有甚麼想對揀哩科的師弟妹講？

Hermes：「讀新傳唔一定做記者嘅，但如果有心做記者，就讀新傳啦。就算冇呢個心，入咗都應該唔會後悔，因為新傳學到嘅嘢，唔止係做記者。裝備自己、學唔同嘢、認識多啲人，係我拿捏理想同現實情況時俾自己嘅中間點。山不轉，路轉，路不轉，咪人轉，最緊要做自己。」

K：「如果揀法律嘅話，要有心理準備好多嘢會變，無論係法律條文，定係成個大環境都一樣。唔好覺得自己入咗所謂神科，就可以平步青雲、賺大錢、好有社會地位，因為真係唔知道未來會發生咩事。如果你覺得自己係上流人士，但出到嚟面臨失業，只會好痛苦。即使你對法律界充滿熱誠，目標清晰，都應該曠闊眼界，呢個課程好闊但同時又好窄，好似學到好多法律嘢，但又好似咩都學不到，所以盡量搵嘢學吓啦，如果唔係出到嚟會發現自己咩都唔識。」

曉澄：「如果有人經歷完疫情、社運，辛苦考完 DSE 後，仍然堅持想揀哩三個比較有風險嘅學科時，我諗都證明咗你哋有決心，而且目標清晰，知道自己做緊乜。做老師嘅話，係會影響人一生，希望大家確保自己有教學熱誠，而唔係淨係為咗份糧先讀中文教育，難聽啲講，唔好做教畜。哩科唔算鐵飯碗或者高人工，收分又唔算好低，我相信揀得哩科嘅人，點都係有啲興趣嘅。如果你有教學熱誠，每次讀得好辛苦、好迷茫嗰陣，就諗吓自己嘅初心，諗吓當初點解要揀呢科，就可以捱過了。」