訪問反星巴克行動

受訪者：Timothy、言仔、鍾穎、Johnny
文：南書

一群以一年級生為主的同學，眼見黑心企業星巴克進入中大，短時內組成反星巴克行動，組織論據及行動，希望說服善衡同學，合力將星巴克掃出中大。

為什麼會組織／參與行動？
Johnny指，「細細個就已經聽過星巴克啲仆街野，一毫子都冇落過星巴克袋啊。」而隨著一家經常光顧的小型咖啡店因捱不了貴租而倒閉，開始思考消費倫理的成員鍾穎，表示香港的營商環境已不利非大型連鎖的商舖，大學內的店鋪餐廳不須被商業因素主導，實在不需要助紂為虐。言仔則說：「揀中大就係因為感覺有人文氣息，同其他大學唔同，簡直係世外桃源。我唔想一個咁好嘅社區俾無良企業污染左！」

有不少善衡同學認為行動滋擾（sip紙、洗樓）及激進（血染行動），你們如何回應？
Johnny說，「唉，真係要向同學仔講聲：打擾晒，唔好意思。希望佢地理解到，我地洗樓真係逼不得已。同善衡學生會相比，我地宣傳力度極不對等，根本搵唔到機會同善衡同學溝通」。亦因苦無渠道表達意見，為引起同學關注言論，才在派發「反星巴黑紀錄」同時，進行「血染星巴克」之行為藝術。鍾穎指，「其實我地無誇張到，飲starbucks同飲農民啲血有咩分別啊？我地唔係淨係嘩眾取寵，係有野想同同學表達。同埋，其實啲「血」甜到嘔，做行為藝術嘅幾位同學仲要事先排練幾次，佢地做完之後話，個口麻痺左一日，食咩都無味。」

對投票結果有何看法？
反星巴克行動成員都表示，議案獲通過，是意料之中，「我地理解同學意向，但係，見到中大最後把守唔住，好失落，好傷心。」言仔認為行動組宣傳渠道極少，同學多數只接收到善衡學生會的資訊，並且因抗爭行動而對其反感，拒絕與行動組溝通。沒有與善衡同學正面接觸的機會討論的機會，讓同學了解行動及理據。

外間很容易把反星巴克行動與中大學生會連上等號，行動有否因要顧慮兩書院關係而受限制？
Timothy澄清，中大學生會幹事會、學生報只是支援，而不直接等於行動組。「顧慮一定有，寫文章果時，用每一隻字都要諗過度過，好怕觸動善衡同學情緒，令佢地因為討厭我地而投支持票。」Johnny表示善衡學生會態度很奇怪，「其實有好多彎可以轉，比如中大學生會見善衡學生會第一次發嘅聲明有不實之處，中大學生會曾經去信，希望佢哋澄清返，唔好因為不實聲明令兩個學生會發生誤會。但佢地改完都仲係失實，更啄住中大學生會唔放。」言仔即表現無奈地說，「很多嘢我地控制唔到。明明，明明只係想批評星巴克，唔知點解就俾人話我地針對書院。成個過程，對立氣氛好濃烈，根本就無討論空間！」