「冇人上咪我上囉」 ——訪書院代表

文：關靖豐

講起中大學生會，好多人都會諗起曝光率較高嘅中大學生會幹事會，但三權分立嘅學生會裡面，仲有其他組織，包括作為最高立法、監察、民意代表機構嘅中大學生會代表會。呢篇文就訪問到獲選為中大學生會代表，兼任書院代表嘅Ruby，講下書院代表同中大代表，點樣喺大部份人參政意欲低迷嘅情況下，仲堅持就書院同學校嘅政策發聲。

書代做啲咩㗎？

書院代表會係服務書院嘅同學，你可以當佢係一個立法會，負責監察行政部門， 即書院嘅學生會幹事會。 書院幹事會係由書院學生投票選出嚟，書院代表嘅工作就係要定期call meeting、審核工作計劃、財政計劃， 然後到幹事會落莊嘅時候就審核工作報告、財務報告。 如果幹事會冇人選嘅話， 書院代表會就要委任一個臨時行政委員會，確保書院學生會嘅基本日常運作。

代表會之下設有唔同嘅常務委員會，例如選舉委員會同膳食委員會。每間書院嘅代表喺學生膳堂委員會嘅權力都唔同， 即係有幾多人入到去委員會，書院代表嗰一票有冇否決權，都因書院而異。膳委會入面嘅書院代表揀餐廳時會試食，選擇價格相宜、最啱食、適合同學嘅 canteen。中大學生會代表會入面係有書院代表嘅，呢啲都係要我哋書院代表舉辦選舉選出嚟。 另外仲有書院通識檢討委員會——有啲書院係有週會同final year project嘅，噉書院代表就可以睇下書院通識可以做啲咩去配合，等同學真係學到嘢。

都冇人care，點解仲上書代？

你問同學會唔會理我哋做緊啲咩，或者校政對於佢嚟講有幾重要，我覺得大部份都唔係好理書院、中大嘅校政，即係同好多民主制度成熟嘅社會一樣：選民覺得佢只要投左票，選左個代理人出嚟，佢就可以唔駛做。但佢哋唔理，我哋係咪就唔駛做呢？唔係：一嚟，參與校政係我嘅個人實踐；二嚟，我哋作為一個知道參與校政係重要嘅人就應該教育其他同學，透過社交媒體嘅宣傳，報告自己嘅工作等，俾同學明白佢哋嘅責任唔係投票噉簡單。另外，當參與校政嘅空間會喺五年內會進一步縮細，參政呢樣嘢就變得更加重要。
但其實都唔係冇人理校政嘅，我都見到今年有同學一入學就有志選呢啲位，而當我見到自己書院嘅幹事會出缺，覺得始終都要有人做哩啲工作，噉冇人上咪我上囉。一開始上書代嘅時候都唔係好知大部份工作係做

咩， 我初初當佢係踏板：喺書院代表會做一陣嘢就可以上到去中大學生會代表會。但係做耐咗先發覺原來佢嘅架構絕對唔係一個踏板噉樣——書院代表會做嘅更多係書院內部工作，例如啱啱講嘅書院通識，你會覺得係更加貼近書院同學仔嘅工作。 我諗上書院代表會最重要嘅就係你要對書院有一定的歸屬感，然後透過服務又會鞏固返呢種歸屬感。

書代同書院依家嘅關係係點樣？

我哋書代嘅工作係服務同學， 所以所有書院嘅政策其實都係關我哋事嘅。你可以當我哋係書院管理層同書院嘅同學之間嘅橋樑。 譬如每間書院都有佢嘅學生輔導處，我哋都會同啲 staff 比較熟，每當書院有出啲咩政策時就會即刻同佢哋傾，好似之前住宿要打針嘅政策，你都係直接同書院學生輔導處嘅staff去傾。所以我相信我哋關係比較密切嘅。

至於書院同大學高層嘅關係，係冇想大家想像中噉分立，噉聯邦制嘅。但我會話書院同大學嘅權力始終都係唔對等，我見到中大嘅高層某程度上係superior than 書院。 原因簡單嚟講係錢嘅問題——中大管理層每年都會向立法會、校董去拎錢，之後透過資助畀番書院。 你會話：「書院都有錢㗎」，但書院最大嘅收入就係住hall嘅宿費，之前一九年嘅社運同埋疫情令冇乜人住hall，或者全部要入住單人房噉，其實已經令到佢哋嘅收入大減。資金嘅缺乏同埋需要令到佢哋更加依賴大學，之間嘅關係變得更緊密，所以聯邦制嘅意味係愈少。另外，學校亦以疫情為籍口趁機凌駕以往嘅權力架構，一嚟就話因為中大裏面爆咗疫情，要開咗特別小組，變咗係高層同所有書院講個政策，得到共識，然後話「住hall要打針！」噉。所以依家嘅書聯邦制已經係名存實亡， 尤其喺處理疫情或者一啲政治議題時。 書院、校方高層同我的關係係點樣，你可以諗成係公權力同我哋關係，只係究竟佢對我哋和善啲，定一出事就同我哋割席。

點解上完書代仲上中代（中大學生會代表會）？

啱啱都講到我本來就有志參加中大學生會代表會，處理多啲針對成個中大嘅政策。 尤其見到依家嘅書聯邦制，大學以疫情、「國家安全」等等嘅原因凌駕書院嘅剩餘權力。 做書院工作時，成日都得到啲feedback話「冇呀高層話要噉做， 我哋都冇噉多say」，所以我諗噉不如我去做埋中大學生會代表會，去處理呢啲問題，例如之前就傾過閘機工程。 你可能想做好多嘢，但學生嘅權力同校方高層權力本身就唔對等。 所以我哋入到制度內其實唔係做到好多嘢，而更加多係發聲、 表達。就算同高層開會，高層最後都係會用唔同手段去拖延你、耍你。 有啲人會覺噉得係嘥時間， 但我會覺得有呢個必要去做。 起碼就算個制度冇用，都要畀人睇到個制度冇用， 然後俾人反思要點做。 因為我覺得學生代表之所以存在，係因為同學唔得閒理 ，所以要有人去傳達佢哋嘅聲音。 但係當我哋呢啲代表都做唔到嘅時候，就要返去權力嘅起點——每一位學生應該要點樣做。

我都唔知書院代表會或者中大學生會可以存在到幾耐， 尤其當見到間學校變成噉樣。我自己都有被捕、被休學嘅準備，但最重要係當我哋呢啲代表唔存在嘅時候， 真正有權力嘅其實係每一位中大學生。 如果我哋冇咗權力，我希望多啲同學可以補上呢啲位：無論係頂替呢個角色，定係喺自己範圍裏面運用自己權力，呢個先係最緊要嘅嘢。 所謂嘅學生代表除咗係代表同學，亦都係教育番同學，等大家知道自己有呢啲權力——我哋有權bargain，而唔係話「冇㗎啦」「我哋喺呢一間學校就冇㗎喇」。 希望有更加多有識之士去補我哋呢個位，或者喺其他渠道實踐自己理想。