大學「三改四」專輯｜LIFT行校園實唔實用？

LIFT行校園實唔實用？

文：三日

相信各位同學（尤其是要上八半嘅走讀生）唔多唔少都會感覺到中大好似越來越多人，而校巴就好似越來越細架，攪到架車好似沙甸魚罐頭咁樣。根據校方嘅講法，遲啲大學三改四之後就會再多兩千幾個學生，到時每個鐘要成百部校巴先至裝得晒所有等車嘅同學，但係中大嘅道路網照計已經就快飽和，加唔到幾多車。

如果唔加校巴嘅話，要縮短火車站門後果條長龍，似乎就只有叫司機大佬揸快啲兜多兩轉。不過中大彎多路急，裝住成七十人嘅校巴開得太快又似乎好危險。而且，依家司機叔叔已經揸車揸得相當辛苦，如果再要佢哋兜多幾轉就好似唔係好人道。咁講法，到時上校巴分分鐘難過登天。目前校巴已經嚴重不足，遲啲大學三改四，中大就會因為同時有兩屆人而有成三年時間多咗二千幾人。到時2012大爆炸，火車站條人龍真係分分鐘會排到上ELB。

另外，前松、竹、柏苑嘅位置喺2012年之前就會起好一座新嘅教學大樓，而呢一座野將會好似ELB咁，成為崇基其中一個上堂嘅核心地點。熟悉校巴路線嘅同學大多都知道果個位附近無校巴站，無論由何添樓定係火車站去都相當麻煩。不過，呢座新教學大樓亦會起多支橋駁去何草附近，即係話可以經U Gym個站落。但係咁樣同時代表由本部落CC上堂嘅人數會變得更加多，到時候新賤排Lift條隊話唔定都要排到去舊賤先得。

校園發展計劃Campus Master Plan入面，有一樣野叫做「步行校園」。佢嘅目的係希望透過改進中大道路黎鼓勵學生行多啲路（以及搭多啲Lift，步行校園唔係真係話成條路都要自己行），俾大家享受吓山城景致。「聽落又好似唔錯喎。」唔少每日都身水身汗通山跑嘅同學應該都會有咁嘅諗法。不過，唔知各位又知唔知個實際計劃係點呢？

根據TCW一樓果個Master　Plan模型，以下呢幾個地方將會以Lift同埋天橋連埋一齊：雅群樓（逸夫書院）—伍宜孫書院（現大學賓館）、伍宜孫—三、四苑、三、四苑—士林路、敬文書院—UC、UC橋—聯合、李卓敏—山村道（會起新大樓）、以上提到嘅何草—崇基新教學大樓，同埋崇基學生活動中心（CC Can後）—新賤。

熟悉中大地型嘅同學可能已經發現，呢度所有通道都唔係喺最多人等校巴嘅地方（火車站、邵逸夫堂）。即係話，呢幾條路係幾乎紓緩唔到火車站去本部校巴嘅負擔。而校方亦都講過，「步行校園」計劃本身主要唔係要解決已有嘅校巴問題，而係防止士林路三座新書院增加對現有交通系統嘅負擔。講就係咁講，不過呢啲新天橋又可唔可以疏導相應地區嘅人流呢？我就認為有啲難度。

由伍宜孫經三四苑上士林路果兩部Lift，每一部高度數到盡都係得三四層，真係碌都碌到上去。而且三四苑上士林路果度已經有一條樓梯，照計又無必要特登起多兩支野喎。同樣，UC橋上UC亦都係只有三四層，而李卓敏去山村道果條橋就完全無高度差。當然，呢幾部Lift可以方便到唔少搬住啲好似磚咁重嘅書嘅同學，唔駛行上行落都好似上體鍛咁樣，但係Lift行校園做唔做到校方最希望解決嘅疏導人流，靠呢幾部唔多實用（原因將會在後文探討）嘅Lift似乎唔會解決到。

再者，呢啲橋雖然理論上可以令搬野嘅同學輕鬆啲，但係以上果三條橋本身就坐落係人流唔係好多，亦無乜需求嘅位置之上。三、四苑呢個地方除咗住客（即係教職員同家人）之外，平時基本上唔會有其他人路過，所以係呢度特登起兩支Lift似乎係高估咗需要。同樣，UC橋上UC果度亦都係碌都碌到上去，呢段距離會唔會真係遠到要起支Lift先可以比大部份人行上去？雖然話中大本身都算幾有錢，但係與其用咁多錢起幾支唔多等駛嘅野，將啲錢用喺其他地方，會唔會更加能夠解決人流問題呢？

平心而論，校方嘅計劃之中，亦有包括某啲位置唔錯嘅Lift位，好似雅群樓（計劃緊改建成新嘅多用途學生活動中心）去伍宜孫果支，同埋由何草去崇基新教學大樓呢兩條橋，的確會有相當嘅潛在人流。不過，咁樣就會有另一個問題：呢啲橋同Lift可以吸納到幾多人流？

目前中大咁多支用黎穿梭各地嘅Lift之中，除咗MMW有四部Lift之外，其他都係得一部Lift。一部Lift點塞都唔會塞到廿個人，而且各位同學都相當清楚中大啲Lift都唔算好快。由此可見，呢幾部Lift可以吸納到嘅人流相當有限，至於其他新入學嘅同學除咗以逼入中大嘅氣魄逼上校巴之外，大概就要慢慢爬山，順便享受一下山城嘅美麗景緻。

基本上，雖然部份想法係幾好，不過我覺得呢個Lift行校園計劃並唔能夠達到佢最主要嘅目的，即係疏導人流並且減輕校巴壓力。而且，最大問題係咁樣只係治標唔治本，疏導到今年人流，到下年就會再迫爆，到時又要再倒錢落去起野，浪費之餘重會破壞山城景觀。相反，如果用呢啲錢黎改變制度配合，比如話重新編排上堂時間（相信好多人都同意15分鐘有時真係唔夠），或者係重新規劃下中大嘅道路網以及校巴路線（呢點校方似乎都有做緊），咁樣先係長治久安之法。