請貼！！！新民主牆啟用

文：枇杷

唔知大家知唔知，以前通往范克廉樓時經過的一大堆board，其實有一堆係俾同學發表的民主牆。由於太過雜亂，d board打親風都塌到一地都係，非常危險，歷屆學生會幹事會向學生事務處相討多年，終於響幾個月前成功爭取，一塊新淨白雪嘅民主牆家下就棟左響文廣度喇。

幅牆共分九格，左邊三格為學生會三莊（幹事會、學生報、校園電台）的公佈板，中間三格為民主牆，右邊三格則是學生事務處的告事板。同學、老師及所有中大員工對校政、校園生活、社會時事等有任何意見，都可以於民主牆（中間三格）上發表。

塊板嘅使用規則不多，以下為筆者認為大家都要留意的東西（唔准人身攻擊之類嘅唔駛講啦）：

1　用膠紙或bluetag貼，唔可以直接寫落塊板度；
2　唔可以貼宣傳廣告，屬會要貼poster就打個會印再貼去范記的屬會專用板；
3　貼上去的紙要有日子，當如民主牆貼滿晒，幹事會會按張貼日期嘅先後，拎走較舊嘅內容。

筆者經常響范記出出入入，行過見到民主牆都會望兩望，見到家下張貼嘅都係A4白紙打印黑字字細細，要捉住行過食飯嘅人嘅視線的話，老老實實，用呢種形式真係嘥氣。建議大家寫得多字又要印紙的話內文字體最最最少要14pt，盡量用黑色以外嘅筆寫大大隻的標題。如字唔多的話，就用marker寫啦，信我，寫一定好過印，你睇下隔籬幅相就知。