情色｜交換經驗：失身

留低擊傷你的石頭
by小學雞

作為一粒遲熟的菩提子，真正（？）的失身要由出智慧齒那年說起。記得那是一個月黑風高的晚上，青梅竹馬的同學仔半哄半騙要我送返屋企，最後拐了上樓。慢三拍的我直至到了大門口才心知不妙。對方著我在外邊等，要先行入屋查察形勢。門外的我聽到佢同一個小男孩的說話聲，嗯，佢細佬仲未瞓，正猶疑是否要無聲撤退，大門此時卻偷偷開了一道縫隙。屋內漆黑一遍，我們躡手躡腳走到佢閨房。閨房，在大男孩的幻想中總是夢幻般美麗，但現實比小說殘酷。酸縮的氣味，雜亂的床舖，昏黃的房燈，破落的牆身，幾乎以為是周星馳電影中麗晶賓館的廉租房。她爸媽正在隔壁房間睡，佢細佬則顯然仲未瞓，時間地點都錯晒，幸好人物都叫ok啦。間場的情節一過，佢已經攬到埋來，這時我才想起好似有啲嘢未買。但對方攻勢不絕，唯有吻下來，豁出去。搞到咁上下，對方已熱身完畢，準備蓬門今始為君開，但可能因為心神不寧又緊張，埋門之際竟然硬唔起！正暗暗發愁，對方展現出前所未見的體貼同溫柔，忽然向下發展吞吐含蓄。我已經想不起在咁狹小的空間如何從容調轉體位，只記得當時雙手無事可做，獨樂樂好似不是太合倫理，於是也改變方向西部大開發。快要到達高峰之時，竟然瞥見房門不知何時已變成虛掩，斗大的眼珠在黑夜中與我四目交投！我驚慌之下一洩如注，小男孩也急急遁走。最後我們攬抱著睡，直到她爸媽上班後才敢起床。那朝我有工作在身所以要早走，正在廁所梳洗時，那個小男孩又走來裝我。她爸媽一走我就膽粗，便向那男孩說了聲「hi！」，他又立即逃回房。事如春夢了無痕，女同學的樣貌現在已經開始模糊，唯有小男孩驚惶失措的神情，到今日依然深刻，而且彷彿變得，與當時的自己重疊。

————–
Done
by小羊

第一次故意揀了個唔熟的朋友。認識但不相熟，更別說相愛。人家說第一次一定很難忘／浪漫／要留給愛的人嘛？故意相反，因為不想跟從教條。那時沒有什麼「開發女性情慾」的想法，只是自然地不想受控於「傳統」。

那個男孩。嗯我忘了仔細的過程，我在他的家他姊姊的床上，我覺得被撫摸的感覺是好的，我喜歡溫熱的身體——我到現在還喜歡，至於插入，就是我有點緊張，因為傳說是會痛。結果是有點痛但不是太痛，其他的不太記得。In general, it’s OK.不是太high，有點失望，怕原來性事只是如此。後來我還和這個男孩做了幾次愛，大家熟習了體位和節奏便又做得開心些。Practice makes perfect.

總之就是覺得很普通，不知有什麼身好失。倒是後來又有不同的男仔把第一次給了我。他們就是有些怕醜，好似覺得自己無做過就唔啱咁，令我當時覺得有D煩：「明架喇，我都無所謂你唔好咁介意啦好唔好？」雖然另一方面都覺得理解。同時就覺得這些「第一次」傳說很累人和無謂囉。

————–
慷他人之
（好似係）
by DXD

er，我今年廿三，之前廿零年都覺得自己失身既可能性低──覺得自己個樣衰，所謂：想失都唔一定有得失！咁又一路都淨係想同女仔搞，你可以當我係女同志，雖然我唔認同～點都好，又所謂：想失身俾女仔都唔一定有得俾我失～

想講一個男仔失身既故仔。話說個時中七就黎考高考，作為無乜社會關懷又唔上進既學生，個排好乸得閒，吃喝拉睡自修室，係咁多；於是同一個自己覺得整體很不錯既男仔混熟左。有次佢帶《劉華狀》上我屋企睇，如真如假，虛實莫辨。重點係大家邊睇邊躁，單位內神佛前，一片不安。套片終於好悲壯咁完左，無人記得劇情，我就爬上自己上格床拎本書還俾佢，點知，佢跟埋上黎。…死就死！豬乸滾地沙。床太細，我地落番去阿媽張床繼續碌。…唔記得戴bra，俾佢摷摷下發現左。好彩我平胸～可惜，佢既氣息同「下面」既情況，我完全接受唔到，直覺得嘔心，又勁歉疚。…鈴！家姐打黎！！我就一下推個男仔出門，再衝入廁所不停洗。那氣息同畫面卻一直洗唔走。二人直到而家都無乜偈傾。

當時好似想借佢對自己施行「拗直」治療咁，而家仲有陰影。而佢個時既無奈樣，我仲記得。Sorz……。想扮直拗直都要顧埋人地。人地都想既，就無人失身，咁先至去馬囉。我覺得。

————–
唔記得
by加兩蚊

是咁的。

最早既性經驗（唔計J啦），應該係year 2嗰時，有一次同個女同學去飲野，飲完之後上左佢屋企，喺佢床度攬下錫下摸下，咁就一晚。之後過左一輪算叫做係男女朋友啦。之後有時都會再上佢屋企搞下野，攬攬鍚鍚，要除既都會除，要摸既地方都係會摸，但佢就係唔俾我插入，話唔知點解好驚喎。開始時有少少覺得咁即係點呀，但慢慢都諗，其實插入可能都唔係咁必要啫，冇話一定要抽插射完先叫完事，大家開心咪得囉。

不過後來散左，導火線之一就係佢唔俾我插入。如果要講既話，除左年少無知，可能都係有種感覺，插入同佔有有啲關係啩。咁但係之後又識過第二啲女仔啦，而所謂第一次係幾時或者點樣發生我都冇咩印象，甚至唔係好肯定係同邊個。正所謂破處無痕，往事如煙。

不過而家同女朋友做，摸完一輪搞完一輪，十次都有八九次係會抽插下既。咁但係話成個性生活既quality，我又唔覺得同冇插入有幾大分別。咁呢個有冇插過既問題，如果要做個類比，我會話好似去茶餐廳食飯跟餐飲咁，冇你唔會覺得自己冇食飯，但係有嗰時又好自然會飲，咁囉。

好似成篇都係off topic添。

————–
破！
by前異性戀少女

我的性愛經驗總是和撞破拉上關係，失身點只係兩個人既事。中三那年去某島國演出，和初戀情人在酒店床上臨門一腳被Miss踢爆，冇既唯有死都話冇搞過。唉。之後就一路俾人撞破，真係由細破到大。

同初戀情人分手之後，斷斷續續同唔同既人上床，係唔到地方上床，俾唔同人撞破。還住家裡的時候，計算著母親回家的時間，細個多力d，真係點做都得，屋企做完後樓梯再做臨走時再係殘廁做多次，經驗話我知屋企做危險過外面做一百倍，係屋企個廁所做做下呀呀我要黎啦，鎖匙插入轉動，「阿女！！！！」頂！拿拿聲著返衫出黎「媽咪唔好意思我下次都係出去開房。」如果我父親實踐他初次撞破時所說「見一獲斬一獲」的豪語，我和我的性伴都應該死過好多次。

唔理真假或者係無奈，我爸媽都算開放，有次係二十五歲既前男友屋企搞到翻天覆地之後，唔記得拎返個bra入房，男友虔誠基右媽媽返黎之後驚見香艷蕾絲胸圍係沙發上面個頭冒住失身俾我既怒火，啤住我話：「屋企唔係舞廳！」我微笑並丟下一句，「之但係做愛同做舞女都冇錯。」就奪門而走。