罷工封路又如何，唔出糧你吹咩？！

文：東仔@基層關注組

上個月中大善衡書院陳震夏館外有建築工人罷工封路、抗議欠薪，結果佳運工程有限公司嘅代表終於肯「蒲頭」，拎住幾張夾埋約值十二萬嘅支票俾工人。不過，基層關注組（下稱「基關組」）上星期同工友見面之後，發覺件事其實未解決。當日封路嘅工友話，佢哋被拖欠嘅人工根本唔止十二萬，仲有二萬幾千蚊人工仲未發放。佳運就話要工友做晒成個工程先會俾錢，理由係怕工友拎完錢就走人。工人由上年十一月追討欠薪到依家，已經追咗四個月，罷工、封路都做埋，都仲未得到自己應有嘅報酬，佳運仲要用埋啲咁嘅理由為自己辯護，睇黎工友呢個月嘅人工都係凍過水，繼續會俾公司拖住。

學校周圍都有工程進行緊，基關組成員就趁工友食飯時間走訪中大各處嘅Canteen，問吓工友喺中大其他地盤工作嘅情況。

勞資關係模糊化──「我到而家都未知點出糧」

善衡宿舍個地盤有成過百人開工，全部做緊唔同嘅工作，各自負責喉管、電線、冷氣、石屎等過百個工種。經過幾層嘅外判（俗稱「判上判」）之後，其實係令到勞資關係模糊咗，其中一個做外牆嘅工友表示，佢由新年後二月中做到而家月尾都未知點出糧，如果有事都唔知搵邊個負責好。

我哋又同幾位工友喺CC can搭檯食飯，佢哋都有提過唔清楚強積金供款嘅詳情，唔知道之前嘅僱主有冇幫佢哋供緊，亦冇人同佢哋講要供幾多；更加誇張嘅係五低樓下有個地盤工友話，佢聽過有啲老闆要工友供埋本來應由老闆承擔嘅5%強積金。不過個工友又話，如果佢自己遇到拖糧問題都唔會反抗，因為始終都係打工，萬一老闆嫌你煩，佢只要話「你唔駛返工住啦」，咁你就可能冇得做一頭半個月，即刻斷糧斷米。

同學問「點解唔試吓搵勞工處呀」

通常同學都會覺得勞資糾紛係可以試下搵勞工處幫手，不過勞工處只係做調解角色，老闆大可以傾完協議之後繼續唔出糧，勞工處都奈佢唔何。如果話要告上勞資審裁處，連要告邊個都唔知。又就算知道判頭／老闆叫咩名，都要寫上佢嘅地址先可以落案起訴，但工人／判頭之間好多時都淨係知對方嘅電話號碼，所以正式起訴途徑唔太幫到工人追討欠薪。故此，工人多數都會先追細判，如果唔得就逐層追上去、追到大判，希望大判會出住糧先，如果再唔得，罷工就係最後手段。

同埋建築行業特別之處，係好靠關係、網絡搵食。同工人傾計期間，聽到佢哋有時都會以「兄弟」相稱。由兄弟介紹下嚟到中大做地盤，就算俾兄弟拖糧，見你同我相熟，而且下次你又可以帶我開工，除非好似佳運咁拖成幾個月，工人在情在理其實都唔想（咁快）告兄弟。

中大其實可以做得更多

最理想及比較容易監察嘅情況當然係減少外判嘅層數，但我哋都明白工種繁多嘅大型地盤，有時形勢迫住係要判多幾層，所以我哋唔係完全否定外判嘅實際需要，而係希望可以做好啲監察工作，睇下建築公司有冇長期拖糧嘅問題等。

工友亦講過某啲出糧制度其實係幾好，例如承辦商（大判）會直接出糧俾工人，啲錢唔會經過細判頭，咁嘅情況下就好少會拖糧，其實中大同其他大型承辦商都可以參考吓呢個例子。工友又話，至少都學吓新輝建築有限公司呢啲大判咁，每個月頭都有專人打電話問你出咗糧未，又會為工人買保險，中大其實可以做得更多架。

暑假應該係同學最輕鬆嘅時候，但係工人卻絕不輕鬆，基關組預計呢段時間中大將會有更多工程進行，如果同學有興趣一齊跟進建築工人嘅工作狀況，可以搵我，郭英東，電話9551 3325，或到Facebook搜尋「基關組」，然後留名。