文廣困局？

文：笑嬉希

要搞活動book唔到文廣，一直係學會幹事心中永恆的痛。明明行過文廣，見到有好多位無人用，走去幹事會問，永遠有其他學會book左！吹脹！搞到成日要早十世book，預唔啱時間搞唔到活動，幹事會又話要罰我果一百蚊按金。好啦！我唔用，比第二個用囉！又話場地不可轉讓喎！想點呀？！

幹事會職員阿Ann 話：
其實真係有唔少學會會book左場地唔用，我地通常都會沒收佢地嘅按金。（問：交得咁順攤？）咁一早收左啦嘛！不過有時中大自己D部門book場都會最後無用到，佢地就會求情，話要約外面的人，約唔到無辦法咁樣囉。不過有時D人真係唔守規矩，明明講到明唔可以轉讓場地，上星期又有學會轉讓左個場比Shaw Band，隔離明明做緊學生會選舉諮詢架嘛。

上任幹事會莊員阿Nick話：
有時真係有同學book左無用，有時就係佢地用太少地方，可能剩係擺一張臺，用左都唔覺。不過文廣都唔係大，無理由再分細佢。（按：在繁忙時段文廣分四區借出）而且通常一book要幾區的通常係擺展覽，問題不大，反而book一個區的就有機會最後咩都唔搞。（問：關唔關依家可以book定之後六個月的場事？）都唔一定啦！學校EMO嘅設施都係可以book定之後六個月的場，佢地又好似無呢個問題。真係唔知點解會咁。

幹事會會長Alva話：
觀察到現時好多團體book左場又唔搞活動，浪費空間，令文廣成日置空。所以我地會考慮加重按金制既罰則。而且考慮到好多團體預早book場，甚至半年前就book左，令好多中途想搞活動既同學冇場用，所以希望將部分日子規定不可提前超過3個月預約，彈性處理。另外，有同學反映book咗場「無法轉讓比其他人」，但現時嘅做法其實合乎公平公開既原則，因為同學唔用個場係可以取消借用，然後再公開競投。至於具體詳情，將會稍後於學生會網頁同mass mail公佈。

其實文廣真係話大唔大，話細唔細。你話佢大，如果真係大大支民主女神像棟喺中間，隔離又有BA Festival d大旗同埋d人周圍派閃咭，你都咪話唔迫！你話佢細，佢又可以掛旗，又有得掛banner，中間仲可以容納四個唔同學會擺booth喎！截稿嘅呢個星期，咁啱文廣就被內地本科生聯合會book左，搞中國文化節，聚集了為數不少的同學，睇到小記心癢癢的。其實文廣管理得好，學會又能夠善用的話，真係可以令大家嘅學院生活生色不少！幹事會話會檢討個制度，大家就一起監察下佢地啦！