唔只有條橋：中大３９區發展速報

文：火車上的小明

住新界北嘅同學仔有無發現坐火車返中大果陣，行到差唔多逸夫果頭，頭殼頂上面係唔係起緊一條橫跨鐵路嘅大橋呢？原來呢條暫時叫L7路嘅天橋，雖然係屬於中大嘅大埔39區（註）旁邊穿過，其實都係土木工程拓展署做緊嘅白石角發展計劃一部分。工程除咗起條路連接科學園同樟樹灘之外，家陣都會係起住一堆基礎設施同平整土地咁。

不過，將來果度會有公共交通總站同埋停車場，加上校園發展計劃中打算將呢條路駁去環迥北路，去逸夫、I-House嘅同學將來可能都會多一條路進出中大，唔使再係世界邊緣呼喚校巴喇！工程預計在2011年下半年完工，同學耐心等等啦。

註：校園發展計劃將該區規劃為研究大樓及研究生宿舍的用地