聯合迎新營．改革

訪問：樽／熹
整理：熹

甚麼是大學迎新營？又為什麼要搞／參與大學迎新營？
今年不論新亞還是聯合都有一群有心的同學為著令迎新營可以更充實而努力。新亞的同學搞了一個「理念大組」──穆人巷，希望可以直接透過組爸媽跟新生的接觸，幫助新生反思大學生活如何過，甚至反思自己跟社會的關係。（詳見迎新特刊〈玩以外──訪問新亞大組「穆人巷」〉）。今期的學生報採訪了聯合迎新營的籌委（OC）林朝暉，希望了解他們在計劃這年聯合迎新營時有甚麼改革，又遇上甚麼困難？
。
Detective Game追溯聯合精神
要在短短三日時間，除了玩以外，在迎新營加入反思的元素實在殊不簡單。籌委林朝暉指第一天只能做互相認識和Icebreaking的工作，第三日又要七院會師，所以反思的環節主要放在第二日的主題遊戲和City　Hunt。最初籌委們希望跟社會企業「黑暗中對話」合作搞主題遊戲，但因為價錢太貴只好作罷。現在的主題遊戲──Detective Game則希望叫人認識聯合的歷史，在查案的過程思考、追溯聯合精神。

從City Hunt認識香港歷史
除了主題遊戲外，City　Hunt亦是第二天迎新營的一大重點，林朝暉指既然City　Hunt本身已經會去香港不同的地點，那為什麼不做一些與該地方有關係的任務呢？參與者不必再去城市裡林立的商場，而是去黃大仙擲聖杯、在石硤尾穿膠花、在新光戲院dem粵劇，為的是新生體驗／感受上一代香港人的生活；而在旺角街頭拉Banner、攞簽名叫人支持男士有侍產假則是讓同學嘗試介入社會事務和行動。「攞支持男士有產假簽名是取代以往『扮做問卷，問人你靚唔靚仔』的無聊任務。我們不會跟新生講支持男士有侍產假有甚麼理據，希望新生自己去思考如何說服別人簽名。」

拒絕為Sponsor出信用咭
迎新營是一個燒錢的活動，聯合書院過往花錢亦相對豪爽。「以往最誇張試過幾千蚊整一塊Banner，今年無曬呢D，因為籌委們都唔希望花這些不必要的錢。」雖然節儉了，但迎新營的花費始終不少，所以有贊助十分重要。一般迎新營有不少商業贊助都是來自銀行，代價是要有一群同學申請該銀行的信用咭。「今年我們沒有要任何信用咭的Sponsor。因為唔想強行要同學申請信用咭，亦唔想我們的籌委會變成這些信用咭的銷售網絡。」少了銀行贊助，所以籌委們更努力地找其他非傳統商業機構的贊助，尤其以小商戶和文化團體期望不同，阻力無雙要改革，反對的阻力一點都不少。籌委、大組長、組爸媽的期望固然十分難一致，連老鬼們都對新一屆籌委推行新東西有好多不信任，甚至在pre-camp的時候，有三分二執委（EC）消失，以「考驗籌委們無老鬼幫手搞唔搞得掂」，OC們只好另外找人填補EC的空缺。這種不信任除了是對能力的質疑外，更多的是對迎新營期望的不同。例如有老鬼聲言「聯合大O唔可以有政治野」，更多的，不外乎覺得迎新營最緊要好玩，唔好搞咁多野……

不足和未來期望
除了老鬼，籌委間最初亦有些互不信任，後來籌委們才發覺原來大家理念十分接近，都是希望搞一個除了好玩以外，亦有意思的迎新營。話雖如此，籌委們跟組爸媽、甚至新生的期望可能有落差，而籌辦迎新營要顧及很多人。「好大幅度的改變你唔敢做，亦唔容易做。」回顧整個籌辦過程，林朝暉承認他們絕少亦很難跟組爸媽溝通。組爸媽是否認同這些改變，十分取決於大組長有多願意跟組爸媽討論這些問題。未能跟最接近新生的組爸媽做好溝通，只能依靠負責run活動的EC。「例如在City　Hunt，我們hold活動的EC會為新生解釋那個task有咩意思。」

雖然有這些不足，林朝暉總結今次迎新營只是一次示範，迎新營除了好玩外，亦可以更有意義。他期望未來聯合都可以像新亞一樣有「理念大組」，在不同位置繼續改革迎新營。

組爸媽點睇：
Q1：覺得今年改革了的O-Camp同往年有咩唔同？
Q2：知唔知每個活動（例如Detective Game, City Hunt）有咩意義？點評價這些活動？

A)「鬼塚」不願出名的組媽
1:唔覺今年同往年有咩唔同喎。有改革咩？未聽過喎。CityHunt 都無咩變動呀！係地點唔同之嘛。
2:其實真係唔知有咩意思，不如你講下，我又睇下認唔認同啦。不過，City Hunt 同Detective Game 今年都幾好，唔悶。

B)「水翎」組爸Michael
1:都知道嘅，例如以前的Mass Game，今年就變左做DetectiveGame。可能以前就好玩少少，今年想比較有意義囉！但其實兩種取向唔同，都無話邊種好D。
2:大致都知少少，City Hunt想新生認識當地文化嘛。不過具體每個task有咩意思，組爸媽就唔會知架啦，EC開始個Game之前都係講一兩句，可能OC／EC都唔想件事太教育意義，怕悶掛。

新生點睇：
「赤燚」組仔Keith
Q1：有無人同你們解釋活動有咩意義？
無人講過喎。（問：連check point嘅EC都無解釋到？）真係無講。不過講左都唔會差太遠啦！我地組要喺菜街攞簽名支持男士侍產假，邊有人真係會諗男士侍產假有咩利弊，大家咪又係同人地講自己O-Camp緊，叫人快D簽。
Q2：覺得今年邊個活動比較有意義？
無咩活動有意義喎。都係玩架啫。大組競技幾好玩呀！又有得做下運動。（問：連聯合精神都無提到？）喔，咪團結精神，dem beat齊D囉。

後記：
UC迎新營這連串的改革，去到新生的層面，或多或少變了味。當中，籌委與組爸媽溝通的缺失固然是致命傷，可是組爸媽、新生只期望迎新營「好玩」亦未嘗不是一個主因。這年UC的改革，總算是踏出了重要的一步，在宏觀層面令活動更可以幫助新生反思大學生活，甚至是與社會的關係。衷心希望未來一年，UC亦可以有「理念大組」，在微觀層面改善。