校園散打:搞咩鬼 人事處咁神秘? 校園, 11年11月號 文:善 話說沈祖堯校長八月尾時諮詢物業管理處的工友對工作有咩不滿,同埋成班副校長浩浩蕩蕩咁一齊去。工友嘅不滿當然就有唔少,而其中一樣就係份合約轉極都轉唔到做長約,有工友做成十年都仲未轉到長約,之但係又年年同佢續約。做咗十年唔炒,咁即係工友工作表現都有番咁上下,但學校又唔同人轉長約,究竟點解?諮詢會上許敬文副校長向工友表示,人事處正響度查緊全中大嘅合約,應承話會睇番六年都未轉到長約嘅個案。既然學校話到明做緊嘢,大家咪靜觀其變囉。 唔經唔覺就到咗十月中,斷估人事處都做咗成個月嘢啦,雖然話人事處日理萬機,但成個月時間,點都會有啲進展,掛?同埋檢視合約轉長約嘅現況唔單單係物業管理處工友的事,也是全中大所有合約工的事呀,點都應該有番咁上下優先度,掛?所以呢,學生報響十月中就向人事處查詢依家嘅進展如何,順便問埋一啲中大合約工嘅數據,例如不同工種有幾多合約員工等,以及08年績效評核(註)實行以來的檢討。 到截稿為止,人事處都仲未有啲咩確實嘅答覆,學校方面就表示人事處方面嘅資料比較敏感,話要等副校長番黎商量過先至講到—其實呀,啲資料只不過用黎勾勒番中大員工嘅狀況之嘛,如果中大員工整體待遇唔差,中大又唔係無良僱主,學校其實唔駛咁小心翼翼噃。 註:績效評核類似年終考試,員工會被上司評分,評分高低決定有無加薪。 分享至: Leave a Reply Cancel ReplyYour email address will not be published.CommentName* Email* Website 在瀏覽器中儲存顯示名稱、電子郵件地址及個人網站網址,以供下次發佈留言時使用。 − 三 = 四 Δ