人上莊？莊上人？：與莊對話錄及後記

(偽訪問)與「莊」對話錄
問：柏拉圖（柏）　答：莊（莊）
柏：點解你無處不在，處處都在，有近百個分身？
莊：宿分。
柏：但點解中大的新同學往往一識你就咁猴擒，又要傾你，又要上你？
莊：咁我D分身咁多，佢地為左生存落去，就一定要傳宗接代架啦。要搶人，就要早D九、十月開始比你地圍住傾，唔係手快有手慢無，比其他分身搶走曬D人點算。
柏：咁你其實有咩咁值得傾，要傾成兩三次呢？
莊：嘩！咁呢D終身大事黎架嘛，唔提早走人，假假地都要捱成年！要傾大把野傾，我又要介紹下自己，佢又要講下佢點理解我啦！又要睇下大家係唔係真係夾喎。不過呢，依家時間唔夠，通常Skip曬前面的東西，第一次傾就會問佢地上唔上，要咩位架啦。有幾次有人白撞，話想了解我多D先，我心諗……
柏：你地一黎就問新同學愛唔愛你、要唔要你，佢地都唔了解你，點答你啫？
莊：咁你就有所不知了，雖然話每年在百萬大道都會有搞大型交友平台，但我大部份分身都係靠傳統口耳相傳的方法來招徠追求者，阿媽阿爸咪充當下媒人角色，落多幾下嘴頭推介下，咁咪又促成一對佳偶囉。
柏：咁樣會唔會係變相盲婚啞嫁呀？
莊：我話無就欺騙你嘅，不過其實我有好多分身都好似樣，咁千人一面，又唔會錯得太離譜掛。講開又講，咁倉促決定，最大問題係好X悶呀，佢未想清楚就付托終身，搞到無黎創意，我前夫做咩佢又做咩喎。你話，激唔激氣呀？

－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－－

如果這也可以談得上是一個後記：那我想在這兒說一說有關於 （ you know what)，你所知道的二三事。有關（you know what)，你知道的事情一點都不少，（you know what)，作為大學五件事之一，你唔上、你都會諗過上，會諗但係又未必諗得好清楚，好似選讀大學咩學系、又似係大學選course。不過其實選course好D，畢竟你會有capacity選擇多幾科，其他人take過都可以比到D意見，但試諗，學生報下期整返過「好(you know what)推介」就真係唔慌唔大檸樂，支支(you know what)都搵人當宣傳廣告咁寫，行貨肉麻到爆我地又唔登唔得……都唔明，明明自己都唔覺上支(you know what)有價值，都總係要盡自己責任，死命宣傳、幫佢搵個好人家咁話啦喂。要死就由得佢啦，唔通佢想死你唔比佢死咩？話說回來，選course唔啱可以drop左佢，上錯(you know what)就真係唔知點算好……負責任呀嘛，又變相做廉價勞工……呀……唔係，其實通常仲要自己貼錢的，即係連廉價勞工都不如。唔負責任，想一走了之算數無眼屎乾淨埋？呵呵呵……江湖好細架，你估走得你咁容易呀？不過又唔好講到咁衰，話曬大部份人（you know what)完之後，都覺得好爽，爽過爽身粉，仲話（you know what)係大學生涯入面最難忘的片段……成班人為了練果幾句口號、做齊果幾個動作，覺又唔瞓、堂又唔上，去到表演場地，原來仲要同另外幾支（you know what)的人鬥大聲，無人聽到你叫咩Q！幾有激情呀！！！真係唔慌唔「青春就是勇敢」呀。有人話呢D活動／儀式無聊，浪費時間，真係不懂得欣賞整件事的精髓。如果件事好有意義，大家一齊做又有咩意義？就係件事咁白痴大家都一齊做，先凸顯大家幾咁團結嘛！你又唔好話你唔知(you know what)會係咁，大學每年用咁多資源、咁多錢搞O-Camp出黎咪就係想預演一次囉。如果你O-Camp試用完，(you know what)之後，突然想退貨，好似惡D啵。唉唉唉！咁又唔好講到成件事咁差，其實我都係係O-Camp受人「照顧」，現在(you know what)「照顧」下人啫。不過呢種究竟係「得人恩果千年記」，定「出得黎行，預左要還」，就真係唔多清楚啦。講講講成咁，咁其實你想點啫，唔通要全部你睇唔順眼的(you know what)都摺埋，變曬所謂的學生組織呀？有夠十支學生報好唔好？！我唔係咁既意思（雖然我都唔介意係咁）。問題係，有無D積極少少既可能先？話就話(you know what)，非形式教學，講到好似好自由，巧威威咁。但有幾多真係自己想做，幾多係比「傳統」迫住做，或者做開唔想諗，繼續守舊因循照舊老餅蕭規曹隨……大佬，真係好悶呀。人書展，你又書展，賣埋D書又一模一樣；Dem BEAT又千人一面，係得和聲書院有D心思(><”)；千人宴又係顏福偉朱咪咪，唔係唔好，我都好鍾意朱咪咪，不過「咁隨隨便便，邊有人比面」囉。最低限度，「橋唔怕舊最緊要受」，你都嘗試下問清楚點解要搞，真係想搞先好搞啦！唔係到時，搞咁大場大龍鳳，人地問你搞黎做咩，你口啞啞，吃力不討好，有咩為先得架？聯誼唔係唔好，糖水會都可以好爽，但你係唔係真係搞得好，聯到誼先？唔想同你聯誼的宿生又點？好多時間唔係宿的宿生又點？有無方法真係可以包到大部份宿生，而唔係玩就玩、摺就摺，玩開果班繼續玩、摺開繼續無人理／唔想理人，想點，想點，小圈子？不過宿生始終會撞口撞面，點都好過D大系既系會，老實講，到依家我都唔知我果系支莊(you know what)有咩人，真係小圈子得不行，你估你功能組別咩？算，念在你有搞O-CAMP，有搞送舊，都算有D功能。O-CAMP幫助新生認識中大喎，幾好呀。知你地辛苦，但可唔可以做多步，檢討下，諗下要幫新生迎咩新先……係快快手知道曬每座building叫咩名、有咩鬼故、邊個professor係killer？？定真係有D野幫佢地諗清楚係大學三年做咩，有咩選擇？「時間過去不再復返，歲年如雲霧散，此際已……」死啦，就畢業，觸景傷情添。唉。總之你明我講咩就得啦，目標為本呀，目標為本，今時今日咁既服務態度真係仲未夠架。嘩。D文句差到咁，排版咁刺激，你都可以睇到呢一度，作為呢篇後記的作者，心情真的萬分的激動，先頭淆底左好耐，唔敢講到咁激，先(you know what)前、(you know what)去，既然你睇到呢到，好似真係要放低個面具，認真討論下，究竟鄙人小弟點諗。唔係話以上吹的水假假地，而係畢業將至，搞咁大個稿題出來，當然不只為上莊DO and DON”T，而是想探討一下上莊這一個校園文化，究竟如何影響我們（不單是上莊的同學）。校園中學會各自為政、老死不相往來的小圈子景象，除了排拒了同學的參與，究竟又令我們失去了甚麼？佔中大學會大多數的聯誼莊（系會、宿生會）和興趣莊又各自有咩特色、為什麼這麼能夠吸引同學？我們對這些莊的評價，除了無聊小圈子唔知做咩死左佢好過外，又是否有更細緻的描述？更積極的可能？上莊的校園文化影響我們的同時，我們又可以如何影響、改變到佢……以上的問題固然不知所云，難以解答，以上（物理上）的整個上莊稿題亦是眼高手低，未必有助思考那些問題，但如果上面場大龍鳳令你對上莊有多一絲的想法，你想跟我們和其他同學分享、討論，請務必上范克廉樓學生報會室同我地吹下水，再唔係send封電郵來投稿都實在好方便。但如果你咁好耐性睇完，只想講一句：「痴線！」恭喜你，本後記純屬虛構，大家時運高，你其實咩都見唔到。