【情色】女王的信箱

初登場介紹：
其實信箱都唔係第一次出現喺情色版咖啦，之前有stephy信箱同chrissie信箱，呢一莊嘅我哋，都想開返個信箱，增加關於性既討論空間。除左經驗豐富寫開情色小說嘅猶太女王，赤色浪子、純情歷史系男神等等其他莊員都會嘗試回覆大家，所以以後可能就會有男神信箱或者浪子信箱咖啦。大家有任何性／愛既疑問，可以係每月既20號前寫信黎俾我哋咖～！

◎ 編輯：
Hello! 我A0，唔算多人追又唔接受穩定關係以外的性，一直都以為情色離我好遠好遠……但估唔到我都竟然有寫信來情色版的一日@@

話說近來好似鍾意左個異性，正正常常咁都幾開心……不過奇怪的事就發生啦……

就係E個時候，有個之前追過我，但被我拒絕左的人竟然搵返我喎，咁我第一時間當然想拒絕，唔想俾假希望人地啦……

但佢竟然約我去睇戲同食甜品，睇—戲—同—食—甜—品—呀！Which係我人生中無法抗拒的兩件事……

我驚如果應承左，俾假希望人地之餘，又會被我鍾意的異性誤會……

係，我知我officially係available……但其實我根本就唔係太鍾意約我的人，我只當佢係個好關顧我的朋友，咁你話我應唔應該應約呢？定係我唔應該為左一個都唔知係唔係鍾意我的人，而放棄今次e個機會去發展一段新關係呢？

唉……好頭痕……

Looking forward to your advice,
Sam

◎ 傻豬samsam：
由你字裡行間可以睇出，你係個好在乎其他人眼光嘅人，女王回應你問題之前，想你好好咁問自己一個問題：「你自己想點？」

我呢個局外人呢，就覺得成件事其實可以好單純，同一個人去街，主要都係想吹下水聯絡下感情，你要考慮嘅應該係呢個朋友值唔值得交往，而唔係會唔會俾人誤會，更唔係甜品同電影(揮手：雖然對女王黎講呢兩樣野都無比吸引)。講真，香港地咁大，你估真係好似CCTVB啲戲咁，呃佢話同媽媽飲緊茶然後就面兜兜咁就係街撞到佢咩。

如果你真係驚嘅，咪備定個案先，借啲倚同你鍾意嘅男仔講：近排上果套戲好似唔錯，有個朋友仔約左你幾日後去睇。無手尾跟之餘，又可以俾佢知你身邊仲有其他人，等佢緊張下都好啊！

而至於怕俾假希望人呢點，女王覺得只要你同佢去街嘅時間唔好做啲曖昧野俾錯暗示佢，好似平時咁傾計，反而可以令你地朋友嘅狀態更加清楚添，再唔係，咪拉多個朋友去囉，孔子都話啦：三人行，實無死錯人。啊嘛。

不過諗深一層啊，我覺得你唔洗將自己縛得咁緊，先唔好講你都未同佢一齊，就算一齊左，係咪就代表你只可以同佢一個約會？可能會有人話，有男朋友都仲識其他人或者想發展另一段關係，係花心而且唔負責任，但女王覺得，兩個人一齊係因為鍾意對方，而如果你對佢嘅感情夠堅定，係唔會因為識左新嘅朋友而變得唔再鍾意原本嘅男朋友咖嘛。相反，呢個係一個好好嘅機會俾你重新檢視對佢嘅感情。兩個人一齊耐左，好多野就會變左習慣，再唔會諗點解要做、過程亦變得無癮同麻木，即使係親吻或者做愛呢啲初初好期待好熱情嘅事，都會變得同出街食個飯無咩分別。如果兩個人嘅圈子收窄到只容許對方嘅存在，根本就唔會思考一齊嘅意義，最後就變左為一齊而一齊。

女王無耐之前先同一齊左三年嘅男朋友分手，因為大家都係多疑嘅人，所以一直綁實對方，唔俾識新朋友，甚至連舊朋友都最好少見，三年黎多數日子都係响屋企煮下飯仔睇下電影咁過，依家諗返起好似坐監咁。我同佢性格十分十分不合，一齊左兩年之後就成日嘈交，但每次都係因為習慣左同對方一齊生活，唔知無左對方點算而分唔成手。直至最近忍心分左手，大家都覺得輕鬆左，睇返轉頭，先發覺以前真係好辛苦，根本一早無左一齊嘅意義，但就因為睇唔到其他嘅可能，先被迫唔分開。女王唔想你再跌入同樣嘅困局，所以嫌我長氣都要分享下呢個慘痛經歷。