小報小報小小報

文：飛

睇到呢本咁厚嘅迎新特刊，同學仔有咩感覺？原來大學唔係想像中咁好玩咁自由咖？定係覺得啲文又長又難明？但有無諗過，你唔只係得個睇字，其實自己都可以出一份刊物。

小報熱

九十年代初，小報係曾經中大興盛過一輪。

當時肥佬黎創立壹傳媒、有線電視開台，加上本地媒體對八九民運奮身報導，傳媒對大學生們影響霎時倍增。九二年開始，就有廿幾種同學自製嘅小報先後湧出。九五年打後，高潮漸退，不過依然有同學斷斷續續咁製作小報講出心聲。例如今年，就跑出左份模仿《黑紙》嘅《中紙》，入面.原創高登式改圖笑到你 gapgap 聲。

而我不知道，小報是……？

有名你叫，小報小報，即係唔係大報啦。唔會有太多嘅限制，例如格式、版面等等，最緊要果樣，係唔需要晌呢度嗰度申請，想出就出，唔洗好似建制內嘅傳媒（如《中大學生報》）咁，決定出咩稿題、用點樣嘅措辭時都要記住向廣大同學負責、或者擔心被外界傳媒寵幸。

由於以前電腦未普及，或者係有意為之，當時嘅小報多數係手繪圖畫文字嘅白紙影印本，對比起依家報刊成熟嘅排版同豐富色彩，嗰時嘅小報或見荒涼簡陋，不過，睇過你就明──真係好盞鬼！

小報講啲乜？

話明你想點出就點出，個個都有唔同嘅嘢想講／插，好難歸納一個主題出黎，不過，批判校園文化明顯係其中一個主要論調。

有人插 O camp：《小門報》（九三年九月一日）「法西斯主義者，他們也知道要效忠的對象，要為什麼而感到光榮，你們呢？只是無意識的叫喊，且還要盡加撕破喉嚨不可！不知所謂的集體主義盲從行動。」

有人插書院精神：《孬》（第四期九五年十月十六日）「Tips forNA beginners：係 CC 急屎都要返 NA 痾──正所謂肥水不留別人田。」

政治嘢，又有啫，好似《大晒時代》（創刊號九二年十二月）就以「本週金句：中英周時鬥大鼻　同學鋤書好少理」形容中英爭論與同學關係。

仲有啲主題都幾得意咖，例如講千人宴.有《「老」千人宴遊記（上）》（九五年十月廿九日）：「UC 千人宴……有兩個啤酒女郎……好可惜，佢地好似比 D 大粒佬 mark 晒出鐘咁，淨係 serve D 院長呀、社監呀、保安組呀、校巴司機呀……我舉晒手，踢晒腳，佢地眼尾都唔望我一下，真係搞到小弟興合合，不知點算好」。當其時可以話係莊諧雜出，百家爭鳴。

不只是發聲

或者有同學仔會話，車，up 得就 up，咁同九龍皇帝有咩分別？有咩意義？

容許我嚴肅少少咁去答呢個問題。

曾經有人形容小報為「學運中一度突變的空間開發」，小報參與者盧思騁表示，小報係「反對學生組織自上而下的組織同學，要求學生組織變得公社式、參與式。當學運不止關心帝皇將相大的問題，身邊的、直接的議題就可以成為同學介入的起點。」好多同學有一個美麗嘅誤會：啲嘢都係學生會搞咖啦，關我地咩事啊。就將發聲嘅權利交俾學生組織，但係，真正嘅校園民主係需要所有人嘅參與，你就生活係學校入面，呢度嘅事你有權參與決策，表達自己意見，每個人訴求都唔同，點解要交俾人哋把口去講？所謂民主亦唔係好遙遠嘅事，往往就喺你身邊發生，你唔講，可能就唔會有人發覺問題，受影響嘅都係自己。

有人覺得九龍皇帝係亂嚟，有人覺得佢係一個時代嘅標記。同學仔，唔好睇小自己，你係中大歷史組成嘅一部份，你嘅聲音正正就係反映緊呢個時代嘅面貌，如果人人保持沉默，歷史將會一片空白──又或者，只有官方紀錄嘅歌舞昇平。

《中紙》，「揸緊宗旨唔係你想像咁易」

頭先提過今年出現嘅《中紙》，似乎係小報嘅延續。我都叫做曾經玩過下，就等我話說當年啦。

大家應該都有見過一份叫《黑紙》嘅刊物啦，《中紙》就係參考佢嘅概念，每期以一個關鍵字為主題。一張 A4 打橫對折，封面大幅圖封底賣廣告，內頁係左文字右改圖，搞掂。

組織方面，初頭係一班相熟嘅人自行出版，同時係 FB 發行網上版同宣傳，有人見到覺得有趣就去 join（我都係咁樣鐘過去），不過因為無咩共同理念，而且係自願參加，最後都係得返本身熟果班人同兩三個有心嘅人留低搞。

運作呢，頭果期係自己夾錢，之後兩期係 R 廣告 [ 註一 ]，印就係書院學生會度印，黑白雙面埋單三毫子，加埋兩毫子一張紙，一份嘅成本係五毫。如果用普通 A4 紙仲可以再平啲。我.係書院週會派，仲會拍段演繹果期主題嘅片段喺週會度播。嘩，又黑紙又改圖又拍片，都咪話唔吸引。

理念嘛，《中紙》創刊號嘅關鍵字係「反」，係希望藉住呢份野俾大學生跳出框框反思人生意義。不過之後大家多數一埋牙就傾今期主題係乜，點樣表達，一份嘢開兩次會就出咖啦。都無點傾過總體理念。我覺得係一個組織入面，了解大家嘅期望好重要，因為咁樣先搵到個組織存在嘅意義。而且有一個共同嘅目標，比如係關心邊啲議題或者群體，大家做起事上黎都更有衝勁。

《中紙》出左三期之後就無咩聲氣嚕。原因有好多，資金不足啦組織性低啦無共同理念啦吧啦吧啦吧啦，不過～！自己出一份嘢真係好爽！未上學生報之前，睇住啲乜嘢大 X 線寫嘢咁篤眼篤鼻，學生報又講唔到我想講嘅嘢，真係成肚氣谷住谷住。玩左《中紙》先知，原來幾條友傾兩傾就出到一份刊物，而且聽到身邊唔少人都話幾好睇，都幾開心咖。

大學生，衝啊～～！！

「我們不單要在百萬大道爆音樂、播電影，我們更要把一顆大石投下校園，希望能為死寂翻起千堆雪。校園已容不下一張平靜的書桌。」（《小門報》九三年八月三十一日）

如果你係有一腔熱血，要為不平而鳴，但唔想入學生會／討厭被制度鉗爪，不妨為你憤慨嘅事出一份小報，話俾身邊嘅人知件事有幾差──潦隻龜寫幾隻字，印千幾份派街坊都係舊零水，有幾難？！當然，唔好睇少自己，如果做得過癮，不妨將志同道合者組織起黎，話唔定仲可以細水長流成為有規模嘅報刊。

又或者你覺得大學咁大，咁多事你理得邊樣啊。但你喺度總會遇到勞氣嘅事掛？點解住就我住，宿規就人哋定？點解唔可以帶男／女朋友返去訓？點解校巴條龍成日都咁長？點解某某 can 又貴又難食都可以做咁多年？──點解你仲要忍？（反正，你唔講，就咁放低一疊俾人拎，有邊個知係你喎～）

[ 註一 ]

要 R 廣告同時又唔影響理念，其實都幾難咖，好似你睇緊呢份中大學生報迎新特刊咁，喺 R 廣告果時都十萬個痛苦咖，個個莊員都認為信用卡係極邪惡嘅資本主義產物／支撐者，但果筆錢對我哋營運又有必要喎（下省數萬字討論）。最後都無奈接受，雖然安慰啲嘅講法係，我哋用呢筆錢去做有意義嘅事。如果同學仔真係好需要資金長期運作，都可以申請註冊成為學生會屬下團體委員會嘅，不過你要預左面對一啲麻煩，比如係要向會員負責、同代表會交待等等繁瑣嘢。