碼頭工人罷工號外——–碼頭工人訪問

文：言仔，毛

（筆者按：呢幾日喺碼頭支持工人，同唔少工友傾過計之後，整理成訪問嘅形式比大家對罷工工人嘅狀況有更深了解。）

受訪者：表叔（化名）

問：

你喺碼頭係做咩崗位？

表叔：

我喺船上面做水上姑爺（於船上用鐵筋固定貨櫃的工人）。話就話番廿四個鐘，但其實好多時候都要番夠四十八個鐘，有時甚至加班加到連踩七十二個鐘添！打風嘅話，仲要留係碼頭成五日！事關打風啲貨櫃易跌，要有人紮好，keep住海上面嘅行船流量之餘海上嘅交通又好混亂，結果要更加長嘅時間先做得完。

問：

你當初點入行㗎？

表叔：

當年朋友介紹我。宜家呢行真係青黃不接喇，啲後生根本做唔嚟呢啲咁辛苦嘅工，做幾日就唔會再番，好多我地呢啲工人都係靠朋友介紹先會做咋。

問：

你平時個番工情況係點？

表叔：

咪日曬雨淋都要做囉！啲貨櫃一定要係指定時間紮好㗎！好似啲細船（意

有數百個貨櫃的貨櫃船），一定要喺八個鐘紮結好，一個鐘要紮成六七十個櫃㗎！如果紮唔曬嘅話連飯都無得食！平時十一點半派飯，我多數要三點先有時間開餐！天氣熱嗰陣又無瓦遮頭，周不時都會有人中暑；大風大雨，傷風感冒都成日有，啲貨櫃仲好容易跌落黎，搞到有人命傷亡！「揸塔」（操控船旁塔機幫船隻上落貨櫃）工友都唔好得去邊，喺部機上面又難去廁所，好多時候大小二便都喺機入面解決。我地食飯，多數係判頭喺十一點到特定地方放低飯盒俾工人攞；到左食飯時候，佢地又未做曬啲野，到做完要喺部機落黎攞飯食時，啲飯好多時都比人攞曬，結果都係要去公司can比二三十蚊買飯食。

問：

咁多唔多工傷？

表叔：

梗係多啦！爆手指、扭傷呢啲成日發生，但好多時我地都唔敢告假，要有醫生紙證明需要４日休假療養，公司先會計工傷。我好多時都頂硬上算。唔止咁，喺碼頭入面啲貨櫃車只係一件工具，唔需要牌照去揸，碼頭入面都無紅綠燈呢啲交通安全措施，喺貨櫃之間穿插交通黑點咁多，好容易就炒車！

［筆者按：其實做紮結仲會導致更多嘅長期勞損，好似老花（長期被射燈照住雙眼）、肌肉勞損（體力透支），甚至有患癌症嘅風險（長期吸入碼頭嘅廢氣）］

問：

咁長工時，會唔會影響你同你家人嘅關係呢？

表叔：

梗係會啦！平時工時咁長，根本想見都無得見，加上日日做野做到咁攰，一番到屋企就瞓，完全無時間陪屋企人，我個仔想同我去睇戲我都陪唔到去；做呢行有覺好瞓已經好好，好多工友都索性唔去識女仔算。唔單止咁啊，人地初一初二初三有雙糧，我地無，仲係要做成日，同親戚關係都唔好。有時係會約朋友去bbq嘅，但大家工作時間都長，仲要廿四小時on call，要約都好難約。

問：

咁點解要罷工？

表叔：

本來都諗住忍左去算，話曬都係家庭財政支柱，都唔想屋企有負擔，但判頭啲說話實在太難聽。有次佢同我地講：「你地咪唔好撈囉！大把人等住做啊！」呢句野激到十幾個船上面嘅工人即刻停曬手。之前我地有試過同外判公司傾加人工㗎，結果傾左幾年，加得你幾蚊，一個沙士（非典型肺炎）就扣我地成舊水人工，話咩財政困難，大家要同舟共濟！

問：

你嘅家人點睇你罷工呢？

表叔：

佢地都好支持，都知我平時做野有幾辛苦，希望可以爭取到合理嘅人工。其實都唔想佢地擔心，有邊個唔想顧家？

問：

罷工過程你心情係點？

表叔：

哈哈，平時做野咁辛苦，宜家可以同朋友吹下水，鋤下弟，有野食有被蓋，好過平時好多！總之希望爭取成功。根本個外判制度都唔人道嘅！判頭喺一層層管理度從中獲利，工人就剩番少少；唔止我地，出邊啲外判工人，好似清潔工嗰啲都一樣咁慘！我地咁做唔止為自己，仲為左成個碼頭業㗎！希望出面嘅市民可以知道我地嘅工作環境有幾慘！有好多工友都去左考其他牌，預左之後無左份工。今次真係盡地一鋪，為左將來其他人入行會有更合理嘅待遇！