碼頭工人罷工號外——–《罷工迷思之Q&A》

文：Tony、Tommy

Q：啲工人都係想攞著數之嘛，日薪千二，又加咗你5%，仲唔夠？

A：日薪係就係千二，不過工人係一日番工少則做足廿四小時，多則隨時連踩七十二小時㗎 。呢十幾年黎物價飆升，碼頭工人嘅人工反而一減再減，實質工資比97年跌左三成。工人要求加人工兩成，計埋通脹都追唔返97水平。而且，近幾年佢地嘅工作量仲要愈黎愈多，船上負責紮結嘅「水上姑爺」 以前有七個，依家得返四個，變相工作量加倍。學工友林生話齋，比七百蚊要你做千四蚊嘅野，唔係化？工人唔係想攞著數，只係想拎返應得嘅野啫。

Q：啲工都外判咗出去啦，關公司咩事啫？

A：咁啲工人始終都係做緊公司嘅野，外判唔代表公司可以卸責，佢都有責任關心返工人嘅待遇。更何況原本搞外判，就知道外判商會吞／拎咗相當一大筆錢，工人一定收少咗，而家碼頭公司非但唔監察，仲想將責任一齊外判，做法非常可恥 。

Q：唔鍾意做，做咩唔轉工？

A：碼頭工人分分鐘喺度做足十幾廿年，連屋企人都見唔到，莫講話好似一般人咁「緊貼潮流」、「積極進修」之類。碼頭咁封閉，工人同外邊世界完全脫節，冇理由四五十歲先嚟轉行。再講，工人轉工與否，都唔代表公司可以亂咁剝削。唔係強勢就有權欺壓弱勢，正如唔係大隻過人就有權打人。

Q：有啲工仲慘啦，點到你嘈啊？

A：有更慘嘅事，咪代表更多人應該發聲，我地都應該幫更多嘅人囉！

Q：坐低傾咪得囉，駛唔駛罷工咁激？

A：邊個唔想坐低傾搞掂呢？老實講，碼頭工手停口停，呢幾日工人一分錢都冇，更加唔好講罷工失敗仲會比人炒。如果唔係比人迫到絕境，點會用啲咁大代價嘅方法？要求談判都十幾年，到工人罷工呢幾日，資方態度依然企硬，仲話工人係外判嘅就唔關佢地事，完全唔理自己平時吹噓嘅碼頭吞吐量，其實全部係工人嘅功勞。咁鬼涼薄嘅公司，唔罷工，點迫到佢讓步！

Q：罷工還罷工，點可以撞親啲保安咁暴力？

A：當日罷工，幾個編輯一開始就在場，情況完全唔係電視影到咁暴力。啲工人一衝開入口嘅人牆，幾個保安就插水式跌落地下。原本個個戴住頭盔，居然不約而同「甩頭盔、掩頭、唔郁、面露痛苦之情」。鏡頭即刻影過去，就係大家喺電視見到嘅場面。有編輯刻意睇住佢地，只見鏡頭移走之後佢地就即刻企返起身，乜事都冇。根本成件事嘅感覺只係有預謀嘅抹黑 。

（不過當然，啲保安係無辜嘅，佢地都係聽上頭命令啫 。）

而其實，當日每次有人好嬲想衝擊，都有其他工人叫停，可見其實工友佢地已經非常克制。嗰啲暴力感覺，不過係傳媒渲染嘅手段，例如郁到個鏡頭震下震下好似好激烈咁。入過碼頭嘅人睇返電視片段，都唔知原來報緊自己啱啱去過嘅地方啊！

Q：罷工搞到香港物流中心嘅聲譽變差晒？

A：工友業仔話，有時啲外國船黎到，佢會同啲鬼佬水手吹吹水，次次一講到喺香港做碼頭工成24個鐘一更，啲鬼佬就會嚇到大叫：「This is crazy!

真正影響香港聲譽嘅，唔係罷工嘅工友，而係嗰啲苛刻嘅公司。

Q：罷工阻住地球轉，工人好鬼自私？

A：工人今次罷工，固然係為咗拎返佢地自己應得嘅野，但其實呢次罷工嘅意義遠遠唔止係咁。試諗下，香港邊個人唔係比誠哥哩班資本家恰？ 工人呢次罷工如果掂咗，就係一個抗爭嘅成功例子，可以令其他碼頭嘅工人同埋更多慘受剝削嘅人鼓起勇氣，爭取返自己應得嘅野。更何況，我地食嘅着嘅玩嘅用嘅分分鐘全部係碼頭工人嘅勞動成果；唔通嘆世界時就唔理工人死活，佢地爭取應得權益我地就多多批評？其實根本係我地應該關心返啲碼頭工人先啱！