性別友善宿舍大哉問！

＃1：性別友善宿舍=男女混宿？

不以生理性別分配房間，只係打造性別友善宿舍嘅第一步。「性別友善」旨在沒有人會因其性別、性傾向而受到敵對、歧視或不公待遇。試問一位生理性別係男，但心裡認為自己係女嘅學生，點可以喺男層/男宿自在地生活？相對男女二元嘅性別觀念，性別友善宿舍可以令同學不分性別身份，無論男女、 跨性別、雙性戀、變裝者等等，都有得揀住埋一齊。

唔知有住宿嘅同學有冇留意，一般打蛇會被罰款、扣宿分，打鴛鴦蛇就動輒quit宿——擺到明唔想異性戀情侶同房啦。但明明情侶可以係同性、雙性，「鴛鴦蛇」嘅定義未免太窄。再講，一個生理性別係男，心裡認同自己係女嘅同學，點解唔可以住喺女層？制定宿規時，校方根本冇考慮過其他性別身份嘅同學，遑論為跨性別同學設立性別友善廁所，或在XX盃競賽中增設男女子組以外的選項。

＃2：宿舍唔係俾你扑嘢㗎！

先唔講性別友善宿舍唔只係俾情侶同居，再唔講佢哋係咪24個鐘都凈係想親密，喺宿舍做愛有何不可？點解大學生可以有讀書、休憩嘅私人空間，唔可以有性空間？正如大家都覺得喺宿舍睇AV、自慰冇問題，做愛也只是生活日常的一部分。宜家嘅宿規亦冇阻止到異性戀情侶喺探訪時間之內扑嘢，同性做愛仲暢通無阻添。校方欲打造「無性校園」，只怕性會玷污他們心目中的「純潔」大學生形象，所以你哋拍下拖拖下手仔就夠喇。

至於構唔構成騷擾，關鍵都係同roommate、同層好好溝通，與其他生活細節嘅協調無異（隔離房夜夜笙歌你都識拍門叫佢靜少少啦）。

＃3：我沖完涼出嚟見到異性，咪好尷尬……

成日聽Tutor（尤其係女層）講，「有啲女仔鐘意唔著bra、沖完涼包條毛巾就出嚟㗎嘛，如果有男仔喺度點算呢？」如果呢種顧慮係基於同學嘅自身經驗，我哋當然要尊重。所以推性別友善宿舍，唔係要所有宿舍都不分性別，強迫每個人都改變自己嘅生活習慣。如果你有所避忌，可以繼續揀同性樓層；如果你覺得性別差異冇咁大嘅環境比較自在，唔想因性/別身份而尷尬，性別友善宿舍就係另一種選擇。

如果話「保護女同學」，就要先問，點解預設咗女仔係特別脆弱、容易受侵犯？如果知道同層有異性，自己又介意的話，自然會包實啲。況且，性騷擾唔凈係喺異性之間：男仔見到宿友著條底褲周圍行，同樣可以感到唔舒服啫。所以重點始終都係同學之間嘅互相協調，而非喺宿舍範圍內隔離異性。

＃4：唔鐘意咪唔好住囉！

住唔住宿，唔係個個同學都有得揀。一個屋企環境狹窄、想擁有私人空間又俾唔起市面上昂貴租金嘅同學，可以唔住嗎？一個住得遠、又要成日喺學校做莊務做到深夜嘅同學，可以唔住嗎？

又有人話，你住得入嚟，就係同意咗呢度嘅規矩，就係要遵守㗎喇。但如果規矩唔合理，唔係由我哋制定，冇照顧到我哋嘅需要，點解唔可以改變？（唔通你揀咗入中大，焗住讀ELTU，又覺得心甘情願？）只有透過相互了解、協商，先可以反映宿生嘅真實需要。咁樣共同訂立嘅同住守則，先可以創造到一個大家都住得舒服嘅宿舍環境嘛。